AƲ -DE ˈˈJHRIƐ ˈˈƖ!
-Dawɛ kplɩn ˈdhɔɛeˈ -e dhɩnʋnsʋn ˈdhɔɛeˈ -paa -a?: Dhɛwɛ- Biiblʋ a ˈtmʋn ˈdhe ɛɛˈ dɩ ˈdhi -ɛ?
-Ka zɩn an zia, ˈkamɔn- ɲʋn anˈ kplɩn -e dhɩnʋnsʋn anˈ ˈˈjhrii -ɲniɛn ɛn ˈkpa ˈˈkpe. ˈGhwɛpaʋn -ˈnʋʋn -ʋaˈ ˈjhea dhɛ ŋwɔn ɔn, ʋaˈˈghwɔɔɛ dɔsrɔ ˈˈdhrui, dhɩplegbi- ˈdhii ɛ, ɲʋn -ʋaˈ ˈjhea dhɛ ŋwɔn ʋa kpa dhɩpleʋn- dɩ ˈˈbhli, -ˈnʋʋn an jeɛ sofɛɛ -e ɲʋn -ʋa- ˈˈduaˈˈ ʋaˈ dɩ viɔn -e trɛn ˈdhii dɩ ˈˈbhli. -Klainˈˈ -ɲnun -mɩɩnˈˈ -ˈnʋʋn an ghwlaa ʋaˈ misie -ˈˈwe ˈmɛn, ʋa kpʋbʋ sʋn ˈˈbun ˈmɛn mɔn -ke. Poitinʋʋn- -ˈnʋʋn -nɩɛn- ˈe dhɩsaɩn ˈzɔn ˈˈdhe -ˈnʋʋn -nɩn ˈo -ʋa- to ʋaˈ kplɩn anˈ ˈˈjhrii -ɲniɛn ˈdhe ʋaˈ ˈtmʋʋndɩ- -e ʋaˈ nʋʋndhɩ ˈdhi.
Kplɩn -ɩn nmɔan ˈo dhi ɲʋn ˈyea ˈbhle ɛ, Biiblʋ -mʋn -ʋan- ˈtmʋn ɩanˈ dɩ. ˈˈDhe dhɛ nɩan ˈo -wɛeˈ ɲʋn anˈ -da -duuˈˈ aˈ nʋʋn kplɩn sea ˈˈjhriinmɔn- ˈzɩan an, ʋan ˈtmʋʋɩn -ke.
-Dawɛ kplɩn ˈdhɔɛeˈ -e dhɩnʋnsʋn ˈdhɔɛeˈ -paa -a?
Kplɩn ˈdhɔɛeˈ -e dhɩnʋnsʋn ˈdhɔɛeˈ -sɔn in: Ɲʋnŋwɔnjheɛ- -e kplɩn anˈ ˈˈjhriinmɔɛn ɛn, ɛ nɩn dhɩ -ɩanˈ ˈjhea -kman anˈˈ ˈzɩan ˈnɔn ˈkmʋn nʋn ˈdhi.
Dhɛ ɲʋn nɩan ˈe Meikɩ dea ˈˈjhriɛ ˈˈkpe ˈnɔn ˈghwɩ nɩn ˈdhi ˈˈdhe ʋʋ ˈtmʋan ˈdhe Galupʋ ˈdhi -mɛn -nɩn, kplɩn anˈ ˈˈjhrii -ɲniɛn -e -manˈ ˈjhe ɲʋn ŋwɔn -e kwafeeɛ- -e dhɩsaɩn ˈkpa ˈˈkpe ˈdhe Etaziniin ɛ ˈye -ka ɛ nɩan ˈdhe zɩn anˈ 22 zia ˈdhi -zii.
ˈBho -mɛnˈ ˈdhe ɛ, ɲʋn -jhii ˈbhlʋɩ aˈ 28 ˈdhii -ʋʋ dee- ɲʋn anˈ 32.000 in ˈdhe dhɩ ʋa dea ˈˈjhriɛ ˈˈkpe ˈzɩan ˈdhe ɲʋn anˈ dhɩnʋnsʋn -e ʋaˈ kplɩn anˈ dɩ ˈdhi ɛ, ɲʋn -ˈnʋn ˈnaan, ɲʋn anˈ dhɩnʋnsʋn -e ʋaˈ kplɩn ɲʋn an dea ˈˈjhriɛ ˈˈkpe ˈzɩan an, dhɛ -ɛ ˈyea ˈˈjhrii -ɲnin -ɛ ˈyea ˈo dhi zi ɛ, ɛ se -nɩn. ˈˈDhe ɲɔn ˈse ɛɛˈ dhɛ tu ˈjhe -kpɔ dhueˈ.
