Zezi ˈmɛɛnˈ ˈbho Gɔɔgota

ˈSraazaʋn anˈ ˈˈdhrujheʋn kpa Zezi ˈdhe Pilatɩ nɩan Zide -bhlʋa aˈ ˈˈdhrujhei- ɔˈ ˈˈgbu ˈdhi. Pilatɩ deeɛ ʋbʋ i ɔ ˈnaan: ‘Aʋ ˈnaan, dhɛwɛ- ˈˈjhu -ˈnɔn nʋn -ɛn?’ Ʋʋ ˈnaan: ‘Ɔ ˈdhaa- ɔ ˈˈjɛ ˈbheɔ!’ Pilatɩ deeɛ Zezi i ɔ ˈnaan: “-Nɩɛn- Zifʋ -ˈˈwe aˈ ˈBheɔ?” Zezi ˈnaan: “ˈMan ˈbheɔglɔ- se ˈnɔn ˈkmʋn nʋn ˈdhi -nɩn.”

ˈBho ɛ ˈdhe ɛ, Pilatɩ kpa Zezi ˈdhe Erodɩ nɩan Galile ɛˈ ˈˈdhrujhei- bho. Ɔɔ ˈbɔn ɔ ˈyeɛ ˈjhe -bho Erodɩ ˈbhɛɛ ɔ ˈye Zezi dɩ -kpʋʋn ɛnˈ. ˈKlaa Erodɩ ˈse dɩ ɔ ˈyea Zezi -kpʋʋn ˈjhe ˈsʋ, ɔ kpɔ ˈe Pilatɩ bho dhe. Pilatɩ -ghwluɛ- ˈe ˈcɛ bho ɔ ˈnaan: ‘ˈBho ˈmɔn -e Erodɩ -gwlɩˈˈ ɛ, ˈˈjhu -ˈnɔn ˈse dhɛsaʋn- nʋn. ˈYeɔ i ˈˈtai- ɔ ˈye mun.’ Ʋbʋ a ˈˈghwɔɔˈ ʋʋ ˈnaan: Dhbhɔˈ! Dhbhɔˈ!’ ˈSʋlɩˈˈ kpa Zezi ˈˈsɩnɩn ˈmʋn, ʋʋ ˈghwlɔ tɔn ˈˈkpei ˈˈdhe ʋʋ bhlɔ. Ʋʋ deɛ ˈˈghwi aˈ -gblaˈ ˈbho ɔˈ ˈˈdhru -wɛeˈ ʋa ghwlɔɔ, ʋʋ ˈnaan: ‘-A ˈsɛ- o, Zifʋ aˈ ˈbheɔ.’ Pilatɩ -ghwluɛ- ˈe ʋaˈ klɛɛ bho -kenɛnˈ ɔ ˈnaan: ‘ˈBhoo -gwlɩˈˈ ɛ, ˈˈjhu -ˈnɔn ˈse dhɛsaʋn- nʋn.’ ˈKlaa ʋa ˈˈghwɔɔ ʋʋ ˈnaan: “Koɔ ˈbho tu -gwlɩˈˈ!” ˈSʋ Pilatɩ -to ˈo Zezi ˈmɛn -wɛeˈ ʋʋ ˈyeɔ ˈdhbha.

ˈSʋlɩˈˈ kpa Zezi -da ɲʋn an ˈdhaa Gɔɔgota a. Ʋʋ koɔˈ ˈbho tu -gwlɩˈˈ ˈˈdhe ʋʋ kpa tu ˈˈjha. Zezi bhaeˈ ɔ ˈnaan: ‘ˈMan ˈˈbho, ˈghwlʋ ʋaˈ dhɛsaʋn- ˈˈkpe, dhɛ ʋa nʋan ʋʋ seɛ jhibho-.’ Ɲʋn an ghwlaa Zezi ˈmɛn, ʋʋ ˈnaan: ‘-Bho -nɩn Ɲɔnsoa aˈ ˈˈJhu ɛˈ, ˈghwlʋ ˈo tu -gwlɩˈˈ -ˈye i ˈˈsi! ˈPʋʋ -manˈ ˈˈjɛ bhla.’

ˈˈKudhbhai- dhueˈ ɲʋn koa ˈo tu -gwlɩˈˈ ˈbho Zezi ˈˈbun ˈnaan: “Po ˈman dɩ -glʋˈ bho -bho - man sa ˈe -manˈ ˈbheɔglɔ ˈdhi jhi ɛˈ.” Zezi cɛn ghwlu ˈdhe ɔ bho ɔ ˈnaan: “-Nɩn ˈman muɛn ˈe -bɔyaˈˈ -deɩn- ˈdhi -nɩn.” ˈˈJiejhru bho ɛ, ˈbhlʋa aˈ klɛɛ nɩɛn ˈe kule ˈdhi ɛ ˈye lɛɛ ɛˈ ˈˈjhriɛ taan nʋn. Dhɛcɩaʋn -ˈnʋʋn -ɲnan in ˈbho tu ˈˈbun. ˈDhe ʋbʋ ˈˈklun ɛn, Mai nɩan Zezi ɔˈ ˈdhou -nɩn ˈe ˈmɛn. Zezi ˈtmʋʋn- Zan ˈmɛn ɔ ˈye Mai aˈ dɩ ˈˈdu -ka ʋanˈ nɩan ɔɔˈ ˈˈjɛ ɛˈ ˈdhou ɛ.

Ɛ ˈyea ˈo ˈbhɔɔ- ɔ, Zezi ˈnaan: “Ɛ ɲnin ˈo ˈmɛn!” Ɔ -jha ˈˈdhru jha ˈsʋ ɔ ˈmɛɛnˈ. ˈDhe nɔnˈˈ -ˈnɔn ˈdhi ɛ, ˈbhlʋa trɛˈ ˈjɛɛn-. ˈDhe Ɲɔnsoa aˈ ˈˈgbu -klaaˈˈ ˈdhi ɛ, -draˈˈ kuaˈ ˈmʋn ɲʋn poa ˈˈjha -ɔ zela -da nɩan ˈPepeˈ -e -da nɩan ˈPepeˈ ɔˈ ˈPepeˈ i ˈghwlʋɛ ˈfɛ ˈsɔɔn. ˈSʋlai- dhueˈ ghwluˈ ɔ ˈnaan: ‘ˈˈJhu nɔn nɩɛn- Ɲɔnsoa aˈ ˈˈJhu -dhe ˈjɛɛn-.’