Dhɛ ooˈˈ dhɛ se ˈbhɛɛ- ɛ ˈye ʋbʋ i -ɲnaan

ˈˈJhu dhueˈ sea ˈbhɛɛ- -ɔ ˈyea -nan -dhe ɛ, ɔɔ -deɛ i jheejhee ˈbho Ɲɔnsoa aˈ ˈˈgbu- -klaaˈˈ aˈ -klu dhueˈ ˈˈbun ɔɔ yea ɲʋn ˈghwɛi bho zrɔɔ. -Zɔn dhueˈ ɛˈ ˈˈjhiejhrʋ bho ɛ, ɔ ˈjheɛ Piɛɛ -e Zan -ʋa pa ˈe Ɲɔnsoa aˈ ˈˈgbu- -klaaˈˈ ˈdhi. Ɔ -ghwluɛ ˈdhe ʋbʋ bho ɔ ˈnaan: ‘Aʋ -kɔngɩnˈ aʋ ˈˈɲɩn ˈʋn dhɛzaanˈˈ.’ Piɛɛ ˈnaan: ‘Dhɛ ˈɩn ˈbhlea ˈyea ʋn ˈˈɲɩn ɛn, ɛ -zii ˈghwɛiˈ ˈmɛn. ˈDhe Zezi ɔˈ ˈɲnɩn ˈmʋn, -sɔn ˈmʋn -ˈye -nan!’ ˈSʋ Piɛɛ poɔ sʋn bho ɔ ye ˈmʋn -sɔn ˈˈdhe ˈˈjhu -ˈnɔn -dee -naanˈ ˈmɛn! Ɲʋn -ˈjhea -jhriiˈ- -ˈnɛn ɛnˈ da, ˈmʋnan an nʋn ʋbʋ ˈmɛn ˈˈdhe ɲʋn -duuˈˈ ˈkpa Zezi ɔˈ dhɛcɩaʋn.

ˈKlaa ˈSraazaʋn- -e Sadiseɛn -ˈˈwe ˈkpa ˈcɛn. Ʋʋ kpʋ dhbhoʋn ˈmɛn ˈˈdhe ʋʋ kpʋbʋ ˈbho Sanedrɛn ˈˈjhibhaˈ -wɛeˈ ʋʋ dee ʋbʋ i ʋʋ ˈnaan: ‘Ɲɔnwɛ- ˈˈɲɩn aʋ ˈˈɩkman- -wɛeˈ aʋ ˈpʋʋ ˈˈjhu nɔn -ɔn?’ Piɛɛ ˈnaan: ‘Ɛ nɩn Zezi, aʋ ˈdhbha a.’ Zifʋ -ˈˈwe aˈ ˈˈdhrujheʋn ˈˈghwɔ ɔˈ ʋʋ ˈnaan: ‘Aʋ -ɲnaan Zezi ɔˈ dɩ ˈtmʋan in!’ ˈKlaa dhbhoʋn ˈnaan: ‘-A ˈye ɔɔˈ dɩ ˈtmʋn. -A ˈse ɛɛˈ nʋn dɩ ˈbhɔ i.’

