Zedeɔn kpa tʋ aˈ ˈˈdhru ˈbho Madiankɔʋn ˈˈkpe

Nɔnˈˈ pla zia, Israɛkɔʋn ˈbhɔ Zoova a ˈˈɲɩn dɩ ˈmɛn -kenɛnˈ. Ʋʋ -dee gɩlɩ ˈsrɩ aˈ ˈˈɲɩanˈˈ ˈmɛn. ˈDhe -zɩn -ˈˈmɛsɔnˈ ˈdhi ɛ, Madiankɔʋn ˈˈjhriɛˈˈ Israɛkɔʋn anˈ -nɩnandhɩ ˈˈdhe ʋʋ ˈkɔɔ ʋaˈ dhiidhɩ ʋʋ za ˈe gleˈ ˈmɛn. -Ka Madiankɔʋn -saaˈ ʋbʋ dhɛsaʋn ˈˈdhrui nʋn ɛn, Israɛkɔʋn an pa ˈe ˈseɩˈˈ -klaeˈˈ zɔnˈ ʋa yea ˈˈman ɛmɛn- -e ˈdhe trɩ ˈdhi -ke. Ɛ ˈyea ˈo ˈbhɔɔ- ɔ, ʋʋ bhae- Zoova ˈmɛn ɔ ˈyʋbʋ sʋn bho po. ˈˈDhe Zoova dhbho dhbhoozuu- dhueˈ ˈdhe ˈˈjhu dhueˈ ɲɔn ɔn ˈdhaa Zedeɔn bho. Dhbhoozuu- ˈnaan: ‘Zoova -za ˈo mʋn ˈmɛn -wɛeˈ -ˈye tʋvɔin- -klaaˈˈ -nɩn.’ Zedeɔn deeɛ- dhbhoozuu- i ɔ ˈnaan: ‘-Kawɛ ˈɩn ˈbhɛɛ ˈye Israɛkɔʋn ˈpʋʋ- -ɛ? ˈƖn se dhɛ ˈdha.’

-Ɛ ˈye Zedeɔn sʋn bho po -wɛeˈ ɔ ˈyeɛ -gwlɩˈˈ de -ka ɛ nɩan Zoova -zɔ ˈo -ɛ? Ɔ ˈˈdhuɛ- ˈbhlaa aˈ ku ˈmʋn -wɛeˈ ɔ srʋ ˈbho ˈbhlʋɔ- ˈˈdhe ɔ -ghwlu ˈe Zoova bho ɔ ˈnaan: ‘-Glaeˈˈ ɔˈ -drʋʋn pɛɛn, -bho drʋʋn pa ˈbhlaa aˈ ku ˈmʋn ˈˈdhe ʋn ˈse ˈbhlʋa ˈmʋn pa aˈ, ˈman muɩn jhɩbho- -ka -man ˈbɔan ˈyea Israɛ ˈpʋʋ- ɛ.’ Zɔn zɩan ˈsʋ ɛ, drʋʋn pa ˈbhlaa aˈ ˈku aˈ klɛɛ ˈmʋn ˈˈdhe ʋn ˈse ˈbhlʋa ˈmʋn pa! ˈKlaa Zedeɔn ˈnaan -bho zɔn -ˈnɔɔn zɩn ɛnˈ, -ˈmɛn drʋʋn an pa ˈbhlaa aˈ ˈku ˈmʋn -dhe ˈˈdhe ʋn ˈye ˈbhlʋa ˈmʋn pa. Ɛmɛn- -nʋʋɛn -ˈjaa. Zedeɔn deɛ -gwlɩˈˈ ˈmɛn -ka ɛ nɩan Zoova -zɔ ˈo ɛ. ˈSʋ ɔ gbooɛ- ɔɔˈ ˈsʋlɩˈˈ i -wɛeˈ ʋʋ ˈye Madiankɔʋn bho vɔn.

Zoova -ghwluɛ- ˈe Zedeɔn bho ɔ ˈnaan: ‘ˈMan muɛn nʋn Israɛkɔʋn ˈye tʋ aˈ ˈˈdhru kpa. ˈKlaa dhɛ aʋ ˈbhlea ˈsʋlɩˈˈ -duuˈˈ ɛ, aʋ ˈbhɛɛˈ aʋ ˈye ka nʋn aʋaˈ ˈˈɩkman- nʋɛn -wɛeˈ aʋ kpa tʋ aˈ ˈˈdhru. ˈTmʋʋn ɲʋn -faʋn an nʋan ʋʋ ˈye ŋmɛinˈˈ mun.’ ˈˈDhe ˈsʋlɩˈˈ aˈ 22.000 mun ˈdhe ʋbʋ ˈˈŋwɛn dhe, -wɛeˈ ʋaˈ 10.000 -sie-. ˈSʋ Zoova ˈnaan: ‘ˈSʋlɩˈˈ -ˈnʋn -diɛˈˈ -kenɛnˈ. Kpʋbʋ ˈbho ˈˈninghwloˈ -ɔɔ zia -gwlɩˈˈ -ˈmɛn ˈtmʋʋn ʋbʋ ʋʋ ˈye ˈˈnin ˈnan. Ɲʋn -ʋa- muan ˈˈnin ˈnan- -wɛeˈ -ʋʋ ˈyea ʋaˈ ˈˈjɛ ˈdhei ŋmʋʋn- -bho ʋaˈ ˈmʋɲɛʋn se ˈo -nɩn ɛnˈ, ʋbʋ- -ˈye ˈmʋn ˈˈdhuo-.’ Ɲʋn anˈ 300 ˈgbai -ʋa- ˈnan ˈˈnin -wɛeˈ -ʋa- -ŋmʋʋn ʋaˈ ˈˈjɛ ˈdhei. Zoova cɛn ghwlu ɔ ˈnaan ɲʋn -ˈnʋn ɛn, ʋbʋ a muɛn tʋ aˈ ˈˈdhru -kpa ˈbho Madiankɔʋn anˈ ˈsʋlɩˈˈ nɩan 135.000 ˈˈkpe.

ˈDhe ˈˈmaʋn -glu -ˈnʋn ˈdhi ɛ, Zoova -ghwluɛ- ˈe Zedeɔn bho ɔ ˈnaan: ‘Nɔnˈˈ ɲninˈ -wɛ bhla -wɛeˈ -ˈye Madiankɔʋn tʋ ˈˈbhli kpa!’ Zedeɔn ˈˈɲɩɛnˈˈ ɔɔˈ ˈsʋlɩˈˈ -vuɔˈ -e -jhae -klaeˈˈ -dai nɩn ˈe ˈdhi. Ɔ -ghwluɛ- ˈe ʋbʋ bho ɔ ˈnaan: ‘Aʋ -ŋmʋn ʋn ˈjha ˈˈdhe -ka ˈman muan nʋn ɛn, ˈkamɔn- aʋ ˈye nʋn.’ Ɔ bhla -vuɔˈ, ɔ -ghwaa- ɔɔˈ -jhae dhi, ɔ ˈˈvuan- -dau dhi ˈˈdhe ɔ ˈˈghwɔ: ‘Zoova -e Zedeɔn ɔnˈ -blaajrɛnˈ!’ Dhɛ nɩan dhueˈ -mɛn ɔɔˈ ˈsʋlɩˈˈ nɩan 300 nʋn -ke. -Faʋn- kpʋn Madiankɔʋn ˈmɛn ˈjɛɛn- ˈsʋ ʋʋ ˈkpa ˈkwlɩ ˈdhii. -Jɛn ʋʋ ˈkpa ˈˈsa ˈdhi ˈsʋ ɛ, ʋʋ -dee -vɔanˈ ˈmɛn ˈbho ʋaˈ ˈsʋ ˈɲnɩn. Zoova poɛ Israɛkɔʋn sʋn bho -kenɛnˈ, ʋʋ ye tʋ aˈ ˈˈdhru kpa ˈbho ʋaˈ ˈmʋnɲɛʋn ˈˈkpe.