Piɛɛ doo- Zezi ɔˈ dɩ ˈmʋn ˈmɛn

-Da Zezi -e ɔɔˈ dhbhoʋn nɩan ˈe etazɩ ɛˈ ˈˈdieˈˈ dhueˈ ˈdhi -dhe ɛ, ɔ -ghwluɛ- ˈe ʋbʋ bho ɔ ˈnaan: ‘Aʋaˈ klɛɛ ˈye ʋn sie ˈnɔn ˈˈmaʋnglu -ˈnʋn ˈdhi.’ Piɛɛ ˈnaan: ‘ˈƖn seɛ ˈbhɛɛ-! -Bho ʋaˈ klɛɛ ˈbhɔ ʋn mɔn -dhe ɛˈ, ˈmɔn ˈse ʋn ˈbhɔ i -flɛ.’ ˈKlaa Zezi -ghwluɛ- ˈe Piɛɛ bho ɔ ˈnaan: ‘-Bho -sʋnˈˈ ˈye zro ɛˈ, -man muɛn -ghwlu kpɛ taan -ˈye ka nʋn se ˈʋn jhibho-.’

ˈSʋlɩˈˈ kpa Zezi ˈdhe Kaifʋ ˈˈŋwɛn ɛn, dhbhoʋn anˈ -daduuˈˈ pleˈ. ˈKlaa dhbhoʋn ˈsɔɔn ˈkpa ˈe ɲʋn ˈˈklu -ʋʋ bhla ˈo ɔ ˈdhe. Ʋaˈ dhueˈ ɔˈ ˈɲnɩn -nɩn Piɛɛ. Ɔ munˈ ɔ ye ˈo Kaifʋ ˈˈŋwɛn -paa ˈˈdhe ɔ deɛ i ˈbho nɛn ˈˈŋwɛn ɔɔ yea ˈŋwɔnan. Ɲɔn ɔn ˈjheɛ ɔɔˈ ˈˈjhibha- ˈˈkpei. ˈSʋ ˈɲnʋnkpaoˈ dhueˈ -ʋan- nʋan dhbho ˈdhemɔn -ghwluɛ- ˈe ɔ bho ʋn ˈnaan: ‘ˈƖn jhibho- ʋn ˈmɛn! -Nɩn Zezi -nɩɛn -dadhueˈ -dhe!’

Piɛɛ ˈnaan: ‘ˈˈƖɩn-, ɛ se ˈʋn -nɩn! Dhɛ aa ˈtmʋan mɔn ˈɩn seɛ jhibho-!’ ˈSʋ ɔ muɛn ˈe ŋmɛinˈˈ ɛnˈ -klu bho. ˈKlaa ˈɲnʋnkpaoˈ -ˈnʋʋn -ʋan- nʋan dhbho -ke ɛ, ʋn ˈjheɔˈ ˈˈdhe ʋn ˈtmʋʋn- ɲʋn anˈ klɛɛ nɩan ˈo ʋn ˈnaan: ‘ˈˈJhu nɔn -nɩn Zezi -nanˈ -ke!’ Piɛɛ ˈnaan: ‘ˈƖn se Zezi jhibho-!’ ˈˈDhe ɲɔn dhueˈ -ghwlu -ɔ ˈnaan: ‘-Nɩɛn- ɔɔˈ dhɛcɩaʋn anˈ dhueˈ! -Manˈ ghwlu sʋn an toɛˈ -ka ˈghwlʋa Galile, ˈnɔn Zezi ˈghwlʋa -ke ɛ.’ ˈKlaa Piɛɛ -zrɛɛnˈ ɔ ˈnaan: ‘ˈƖn seɔ jhibho-!’

Ɔ gwɛa -kaˈ ˈdhaa a, -sʋnˈˈ zroˈ. Piɛɛ ˈjhe Zezi ˈmɛn ɔ ye i ˈˈbhile- ɔɔ yeɔ jha ŋmʋn. ˈSʋ ɔ poɛ dɩ Zezi ˈtmʋan anˈ dɩ -glʋˈ bho. Ɔ ˈˈsiɛˈˈ zɔnˈ ˈˈdhe ɔ ˈˈvɩn ˈjɛɛn-.

ˈDhe nɔnˈˈ -ˈnɔn ˈdhi ɛ, -ˈmɛn Zifʋ -ˈˈwe aˈ ˈˈdhrujheʋn man sanedrɛn gbooɛ- ˈˈdhrui ˈdhe Kaifʋ ˈˈŋwɛn -wɛeˈ ʋʋ ˈye Zezi ɔˈ ˈpee ˈjhe. Ʋʋ -za ˈo ʋaˈ ˈˈjɛ -gwlɩˈˈ see -dhe ʋʋ ˈyeɔ ˈdhbha, ˈklaa dhɛ ʋʋ ˈyea ˈo ˈˈkpei thbha -mɛn ʋa ˈbɔn in. -Jɛn kmanˈˈ bhla ɛmɛn- -nɩn dɩ ʋʋ ˈyeɔ -kpʋʋn ɛn, ɩn se -nɩn. Ɛɛ ˈbhɔɔa ˈbho ɛ, Kaifʋ deeɛ- Zezi i ɔ ˈnaan: ‘-Nɩɛn Ɲɔnsoa aˈ ˈˈJhu?’ Zezi -ghwluɛ- ˈe ɔ bho ɔ ˈnaan: ‘Ɛɛn.’ Kaifʋ ˈnaan: ‘-A se dɩ -duuˈˈ ˈbɔn in -kenɛnˈ. Ɔ ˈˈjreɛ- Ɲɔnsoa!’ Ʋaˈ klɛɛ ˈŋwɔɔn- ˈbho ˈmɛn -wɛeˈ ʋʋ ˈnaan: ‘Ɲʋn ˈyeɔ ˈdhbha.’ Ʋʋ poɛ Zezi ˈkpɩ -dheinˈˈ ˈˈdhe ʋʋ ˈghwlɔ tɔn ˈˈkpei. Ʋʋ bhlɔ dhɛ ˈˈjhri ˈˈdhe ʋʋ bhlɔˈ -wɛeˈ ʋʋ ˈnaan: ‘-Bho -nɩn ghwlukwajhaai ɛˈ, ˈˈsi ɲɔn ˈbhla ʋn ɔɔˈ ˈɲnɩn!’

Zɔn zɩan, ʋʋ kpa Zezi ˈdhe zifʋ -ˈˈwe aˈ ˈpeejhegbu- ˈdhi ˈˈdhe ʋʋ deeɔ i -kenɛnˈ ʋʋ ˈnaan: ‘-Nɩɛn Ɲɔnsoa aˈ ˈˈJhu?’ Zezi -za ʋaˈ ghwlu aˈ kpa ɔ ˈnaan: ‘Aʋaˈ ˈˈjɛ -ke ɛ, aʋ ˈnaan ˈɩn -nɩɛn- Ɲɔnsoa aˈ ˈˈJhu.’ Ʋʋ cɛɔn ghwlu ˈˈkpe ʋʋ ˈnaan ɔ ˈˈjreeɛ- Ɲɔnsoa ˈˈdhe ʋʋ kpɔ ˈdhe Pɔnsɩ Pilatɩ nɩan Rɔmʋnkɔʋn anˈ ˈˈdhrujhei- bho. Dhɛwɛ- -nʋʋɛn ˈbho ɛ ˈdhe -ɛ? Ɛmɛn- -aa mun ˈjhe- ˈdhe -bo -ɔɔ jhia ˈdhi.