Ʋbʋ aˈ -nɛɛn ˈˈtaia ʋbʋ i ɛ, Piɛɛ -e Zan muɛn ˈe dhɛcɩaʋn sia ˈo bho ʋʋ yʋbʋ dhɛ -nʋʋan ˈtmʋʋn-. Ʋʋ ˈkpa -dadhueˈ ʋʋ ye Zoova bhae- ʋʋ ye ka ˈdha: ‘-Kɔngɩnˈ, -ˈˈɲɩn -aʋ -ˈglʋfiɛ- -wɛeˈ dhbho dea -aʋ kwa, -a ˈye ɔɔˈ nʋanˈ ɲan kpa.’ Zoova ˈˈɲɩɛn ʋbʋ ɔɔˈ -zuu gwɛai ˈˈdhe ʋʋ kpa -bo -bhlaa -e ɲʋn an ˈghwɛ ˈbhɔɔɛ- ɲan. Ɲʋn -duuˈˈ -a ˈkpa dhɛcɩaʋn -dhe. ˈSʋ -gwlɛnˈ ˈˈtun Sadiseɛn -ˈˈwe ˈmɛn ʋʋ ye dhbhoʋn kpʋn ʋʋ yʋbʋ -gazo ˈdhi po. ˈKlaa ˈˈmaʋn ˈsʋ ɛ, Zoova dhbhoɛ ɔɔˈ dhbhoozuu- dhueˈ ʋn ye -gazo- -gbu ˈˈŋwɛn kain- ˈˈdhe ʋn ˈtmʋʋn dhbhoʋn ʋn ˈnaan: ‘Aʋ mun ˈe Ɲɔnsoa aˈ ˈˈgbu- -klaaˈˈ ˈdhi dhe, aʋ ˈye ɲʋn dhɛ -tɔɔn.’

Zɔn zɩan, -gazo- -gbu ˈdheidei- -ghwluɛ ˈe ˈpeejheʋn ˈnɩan ˈe Sanedrɛn ˈbho ʋʋ ˈnaan: ‘-Gazo- -gbu -kaan ˈˈŋwɛn, ˈklaa ɲʋn aʋ poa e ɛ, ʋʋ se ˈe -nɩn!’ ˈSʋ ɲɔn dhueˈ ˈnaan: ‘ʋʋ -nɩɛn ˈe Ɲɔnsoa aˈ ˈˈgbu- -klaaˈˈ ˈdhi ʋa yea ɲʋn dhɛ tɔɔn!’ Ʋʋ kpʋ dhbhoʋn ˈmɛn -kenɛnˈ, ʋʋ yʋbʋ ˈbho Sanedrɛn ˈˈjhibhaˈ kpa. ˈSraazai- -klaaˈˈ -ghwluɛ ˈdhe ʋbʋ bho ɔ ˈnaan: ‘-A ˈtmʋʋn aʋ ˈmɛn -a ˈnaan aʋaˈ ˈtmʋʋn -e Zezi ɔˈ dɩ -dhe!’ ˈKlaa Piɛɛ -ghwluɛ ˈdhe ɔ bhɔ ɔ ˈnaan: “Ɲɔnsoa -mɔn -a ˈye ŋwɔn ˈjhe ɛ se -glɔɲiɔn -nɩn.”

Zifʋ -ˈˈwe aˈ ˈˈdhrujheʋn ˈkpa ˈcɛn ˈjɛɛn- ˈsʋ ʋa ˈbɔn ʋʋ ˈye dhbhoʋn ˈdhbha. ˈKlaa Faiziɛn -ˈˈwe aˈ dhueˈ -ɔɔˈ ˈɲnɩn nɩan Gamaliɛlɩ -sɔan ˈʋn ˈsʋ ɔ ˈnaan: ‘Aʋ ˈsroo- -ˈgwlɩi! Ɛgwɛ Ɲɔnsoa -nɩn ɲʋn nʋn -ˈnan. Aʋa ˈbɔn ˈjɛɛn- aʋ ˈye Ɲɔnsoa bho vɔn?’ Ʋʋ ˈˈduɛˈˈ ɔɔˈ ˈsrɩn ˈˈjhriɛ-. Ʋʋ ˈyʋbʋ i ˈˈtai- ɛ, ʋʋ kpa ʋbʋ ˈˈsɩnɩn ˈmʋn ˈˈdhe ʋʋ ˈtmʋʋn ʋbʋ ʋʋ ˈnaan ʋaˈ bhla bo -dhe ˈbhodhe. ˈKlaa ɛ ˈse dhbhoʋn anˈ dhbho i ɲnaan-: Ʋʋ poɛ ˈe ˈkpɩ ʋʋ ye -bɔyaˈˈ bo -bhlaa ɲan kpa ˈdhe Ɲɔnsoa aˈ ˈˈgbu- -klaaˈˈ ˈdhi -e ŋmɛinˈˈ ˈdhii.