Ze Olɛnpikɩ ˈbhɛɛˈ ˈmɛn ˈjɛɛn- ɩn ˈyeɛ nʋn ɲʋn ˈye ghwluiˈ ˈŋwɔɔn-?: Dhɛ Biiblʋ a ˈtmʋan?

Ze Olɛnpikɩ ɲʋn an muan ˈo i -de ˈdhe 2024 ˈdhi ɛ, ɲʋn ˈghwlʋa ˈbhlʋɩ aˈ 206 ˈdhii -ʋa- jhɩ ˈmʋn ɛn, ɲʋn -an mubʋ i ˈjhe- ˈbhɛɛ- ɲʋn anˈ mlia -mmˈˈ ˈmɛn. “Dhɛ klaaˈˈ nɛn -ɛɛ poa ɲʋn -da dhueˈ ˈdhe ˈghwluiˈ ˈŋwɔɔɛn- ˈmʋn ɛn, -a -nɩn ˈdheɛ ˈdhi ˈmɛn -ke,” Toma Basɩ -ɔ nɩan kpɔ -ɔɔ poa Ze Olɛnpikɩ jie bho da ˈbhlʋa aˈ klɛɛ ˈˈkpe ɔɔˈ klaaˈˈ, ˈkamɔn- ɔ ˈdha. “Ze Olɛnpikɩ -ˈnɩn -ɩan- poa ɲʋn -da dhueˈ ˈdhe ˈflɛ -e ghwluiˈ ˈŋwɔɔɛn- ˈmʋn -ka -aaˈ man ɲʋn dhueˈ ɛ, -a nʋn ɩanˈ ˈmʋnan.”

Ze Olɛnpikɩ ˈbhɛɛˈ ɩn ˈyeɛ nʋn ɲʋn ˈye ghwluiˈ ˈŋwɔɔn- ˈdhe ˈflɛ ˈmʋn? Dhɛwɛ- ˈbhɛɛ -ɛ ˈye -aʋ ˈflɛ -e ghwluiˈ ˈŋwɔɔɛn- ˈjɛɛn- ˈˈɲɩn -ɛn?

Ze Olɛnpikɩ ˈbhɛɛ ˈmɛn ˈjɛɛn- ɩn ˈyeɛ nʋn ɲʋn ˈye ghwluiˈ ˈŋwɔɔn- ˈdhe ˈflɛ ˈmʋn?

Ze Olɛnpikɩ nɩan ˈzʋn ɛn, ɩn ˈse ˈo idooɛ- ɛˈ ˈsu ˈˈkpe ˈˈtii-. Poitikɩ -e dhɩ -ˈnɩɩn -ɩan- zea ɲʋn in ɛn, ɩmɩn- -nɩn ˈdhe ɩn ˈdhi -ke. ˈDhe ɩanˈ dhɩ tu ˈˈklun ɛn, ɲʋn anˈ ˈˈkpei -flɔɛn -e ɲʋn in ˈcra- -e dhɩ sea ˈˈɩ ˈsrɛ -nɩn ˈe ˈmɛn.

Ze -ka Ze Olɛnpikɩ nɩan, ɩan nʋɛnˈ ɲʋn an yea ˈbhlʋɩ ˈdhii ˈghwlʋ ʋa yea ˈplʋ ˈˈjhrii za. ˈKlaa dhɛ nɩan ˈo bhla -mɛn -nɩn, Ze -ˈnɩn ˈbho ʋbʋ -gwlɩˈˈ -ɩn ˈyea ˈflɛ -e ghwluiˈ ˈŋwɔɔɛn- sɩn ˈdhei de ɛ, ˈdhe in ˈmʋn ɲʋn an nʋn dhɩ -ɩan- zela ɲʋn in.

Kplɩn -ɩan- nʋɛn -wɛeˈ ghwluiˈ ˈŋwɔɔɛn sea da ˈbhlʋa ˈˈkpe -nɩn ˈzɩan an, Biiblʋ ˈtmʋn ɩanˈ dɩ ˈmɛn. (2 Timote 3:1-5) -Bho -ˈye dhɩ -duuˈˈ i ˈŋwɔn ˈdhe Biiblʋ aˈ ɲanzaadɩ aˈ dɩ ˈdhi ɛˈ, -mɛnˈ zro ˈcɩaandhɛ- “La Bible a-​t-​elle prédit la mentalité et la conduite des gens de notre époque?” ˈdhii.

Dhɛ -ɛ ˈbhɛɛa -ɛ ˈyea ˈflɛ -e ghwluiˈ ˈŋwɔɔɛn- -jha da ˈbhlʋa ˈˈkpe

Dhɛ ˈbhɛɛa -ɛ ˈyea ˈflɛ -e ghwluiˈ ˈŋwɔɔɛn- da ˈbhlʋa ˈˈkpe -jha a, Biiblʋ a ˈtmʋn ɛnˈ dɩ ˈmɛn. Ʋn ˈtmʋʋɩn -ka ɲʋn anˈ klɛɛ nɩan da ˈbhlʋa ˈˈkpe a muan ghwluiˈ ˈŋwɔɔn- ˈdhe ɲʋnbhleglibha- ɲʋn an ˈdhaa: “Ɲɔnsoa aˈ ˈBheɔglɔ-” -ɔ nɩan ˈe jhaʋn ˈdhi ɔɔˈ ɲʋnbhleɛ- ˈzɔn—Luikɩ 4:43; Matie 6:10.

Zezi nɩan ˈBheɔglɔ- -ˈnɔn ɔnˈ ˈBheɔ ɔ, ɔɔ muɛn ˈflɛ da ˈbhlʋa aˈ klɛɛ ˈˈkpe -jha. Biiblʋ ˈnaan:

• “Ɲʋn ˈsrɛa aˈˈ ʋa muɛn i -siie- ˈˈdhe ˈflɛ ɛɛ muɛn i -gbaa.”—Psaume 72:7.

• “Ɔɔ muɛn ɲʋn sea dhɛ ˈbhle -ʋa- ˈbɔan sʋnbhopoɛ- i -e ɲɔn ɲʋn an ˈˈduaˈˈ ˈkle -e ɲɔn sea sʋnbhopoi- ˈbhle zeie-.”—Psaume 72:12, 14.

ˈZɩan an, dhɩ Zezi ɔɔ tɔɔan ɲʋn ɛn, ɩan nʋɛnˈ ɲʋn anˈ mliɔn ˈye ˈbhlʋɩ aˈ 239 ˈdhii ˈghwlʋ ʋʋ ˈye -da dhueˈ ˈkpa ˈdhe ghwluiˈ ˈŋwɔɔɛn- ˈmʋn. -Ka ʋʋ ˈyea ˈflɛ ˈmʋn inˈ -de sʋn nʋn ɛn, ɛmɛn- Zoova aˈ -Bobhlaʋn nɩan ˈbhlʋɩ ˈdhii da ˈbhlʋa aˈ klɛɛ ˈˈkpe ˈcɩan. -Ka ʋa nʋan ɛɛˈ nʋn sʋn -bho -ˈyeɛ i ˈŋwɔn ɔnˈ, -mɛnˈ zro La Tour de Garde -ɛɛˈ ˈˈdhru nɩan “Briser le cercle de la haine” ˈdhii.