Anɩn an bhaeˈ -wɛeˈ ʋn ˈye ˈˈjhuɲmau- ˈghwlʋ

Israɛkɔin- dhueˈ -ɔɔˈ ˈɲnɩn nɩan Ɛlɩkana a, ɔ ˈbhleɛˈ ˈɲnʋnkpaeˈ ˈsɔɔn, Anɩn -e Penina -e. ˈKlaa Anɩn ɔɔ ˈbɔn ɛ -zii Penina. Penina ˈbhleɛ ˈˈɲnuun -duuˈˈ ˈklaa Anɩn anˈ ˈghwlʋ ˈˈjhu. Ɛɛˈ dɩ ʋan ghwlaa Anɩn nɔnˈˈ ooˈˈ nɔnˈˈ. ˈDhe zʋn ooˈˈ zʋn ˈdhi ɛ, Ɛlɩkana -e ɔɔˈ ˈˈgbuzɔncɛ ɛ muɛn Silo ʋa yea Zoova ˈˈɲɩn ˈdhe ɔɔˈ -pooˈˈ ˈdhi. Ʋʋ nɩan ˈe -zɔn dhueˈ ˈsʋ ɛ, ɔ deɛ ˈˈjhriɛ ˈˈkpe -ka Anɩn ˈˈzrua. Ɔ ˈnaan: ‘Anɩn, aaˈ ˈˈvɩɩn -dhe. ˈƖn -nɩn da ˈmɛn. ˈˈDhe ˈɩn -kman aaˈ dɩ.’

Nɔnˈˈ pla zia, Anɩn muɛn ʋanˈ ˈfɔ bho ʋan yea bhae. Ʋan ˈˈvɩɩnˈ ʋan yea Zoova bhae ɔ ˈyʋ sʋn bho po. Ʋn cɛn ghwlu ʋn ˈnaan: ‘Zoova, -bho ˈˈɲɩn ˈʋn ˈˈjhuɲmau- ɛˈ, ˈman muɔn ʋn ˈˈɲɩn- ɔ ˈye -manˈ dhbho nʋn ˈdhe ɔɔˈ ˈkmʋn anˈ klɛɛ ˈdhi.’

ˈSraazai- -klaaˈˈ Eli ˈjhe Anɩn ˈmɛn ʋan yea ˈˈvɩn. ˈBho ɔ -gwlɩˈˈ -dhe ɛ, ʋn ˈnan nɩmɔn -duuˈˈ. Anɩn -ghwluɛ- ˈe ɔ bho ʋn ˈnaan: ‘ˈˈƖɩn-, ˈman ˈbhlei-, nɩmɔn ˈse ˈʋn nʋn. ˈKledɩ- -kman anˈˈ ˈɩn ˈbhlea, ɩmɩn- anˈ dɩ ˈman ˈtmʋʋn Zoova.’ Eli ˈjheɛ ˈˈkpei -ka ɔ zia dhɛˈˈ ɛ, ɔ -ghwluɛ- ˈe ʋn bho ɔ ˈnaan: ‘Zoova ˈˈɲɩaʋn dhɛ aa ˈbɔan.’ Anɩn anˈ -pɛɛ bhluˈ ˈˈdhe ʋn ˈkpa ˈo ˈmɛn ʋn ye mun. ˈDhe -zʋn nɩan dhueˈ ˈdhi ɛ, ʋn ˈghwlʋɛ ˈˈjhuɲmau- ˈˈdhe ʋn ˈdhɔɔ Samiɛ. -Naan tɔˈ i ke aˈ: Ɛgwɛ ˈmʋnan an ˈnʋn -dhe ˈjɛɛn-, ɛ seɛ -mɛn?

Ghwlu ʋn cɛan ˈdhe Zoova bho ɛ, ʋn ˈsʋ bho ˈˈmae-. Ʋn -za Samiɛ ɲɩɛn ŋwɔn, ʋn kpɔ ˈdhe Ɲɔnsoa aˈ -pooˈˈ ˈdhi -wɛeˈ ɔ ˈye Zoova aˈ dhbho nʋn. Ʋn -ghwluɛ ˈe Eli bho ʋn ˈnaan: ‘Ɛ ˈˈjhuɲmau- -ɔ dɩ ˈɩn bhaea -dhe ɛ. ˈMan ˈˈɲɩɔnˈˈ Zoova ˈdhe ɔɔˈ ˈkmʋn anˈ klɛɛ ˈdhi.’ ˈDhe zʋn ooˈˈ zʋn ˈdhi ɛ, Ɛlɩkana -e Anɩn a muɛn Samiɛ ˈjheea -wɛeˈ ʋan ˈˈɲɩɔnˈˈ -flaeˈ sea sɩn ˈbhle. ˈBho ɛ ˈdhe ɛ, Zoova nʋɛnˈ Anɩn ye ɲmai -ɲnuun- taan -e ˈɲnʋnkpaeˈ -ɲnuun- ˈsɔɔn ˈghwlʋ.