Dhbho -wɛ kpɔ ˈˈzaan anˈ ˈˈjhriɛbhoduʋn an nʋn -ɛn?

Biiblʋ a ˈfɔ -ˈcrea ˈdhe Glɛkɩ ghlu ˈdhi ɛ, ɔɔ ˈtmʋɛn Pɔʋ -e Banabasɩ -e, ʋaˈ dɩ kpɛ -duuˈˈ. Ʋʋ -nɩɛn- ˈˈjhriɛbhoduʋn- -ʋa- jhii ɲɔnsoagbi ˈdhii ˈdhe-. Dhɛɛdɩ- ʋa jhii ɲɔnsoagbi ˈdhii -ɛ? Ʋa naan ʋaˈ ˈdhoudhi -ˈˈwe aˈ ɲɔnsoadhɛ ˈˈjhriɛ bho. Pɔʋ ɔˈ ˈˈjɛ ˈnaan ɔɔ ˈbɔn ɔ ˈye ‘ˈdhoudhi -ˈˈwe bho i-jhii’ -wɛeˈ ɔ ˈyʋbʋ ˈjhe. Ʋaˈ ˈkpɩ -poɛ- ɛˈ dɩ ɛ, ɔ nan- kilo ɔˈ ˈˈghluu -ghluu ˈmʋn ˈmɛn. (Nʋʋdhɩ- 15:36) Ɛmɛn- -aaˈ ˈˈjhriɛbhoduʋn- -an jhiia gwlɛ ˈdhii ɛ, ʋa nʋn ˈzɩan -ke.

Ʋa jhi -aʋ ˈkpɩ poaˈ. Kpɔ ˈˈzaan anˈ ˈˈjhriɛbhodui ɔ jhiiɛ ɲɔnsoagbi aˈ 20 ˈdhii, ɩn ˈbhɛɛˈ ɛ ˈye ˈo izi. Ɔɔ jhiˈ kpɛ ˈsɔɔn ˈdhe zʋn ˈdhi. -Bho ɔ jhi ɛˈ, ɔɔ nʋɛn ˈdhɔɔ dhueˈ. -Aa -ˈcɩaan ˈdhoudhi -ˈˈwe -ˈnʋn dhɩ -duuˈˈ ˈˈbun. -Bho ʋʋ ˈbhle ˈɲnɔn ɔnˈ, -aa -ˈcɩaan ʋaˈ ˈɲnɔn dhɛ ˈˈbun -ke. Ʋa poɛ ˈe ˈkpɩ ʋa yea mɩɩnˈˈ -e klaeˈˈ aˈ jhibhɛ ˈcɩan. Ʋʋ nɩn- -aa muɛn -bobhlaaˈ -ke, -a -nɩn ɲʋn an yea Biiblʋ ˈcɩan. Ɛɛ nʋn ʋbʋ ˈtʋn. -Bho ˈˈJhriɛbhodui jhi ɛˈ, ɔmɔn -e ɲankɔʋn an muɛn ˈdhoudhi -ˈˈwe ˈjhea ŋmɛinˈˈ ˈdhii ˈˈdhe ʋa pʋbʋ ˈkpɩ. -Bo ʋa bhla ˈdhe ˈˈdhruigboɛ- mɩɩnˈˈ -e klaeˈˈ ˈmʋn ɛn, ɔɔ poɛ -aʋ- ˈkpɩ.—Nʋʋdhɩ- 15:35.

Ʋa ˈˈduɛ ɲʋn anˈ klɛɛ ɛˈ dɩ. Ɲʋn nɩan ˈe ɲɔnsoagbu ˈdhi ɛ, ˈˈjhriɛbhoduʋn an naan ʋaˈ ɲɔnsoadhɛ ɛˈ dɩ tɔˈ i ˈjɛɛn-. Ʋbʋ -e ɲɔnkɔʋn- -e ˈsɔɔnpoʋn- an ˈbhleɛ ˈŋmʋʋɛn- ˈˈdhe ʋa ˈˈdu ʋbʋ ˈsrɩn -ka ʋʋ ˈyea ʋaˈ dhbho ɲan kpa -kajɔɔnka a. Ʋa poɛ -jezaʋn- sʋn bho -wɛeˈ ʋaˈ dhbho ˈyʋbʋ kwai ˈghlʋ. Ɲʋn -ˈkpa -bobhlaʋn- dheeˈ ˈmʋn -ke ɛ, ʋʋ -kman ʋaˈ dɩ, -ka ʋaˈ ɲɔnsoadhɛ ɛˈ dɩ ˈpɛan an, ʋa ˈbɔn ʋʋ ˈyeɛ jhibho-. Ʋaˈ ˈdhoudhi tu ɛ, ʋa za ʋaˈ ˈˈjɛ ˈkwla ʋa yea dhɩ nʋn -ka ‘dhbhonʋn- -bhao-’ nɩan an, -aaˈ dɩ. (2 Kolɛntɩ 8:23) -A -ˈye ʋaˈ dhɛgwlɩdeɛ- -e ʋaˈ ˈbho Ɲɔnsoa ˈˈbun i-kpʋɛn- -sraan.—Eble 13:7.

• Dhɛɛdɩ- kpɔ ˈˈzaan anˈ ˈˈjhriɛbhoduʋn an jhii ɲɔnsoagbi ˈdhii -ɛ?

• Ka -ˈye nʋn -wɛe -bho ʋʋ jhi ˈo -manˈ ɲɔnsoagbu ˈdhi ɛˈ, ɛ ˈye ˈo dhɛ po ˈdhe -manˈ ˈkmʋn ˈdhi -ɛ?