Zezi ˈˈɲɩɛn ɲʋn anˈ ˈˈghwlu -ghwluu dhiidhɛ-

Nɔnˈˈ dhɛzaan sia ˈo -wɛeˈ 32 zʋn anˈ Pakɩ -ɛ ˈyea -nʋʋɛn- ɛn, dhbhoʋn an ˈghwlʋɛ -bo bhlaaˈ. Ʋʋ seaˈ, ɛɛˈ dɩ Zezi ˈbhlee- ʋbʋ bato ˈdhi ɔ kpʋbʋ Bɛsaidɩ -wɛeˈ ʋʋ ˈye -fɔn. ˈKlaa -jɛn bato ɔ ˈˈkʋʋan ˈo ˈkpʋʋ i ɛ, Zezi ˈjheɛˈ -ka ɲʋn anˈ ˈˈghwlu -ghwluu a fua ʋbʋ ˈbhomɔn. -Bho ɔɔ sa ˈbɔn ɔ -nɩn ɔɔˈ dhbhoʋn anˈ ˈsʋ ˈye -dadhueˈ -nɩn mɔn -dhe ɛˈ, ɔ toɛ ˈdhiŋwɔnmɔɛn- ˈdhe ɲʋn bho. Ɔ ˈpʋʋ- ʋaˈ ɲʋn ˈghwɛ ɛ nʋan ˈmɛn ˈˈdhe ɔ -tɔɔɛn ʋbʋ dhɛ. ˈDhe -zɔn -ˈnɔn ɔnˈ klɛɛ ˈdhi ɛ, ɔ ˈtmʋɛn Ɲɔnsoa aˈ ˈbheɔglɔ- ɔˈ dɩ ˈdhe ʋbʋ bho. ˈˈJiejhrubho ɛ, ɔɔˈ dhbhoʋn jhiɛ ˈdhe ɔ bho ˈˈdhe ʋʋ ˈnaan: ‘Ɛgwɛ ˈmɩɩɛn- nʋn ɲʋn -ˈnʋn. ˈTmʋʋn- ʋbʋ ʋʋ ˈye mun ʋʋˈye dhiidhɛ dɩn ʋʋ ˈye dhi.’

Zezi -ghwluɛ- ˈe ʋbʋ bho ɔ ˈnaan: ‘Ɛ se dɩ -kɔn -wɛeˈ ʋʋ ˈye dhiidhɛ -dɩanˈ mun. Aʋ ˈbhɛɛˈ aʋ ˈyʋbʋ dhɛ ˈˈɲɩn da ʋʋ ˈye dhi.’ Dhbhoʋn- deeɔ i ʋʋ ˈnaan: ‘-Man ˈbɔn -a ˈye mun -a ˈye dipɛn dɩn -a ˈyʋbʋ ˈˈɲɩn?’ Filipʋ, nɩan dhbhoʋn anˈ dhueˈ ˈnaan: ‘-Bho -a ˈbhle ˈghwɛi- -duuˈˈ mɔn -dhe ɛˈ, -a se ˈbhɛɛ- -a ˈye dipɛn dɩn -wɛeˈ -a ˈyʋbʋ aˈ klɛɛ ˈˈɲɩn.’

Zezi deeɛ- ʋbʋ i ɔ ˈnaan: ‘Dhɛwɛ- -a ˈbhle -a ˈye dhi -ɛ?’ Andre -ghwluɛ- ˈe ɔ bho ɔ ˈnaan: ‘-A ˈbhleɛ dipɛn -mmˈˈ -e zmii- -jhɔ -mɩɩnˈˈ ˈsɔɔn. Ɩn se ˈˈɩ -di.’ Zezi ˈnaan: ‘Aʋ jha ˈʋn dipɛn -e zmii- -ˈnɩn.’ Ɔ ˈtmʋʋn- ɲʋn nɩan ˈo ˈmɛn ʋʋ ˈye i de kpɛ kpɛ ˈbho -peiˈˈ ˈˈkpe. Ɲʋn anˈ 50 anˈ kpɛ -e ɲʋn anˈ 100 aˈ kpɛ. Zezi ˈˈdhuɛ- dipɛn -e zmii- -ˈnɩn ˈmʋn, ɔ -ŋmʋɛn ˈe jhaʋn ˈdhi ˈˈdhe ɔ bhae-. -Wɛeˈ ɔ ˈˈɲɩn dhbhoʋn -ˈˈwe ˈˈdhe ʋbʋ gblɩ ɲʋn anˈ klɛɛ ˈˈjhrii. Ɲmai- aˈ 5.000 -e ˈɲnʋnkpaeˈ-e ˈˈɲnumɩɩnˈˈ anˈ klɛɛ dhiˈ ˈsʋʋ ʋʋ ye dhbho. ˈBho ɛ ˈdhe ɛ, dhbhoʋn ˈtɛn ɩanˈ -jɩn sia ˈo ˈmɛn -wɛeˈ dhɛ -saˈ ˈkɔ. Ɩn ˈˈjhiɛ -toeˈˈ aˈ 12! -Jhriiˈ- -ˈnɩn -nʋʋan- an, ɩanˈ ˈˈmaan -ʋn -taiˈ?

Ɲɔʋbʋ nʋɛn ˈmʋnan- ɛɛˈ dɩ ˈjɛɛn- ˈsʋ ʋa ˈbɔn Zezi ˈye ʋaˈ ˈbheɔ -nɩn. ˈKlaa Zezi jhibhɩ -ka Zoova sea ˈbɔn ɔ ˈyea ˈbheɔ ˈkpa ˈdhe nɔnˈˈ -ˈnɔn ˈdhi ɛ. ˈSʋ ɔ ˈtmʋʋɛn- ʋaˈ klɛɛ ʋʋ ˈye ˈdhʋbʋ ˈˈŋwɛin mun, ˈˈdhe ɔ ˈtmʋʋn- ɔɔˈ dhbhoʋn- ʋʋ ˈye ˈe Galile ɛˈ ˈtɔnin ɛnˈ ˈfɔ -ˈnɔɔn bho mun. Dhbhoʋn ˈjha ˈe ʋaˈ bato ˈdhi ˈˈdhe Zezi ɔˈ ˈsʋ muɛn ˈe trʋ ˈˈkpe. Dhɛɛdɩ- -ɛ? Ɔɔ ˈbɔn ɔ ˈye ˈo nɔnˈˈ -za -dhe -wɛeˈ ɔ ˈye ɔɔˈ ˈˈBho bhae-. -Bho ɔ ˈbhle dhbho -duuˈˈ mɔn -dhe ɛˈ, Zezi ɔ ˈˈdhuɛ- nɔnˈˈ ˈmʋn jheejhee ɔ yea bhae-.