Kplɩn ɲʋn ˈbhlea ˈzɩan an, Biiblʋ -zɛɛ ɲan ʋn ˈyɩ ˈtmʋn.
“Jhibho- dɩ nɩn, ˈdhe dhebhɔɔghwɩ ˈdhi ɛ, ˈkmʋn anˈ ˈˈɩkman- an muɛn -jieˈˈ -zi. Dhɛbhleɛ ɲʋn an muɛn ʋaˈ ˈˈjɛ ɛˈ dɩ -kman, ʋa muɛn ˈghwɛi aˈ dɩ -kman, ʋa muɛn ʋaˈ ˈˈjɛ dɩ bho -po, ʋʋ ˈye ʋaˈ ˈˈjɛ ˈˈɩ ˈbhɛɛ-, ʋa muɛn Ɲɔnsoa aˈ ˈɲnɩn ˈkɔɔ-, ʋʋ ˈse ʋaˈ ˈcɛ ŋwɔn ˈjhe i, -bho ɲʋn nʋbʋ ˈjɛɛn ˈˈdhrui ʋʋ seɛˈ ˈˈɩ jhibho- i, [...] ʋa muɛn dhɛjɛɛn ˈmʋn ˈɲɛn- [ˈˈdhe] ʋʋ ˈye ŋwɔn -zanzan- -nɩn.”—2 Timote 3:1-3, Good News Translation.
-Bho -ˈye dhɩ -duuˈˈ i ˈŋwɔn ˈdhe ɲanzaadɩ- -ˈnɩn anˈ ˈbho -ɲniɛn ɛnˈ dɩ ˈdhi ɛˈ, -mɛnˈ zro “La Bible a-t-elle prédit la mentalité et la conduite des gens de notre époque?” ˈdhii.
ˈSɛɛ -ɛɛ toa ˈo ˈsrɩn ˈdhɔɛeˈ ˈdhe kplɩn ɲʋn ˈyea ˈbhlea aˈ dɩ ɛ
ˈKmʋn nʋn -ʋn ˈdhe ɲʋn anˈ nʋʋn kplɩn sea ˈˈjhriinmɔn ɔn, ɲʋn anˈ mliɔn -nɩn ˈnʋn ˈdhi -ʋa- ˈtai- ˈsrɩn ˈdhɔɛeˈ nɩan ˈe Biiblʋ ˈdhii ɩan nʋɛn ʋa yea kplɩn ˈdhɔɛeˈ ˈbhle. ˈSrɩn nɩan ˈe ʋn ˈdhi ɛ, “ɩn -nɩɛn- -gwlɩˈˈ -de -ka jheejhee, ˈzɩan ˈˈdhe ɛ se ˈˈtian ˈbhle -i.” (Psaume 111:8) ˈSrɩn -ˈnɩn anˈ -ˈnɩɩn ka:
Biiblʋ ˈnaan: “-Ka aʋa ˈbɔan ɲʋn -ˈnʋʋn ˈyea aʋ ˈbhle ɛ, ˈkamɔn- aʋ ˈye ʋaˈ ˈbhle sʋn nʋn -ke jheejhee.”—Matie 7:12.
Dhɛ ɛ ˈdhaa: -A ˈye ɲʋn -ˈnʋʋn ˈbhle ˈdhe ɲʋndɩkman- ˈmʋn, -a ˈyʋbʋ ŋwɔn ˈjhe, -ka -aa ˈbɔan ɲʋn ˈyea -aʋ ˈbhle -ke ɛ.
Biiblʋ ˈnaan: “-Kaanbhla, dhɛ aʋ ˈbhɔa ɲʋn ˈsrɛi -poo dɩ ɛ, -mɛnˈ aʋ ˈye bha tɔˈdɩ- ˈtmʋʋn- dhueˈ dhueˈ.”—Efɛzɩ-Kɔʋn 4:25.
Dhɛ ɛ ˈdhaa: -A ˈye tɔˈdɩ- ˈtmʋn ˈdhe dhɛ ooˈˈ dhɛ -aeˈˈ dɩ ooˈˈ dɩ ˈdhi.
-Bho -man sa ˈbɔn -ˈye dhɩ -duuˈˈ i ˈŋwɔn ɔnˈ, -mɛnˈ zro: