-Nʋʋn ˈsɛɛ Aʋ ˈjhe -bɔyaˈˈ sea ˈˈtianˈ ˈbhle! dhbho -ˈyeɛ nʋn ɲʋn ˈye Zoova -e Zezi -gwlɩˈˈ de

-Bho ɲʋn -ʋa- ˈcɩan Biiblʋ ˈye ˈdhe Zoova ˈˈjhri ˈdhe i -nmɔn ɔnˈ, ʋʋ ˈye dhɛgwlɩdeɛ- kua i ˈbhle. (Hé 11:6) -A ˈbhɛɛˈ -a ˈye ˈsɛɛ Aʋ ˈjhe -bɔyaˈˈ sea ˈˈtianˈ ˈbhle! dhbho -nʋʋn -wɛeˈ -a ˈye ʋbʋ aˈ -pɛɛ i ˈtun. ˈSɛɛ- -ˈnɛn ɛn zela dhɩ ˈˈkpe i -kajɔɔnka ˈˈdhe Biiblʋ aˈ ˈˈjhri -e ideedɩ- ˈdhɔɛeˈ -e videe -ɩan- tuanˈ ɲʋn anˈ -pɛɛ i -e fete ˈdhɔɛeˈ -nɩn ˈdhe ɛ ˈdhi. -Bho -aa sa dhɛcɩain sʋn bho po ɔɔ sa kletiɛn ɛnˈ kplɩn ˈbhle ˈˈdhe ɔ -nɩn Ɲɔnsoa a sa jhbhɛɛ ɛˈ, ɛ nɩn -ka -aaˈ -jhiia dhɩ nɛn sea ˈbhɛɛ- ɛ ˈyea ˈkɔɔ- i -wɛeˈ -aaˈ poa ˈˈgbu ɛ.​—1Co 3:12-15.

ˈBho ɲʋn -ˈnʋʋn -gwlɩˈˈ ɛ, dhɛ ʋʋ sea ˈbhɛɛ- ʋʋ ˈyea Ɲɔnsoa ˈjhe ɛ, -ˈmɛn ʋʋ se ˈbhɛɛ- ʋʋ -nɩn ɔ ˈye -jhbhɛɛ-. -ˈMɛn -a ˈye ʋbʋ sʋn bho po ʋʋ ˈye Zoova jhibho- ˈˈdhe ʋʋ ˈyeɔ -gwlɩˈˈ de.

-ˈJHE VIDEO NƆN IN, -NƲƲN ˈSƐƐ “AƲ ˈJHE -BƆYAˈˈ SEA ˈˈTIANˈ ˈBHLE!” DHBHO -ˈYEƐ NƲN ƝƲN ˈYE ZOOVA -GWLƖˈˈ DE -ˈMƐN -ZA ˈE IDEEDƖ NƖAN DA ˈZƆN DA:

• -Ɛɛ toɛ -ka ˈdhoudhi -ɲnʋnkpaoˈ -ˈnʋn poa ʋanˈ ˈˈjɛ kpɔˈˈ -kajɔɔnka -a?

• -Kawɛ ʋn nʋn ideedɩ i -jhii sʋn ˈˈdhe ʋn po dhɛcɩain sʋn bho- -wɛeˈ -ka ʋan nʋan dɩ Isaïe 41:10, 13 an ˈtmʋan ˈjhe sʋn ɛn, ʋn tmʋn ɛnˈ dɩ -ɛ?

• Dhɛwɛ- Biiblʋ aˈ ˈˈjhri -e video nʋn dhɛcɩain ˈˈdhrui -ɛ?

Ɲʋn -duuˈˈ -nɩn ˈo -ʋaˈ ˈŋwɔn zeieghwliɛ- ɛˈ dɩ ˈi -aeˈˈ -ʋaˈ ˈjheɛ -ka ɛ nɩan -baanˈ- Ɲɔnsoa nʋan ʋbʋ ˈˈdhrui ɛ. (Ga 2:20) Ɛɛˈ dɩ -a ˈye ʋbʋ sʋn bho po ʋʋ ˈye ˈsraa Zezi za -gwlɩˈˈ de.

-ˈJHE VIDEO NƆN IN, -NƲƲN ˈSƐƐ “AƲ ˈJHE -BƆYAˈˈ SEA ˈˈTIANˈ ˈBHLE!” DHBHO -ˈYEƐ NƲN ƝƲN ˈYE ZEZI -GWLƖˈˈ DE -ˈMƐN -ZA ˈE IDEEDƖ- NƖAN DA ˈZƆN DA

• -Ɛɛ toɛ -ka ˈdhoudhi ɲmau- -ˈnɔn poa ɔɔˈ ˈˈjɛ kpɔˈˈ -kajɔɔnka -a?

• ˈSɛɛ ɛˈ ˈfɔ nɩan “ˈBɔn dhɩ -ˈnɩɩn anˈ i ˈŋwɔan in” ɛn, -kawɛ ɔ nʋn ɔnˈ dhbho -nʋʋn sʋn -wɛeˈ ɔ po dhɛcɩain sʋn bho -ɛ?

• Dhɛɛdɩ- ɛ -kɔn dɩ ɲʋn ˈye bhae- dhɛcɩain ɔnˈ dɩ -ɛ?