ˈDhe zɩn anˈ 50 zia ˈdhi ɛ, ˈkwladhinmiian -cɛn ˈˈkpe. ˈBho 100 ˈˈkpe ɛ, 27 -sie ˈo. Dhɛwɛ- Biiblʋ a ˈtmʋn -ɛn?

ˈDhe 2024 zʋn anˈ ˈˈgulacʋ- -klaaˈˈ aˈ ˈghwɩ 9 ˈˈkpe ɛ, Fonds mondial pour la nature (WWF) ˈnaan, dhɩ -glɔɲiɔn ɔn nʋan an nʋɛn ˈkwla -e nmiian dhɛsaʋn- ˈˈdhrui. Dhɛ ʋʋ ˈtmʋan ɛ ka: ˈDhe zɩn anˈ 50 zia ˈdhi ɛ, dhɛ ɛ ˈdha -mɛn -nɩn -ɛ ˈghwlʋa ˈe 1970 zʋn ˈdhi -ɛ -jɛɛa 2020 zʋn ɛn, ˈkwladhinmiian -cɛn ˈˈkpe, ˈbho ɩanˈ 100 ˈˈkpe ɛ, 27 -sie ˈo. ˈˈDhe ʋʋ de ˈo ʋʋ ˈnaan: “Dhɩ ɲʋn an muan -nʋn ˈdhe -zɩn -mmˈˈ -ɩan- jhia ˈdhi ɛ, ɩmɩn- -ˈyeɛ nʋn -wɛeˈ nmiian ˈye ˈkmʋn -nɩn da ˈbhlʋa ˈˈkpe -aeˈˈ ɩn ˈse ˈkmʋn -nɩn in.”

-Bho ɲʋn anˈ -da -duuˈˈ ˈŋwɔn ˈˈkunan nɔn ɔnˈ, ʋaˈ -pɛɛ ɛ ˈˈghweeˈ. -A -kman -aaˈ ˈbhlʋa ˈdhɔɛeˈ nɔn ɔnˈ dɩ ˈˈdhe nmiian anˈ ˈkle ˈˈduɛ ɛ kpʋɛn -aʋ -glʋˈ. -Bho ɛ kpʋn -aʋ -glʋˈ ɛˈ, ɛ se dhɛsaʋn- -nɩn, dhɛbhleɛ, Ɲɔnsoa nʋn -aʋ ˈmɛn -wɛeˈ -a ˈye nmiian anˈ dɩ ˈˈdu.—Genèse 1:27, 28; Proverbes 12:10

Ɛgwɛ aʋa deeɛ aʋaˈ ˈˈjɛ i: ‘-A ˈbhɛɛˈ ˈmɛn ˈjɛɛn- -a ˈye nmiian anˈ dɩ ˈˈdu? Dhɛwɛ- Biiblʋ a ˈtmʋn -ɛn?’

ˈKmʋn an muɛn ˈdhɔɛeˈ -nɩn ˈdhe ɲan

-Ka -a ˈjhe -a nʋn ɛnˈ, -bho nmiian ˈye ˈkmʋn -nɩn ˈdhe ɲan -aeˈˈ ɩn ˈse ˈkmʋn -nɩn in ɛnˈ, ɛɛˈ dɩ se ˈdhe -a ˈkwa -nɩn, ɩn nɩɛn ˈe Ɲɔnsoa ˈkwa. Dhɩˈkwla-Zaghwlu 11:18 ˈnaan, Ɲɔnsoa a muɛn “ɲʋn -an ˈkɔɔa ˈbhlʋa i -za.” Biiblʋ aˈ ˈˈjhriɛ- nɛn ɛn ˈtɔɔn -abʋ dhɩ ˈsɔɔn:

1. Ɲɔnsoa ˈse ɲʋn in ˈˈtai- dhi ʋʋ ˈse ˈbhlʋa i za i ˈpepeˈ.
2. Ɲɔnsoa a muɛn -nʋn ˈdhe nɔnˈˈ dhɛzaanˈˈ- ˈdhi. Ka -a nʋn ɛnˈ jhibho- sʋn -ɛn? Dhɩ -duuˈˈ -glɔɲiɔn ˈbhle zɩanˈ -ɩn ˈbhɛɛ -ɩn ˈye ˈkwladhinmiian i -za.

-Kawɛ Ɲɔnsoa ˈye nʋn -wɛeˈ ɔ ˈye dɩ nɩn -taˈˈ po -ɛ? Ɔɔ muɛn ɔɔˈ -Glibha nɩan ˈe jhaʋn ˈdhi ɲʋn an ˈdhaa ˈBheɔglɔ -ke i jhii -wɛeˈ ɔ ˈye ˈbhlʋa ˈbhle. (Matie 6:10) Ɲʋn ˈbhle -glibha -ˈnɔn ɔn muɛn ɲʋn -an ˈjhea Ɲɔnsoa ŋwɔn sʋn bho -po -wɛeˈ ʋʋ ˈye nmiian anˈ dɩ ˈˈdu ˈˈdhe ʋʋ ˈyɩ ˈdhei -fuo.—Isaïe 11:9.