ˈBho- -gwlɩˈˈ ˈdhe, -ɛ -nɩn ˈe Biiblʋ ˈdhi -ɛ?

DHƐ BIIBLƲ ˈTMƲAN Ɛ KA

‘ˈCreedhɩ a klɛɛ -nɩɛn- Ɲɔnsoa aˈ ghwlu.’​—2 Timothée 3:16, Traduction du monde nouveau.

-BHO DE GHLU NƲN -GWLƖˈˈ Ɛˈ, DHƖ -ˈYEA ˈO ˈJHEE-

ˈKmʋn ˈˈkpe -dɩ klaeˈˈ aˈ iˈŋwɔnsʋn- ˈjɛʋn-.​—Proverbes 2:1-5.

-Nansʋn- ˈjɛʋn anˈ jhibhɛ- -zɔn ˈˈoo -zɔn.​—Psaume 119:105.

ˈDhe ˈkmʋn anˈ ɲan anˈ -pɛɛ ˈˈɩ -tbhaa.​—Romains 15:4.

DHƐ BIIBLƲ ˈTMƲAN AN, -A -ˈBHEƐˈ -A -ˈYEƐ -GWLƖˈˈ DE ˈJƐƐN-?

Ɛɛn, dhɩ aˈ kpɛ taan nɩn anˈ dɩ:

• -Ka ʋanˈ ˈtmʋʋndɩ aˈ klɛɛ ˈyea -je dhueˈ kpa a, ɲʋn seɛ -gwlɩˈˈ de -dhe. Ɲʋn anˈ 40 -ˈcre Biiblʋ ˈdhe zɩn anˈ 1.600 ˈdhi. Ɲʋn -ˈnʋn anˈ -da -duuˈˈ ˈse bha ˈˈjhriɛ tbha dhueˈ. ˈˈDhe dhɩ aˈ klɛɛ ʋʋ ˈcrea -ɩn nɩan ˈe ɛɛˈ ˈsɛɛ- tu ˈdhi ɛ, ɩan kpa -je dhueˈ. Dhɛ dhueˈ gbai ɛˈ dɩ ɩan ˈtmʋn!

• -Bo ʋan bhla -nɩɛn- tɔˈdɩ-. Ɲʋn -ʋa- bhla ʋaˈ ˈˈbhliɲʋn anˈ tɛnˈˈ bo ɛ, -bho ʋa sɔ bhla -wɛeˈ ʋʋ ɲnin ɔɔˈ -da ʋaˈ ˈcɛ -vɔan ˈˈdhe ɲʋn -zii ʋbʋ ŋwɔn ɔnˈ, ʋa ziiɛ ˈbhomɔnˈ ˈˈkpe. Ɲʋn -ʋʋ -ˈcrea Biiblʋ ˈse ˈan nʋn. Dhɩ ʋaˈ ˈˈjɛ nʋan -ɩn sea ˈˈɩˈsrɛ -e ʋaˈ ˈcɛ ɛˈ nɩn -e, ʋʋ ˈsɩ i ˈˈdu.​—2 Chroniques 36:15, 16; Psaume 51:1-4.

• Dɩ -zaa ɲan -ɩn -ˈtmʋan ˈdhe ʋn ˈdhi ɛ, ɩn -nɩɛn- tɔˈdɩ-. Babilɔnɩn -glɔ -soa- ˈyea izaa- a, Biiblʋ- siɛ zɩn anˈ 200 ɲan ʋn yɩ ˈtmʋn. (Isaïe 13:17-22) Ʋn ˈse ˈo Babilɔnɩn glɔ ɔˈ kpʋnsʋn bho ˈˈtii-. Ʋn munˈ -kenɛnˈ ˈsʋ tʋvɔin- klaaˈˈ -ˈyea -glɔ -ˈnɔn kpʋn ɛn, ʋn yeɔ ˈɲnɩn ˈˈsi!​—Isaïe 45:1-3.

  Dɩ -duuˈˈ -ˈnɩɩn Biiblʋ -zaa ɲan ʋn ˈtmʋn -ɩn ɲnin ˈo -ka ɩn nʋan ˈtmʋɛn- sʋn -gba. Ɩanˈ dhɛ dhueˈ ka ˈse ˈbhlʋɔ -sie-. Ɛ se dhɛ ɲʋn -deea Ɲɔnsoa aˈ Ghlu -glwɩˈˈ ɛ?​—2 Pierre 1:21.