Davidɩ -e Goliatɩ

Zoova -ghwluɛ ˈe Samiɛ ˈbho ɔ ˈnaan: ‘Mun ˈe Zese ˈˈŋwɛn. Ɛ nɩn ɔɔˈ ˈˈɲnuun -ɲmai aˈ dhueˈ -ɔ ˈye ˈbheɔ -nɩn ˈbho Israɛkɔʋn ˈˈdhru.’ ˈSʋ Samiɛ mun ˈe Zese ˈˈŋwɛn. Ɔ ˈjhea ɔɔˈ ɲankɔn -jhu ɛ, ɔ -ghwlu ɔ ˈnaan: ‘ˈƖn ˈjheanˈ ˈmɛn ɔmɔn- -ˈye ˈbheɔ -nɩn.’ ˈKlaa Zoova -ghwluɛ ˈe Samiɛ bho ɔ ˈnaan ɛ seɔ -nɩn. ˈˈDhe Zoova ˈnaan: ‘ˈMan ŋmʋɛn ˈe ɲɔn ɔnˈ -pɛɛ bho ɛ se ɔɔˈ ɲiɔjhoɛ ɛˈ ˈsʋ ˈman ŋmʋn jha -nɩn.’

Zese -jha ɔɔˈ ˈˈɲnuun -ɲmai -ˈnʋʋn nɩan -mɛoˈˈ- ˈmɛn. ˈKlaa Samiɛ ˈnaan: ‘Zoova ˈse ˈo ʋaˈ ɲɔn dhueˈ -za. Se ˈˈjhu -ɲmau -ˈnɔɔn ˈbhle?’ Zese ˈnaan: ‘ˈƖn ˈbhleɛ ˈˈjhu -dhee -ˈnɔɔn, ˈman dhebhɔɔ- -jhu, Davidɩ. Ɔ -nɩɛn ˈe ˈkwla i, ɔɔ fuɛ ˈbhlaeˈ ˈdhei.’ Davidɩ jhia ˈsʋ ɛ, Zoova -ghwluɛ ˈe Samiɛ bho ɔ ˈnaan: ‘Ɛ nɩɔn -mɔn.’ ˈSʋ Samiɛ poɛ Davidɩ ˈcran ˈˈdhru, -wɛeˈ ɔ ˈyeɛ -to -ka ɛ nɩan ɔmɔn- -ɔ ˈyea Israɛkɔʋn anˈ ˈBheɔ -nɩn ɛn.

Nɔnˈˈ pla zia ˈsʋ ɛ, Israɛkɔʋn muɛn tʋˈ -vɔanˈ ʋbʋ -e Filisikɔʋn -e. Filisikɔʋn ˈbhle tʋvɔin klaaˈˈ dhueˈ -ɔ -tɛn jha. Ɔɔˈ ˈɲnɩn -nɩn Goliatɩ. Zɔn ooˈˈ zɔn ɔɔ ghwlaa Israɛkɔʋn ˈmɛn. Ɔɔ ˈˈghwɔ ɛ ˈˈjhai ɔ ˈˈnaan: ‘Aʋ ˈbɔn ɲmau- dhueˈ ɔ ˈye jhi ɔ -nɩn ˈye vɔn. -Bho ɔ bhla ˈʋn ɛnˈ, -aa ˈkpa aʋaˈ -kʋɔnbʋ-. ˈˈDhe -bho ˈɩn bhlɔ ɔˈ, aʋbʋ- -ˈye -aaˈ -kʋɔnbʋ ˈkpa.’

Davidɩ jhiɛ ˈdhe Israɛkɔʋn anˈ ˈsʋlɩˈˈ aˈ kamanˈ ˈdhi. Ɔ -jha ɔɔˈ ˈdhoudhi -ˈˈwe dhiidhɛ, dhɛ nɩan ˈo ɛ, ʋʋ -nɩɛn- ˈsʋlɩˈˈ -dhe. Ɔ ˈŋwɔan dɩ Goliatɩ ɔ ˈtmʋan ˈsʋ ɔ ˈnaan: ‘ˈMɔn- -nɩn ˈˈbho nɔn ˈye vɔn.’ ˈBheɔ Sailɩ ˈnaan: ‘-Nɩɛn- ˈˈjhu ˈˈzaan.’ Davidɩ -ghwluɛ- ˈdhe ɔ bho ɔ ˈnaan: ‘Zoova a muɛn ˈʋn sʋn bho -po.’

Sailɩ ɔɔ ˈbɔn Davidɩ ˈye ɔɔˈ tʋ -vɔn -mʋnpaadhɩ ˈmʋn -paa -dhe, ˈklaa Davidɩ ˈnaan: ‘-Bho ˈɩn -paa ɩ ˈmʋn ɛnˈ, ˈɩn se ˈbhɛɛ- ˈye vɔn.’ Ɔ ˈˈdhuɛ- ɔɔˈ vli -souˈˈ ˈmʋn -wɛeˈ ɔ mun ˈo ˈˈnin -gwlɩˈˈ. Ɔ ˈcra ˈseɩˈˈ -mmˈˈ in ɔ po ˈdhe ɔɔˈ -glɛuˈˈ ˈdhi. ˈSʋ ɔɔ ple ɔɔ yea Goliatɩ ˈˈɩ mun. ˈGbaklaoˈ -ˈnɔn -ghwluɛ- ˈdhe ɔ bho ɔ ˈnaan: ‘Jhi da ˈˈjhu ˈˈzaan-. -Wɛeˈ nɩmɩn- -e nmiian nɩan ˈe ˈkwla ˈzɔn ˈye -manˈ ˈˈku dhi.’ ˈKlaa -faʋn ˈse Davidɩ nʋn. Ɔ -ghwluɛ- ˈdhe ɔ bho ɔ ˈnaan: ‘-ˈBhleɛ -jrɛnˈ, -ˈbhleɛ ˈˈdhi -wɛeˈ -man jhi ˈmʋn ˈˈɩn, ˈklaa ˈmɔn ɔn, ˈdhe Zoova aˈ ˈɲnɩn ˈmʋn ˈman jhi ˈdhee- bho. Ɛ se -abʋ -nɩn -man vɔn -nɩn, ɛ nɩn Ɲɔnsoa -nɩn -man vɔn. Ɲʋn anˈ klɛɛ ɛɛ muɩn jhibho- ˈzɩan -ka Zoova ˈbhlea ˈˈɩkmaan- ɔ -ziia -jrɛnˈ -e ˈˈdhi ɛ. Ɔɔ muɛn -nʋn -a ˈye tʋ aˈ ˈˈdhru kpa.’

Jaaˈˈ -jaa Zoova poɛ Davidɩ sʋn bho. Davidɩ poɛ ˈsouˈˈ dhueˈ ˈdhe ɔɔˈ vli -souˈˈ ˈdhi ˈˈdhe ɔ ˈˈvilɛˈ ˈdhe ɔɔˈ ˈkpɩ aˈ klɛɛ ˈmʋn. ˈSouˈˈ -ˈnʋn ˈmun ʋn bhla ˈo Goliatɩ ɔˈ ˈˈjhibha aˈ ˈˈpɛ ˈˈkpe ʋn ˈye ɔɔˈ ˈˈdhru ˈmʋn ɲman. ˈGbaklaoˈ -ˈnɔn gai ˈbho ˈbhluɔ- ɔ ˈmɛɛn. Filisikɔʋn -dee pleaˈ ˈmɛn. ˈˈDhe -mɔn ˈdhe, de Zoova -gwlɩˈˈ ˈmɛn -ka Davidɩ dea Zoova -gwlɩˈˈ ɛ?