Zonatan: Ɔɔˈ -pɛɛ kuɛi ˈˈdhe ɔɔ kpʋɛn ˈo ɲʋn ˈˈbun in

Zonatan nɩan Sailɩ ɔˈ ˈˈjhu -ɲmau kɔan ɲan an, ɔ -nɩɛn- tʋvɔin- -ɔ -pɛɛ kui. Davidɩ ˈnaan ɔɔ ˈˈdooˈ ɔ ye jiiˈˈ -zii ˈˈdhe ɔ -kmanˈˈ ɔ ye -blaa -zii. -Zɔn dhueˈ ɛ, Zonatan ˈjheɛ Filisikɔʋn anˈ ˈsʋlɩˈˈ ˈbho trʋ dhueˈ ˈˈkpe. ˈSʋ ɔ -ghwluɛ- ˈdhe ɲɔn -ɔ ˈbhlea ɔɔˈ poodhɩ kwa bho ɔ ˈnaan: ‘-Bho -a ˈyʋbʋ tʋ ˈˈbhli kpa aˈ, Zoova ˈye dhɛ nʋn -ɛ ˈyeɛ -to -mɔnˈ ke’. -Bho Filisikɔʋn ˈnaan -a ˈjha aˈ, -ˈmɛn -aa muin jhibho- -ka -a ˈyʋbʋ tʋ ˈˈbhli kpa. ˈSʋ Filisikɔʋn ˈˈghwɔɔˈ ˈdhe ʋbʋ bho ʋʋ ˈnaan: Aʋ jhi -a ˈye vɔn! -Ʋʋ nɩan ˈsɔɔn ˈjha trʋ ˈmɛn ʋʋ -nɩn Filisikɔʋn anˈ ˈsʋlɩˈˈ nɩan ɲʋn anˈ 20 ye vɔn ˈˈdhe ʋʋ kpa tʋ aˈ ˈˈdhru ˈbho ʋbʋ ˈˈkpe.

Dhɛ Zonatan nɩan Sailɩ ɔˈ ɲankɔn- jhu ɛ, ɔmɔn- -ˈye ˈbheɔ ˈkpa -dhe ˈbho Israɛkɔʋn ˈˈdhru -bho ɔɔˈ ˈˈbho ˈghwlʋ ˈo ɛˈ. ˈKlaa ɔ jhibhiˈ -ka Zoova za ˈo Davidɩ ɔ ˈyea ˈbheɔ -nɩn ɛn. -Bho ɛ -nɩn kaˈ mɔn -dhe ɛˈ, ɔ ˈse Davidɩ -ˈgwlɛn bho nʋn. Zonatan -e Davidɩ ˈkpa dhaiˈˈ -ˈˈwe. Ʋʋ cɛn ghwlu ˈdhe bha bho ʋʋ ˈye bha ˈdhei -fuo- ˈˈdhe ʋʋ ˈye bha bho ˈghwlʋ. Zonatan ˈyeɛ -to -ka Davidɩ nɩan ɔɔˈ dhaiˈˈ ˈjɛɛn ɛn, ɔ ˈˈɲɩɛnˈˈ Davidɩ ɔɔˈ ˈmʋnpaadhɛ -e ɔɔˈ -jrɛnˈ -e ɔɔˈ plʋsɩn -e ɔɔˈ ghwlʋ.

Davidɩ ɔ plea -wɛeˈ Sailɩ -sɔˈ dhɛsaʋn ˈˈdhrui nʋn ɛn, Zonatan jhiɛ ˈdhe ɔ bho -wɛeˈ ɔ ˈnaan: ‘-Kuu -pɛɛ i, -ˈbhle ˈkpɩ Zoova -za ˈo mʋn ˈmɛn -wɛeˈ -ˈye ˈbheɔ -nɩn. ˈMan ˈˈbho mɔn jhibhiˈ -ke.’ -Man ˈbɔn -ka Zonatan nɩan -ˈman dhaiˈˈ ˈye kaˈ-nɩn?

Kpɛ -duuˈˈ Zonatan ˈse ˈmɛanˈ -plee ɔ ye ɔɔˈ dhaiˈˈ Davidɩ sʋn bho po. -Jɛn ɔ jhibhi -ka ɔɔˈ ˈˈbho ɔ ˈbɔan ɔ ˈyea Davidɩ dhbhaˈ a, ɔ -ghwluɛ- ˈdhe ɔ bho ɔ ˈnaan: ‘Davidɩ ˈse dhɛsaʋn nʋn, -bho dhbhɔɔˈ, ɛ nɩn dhɛsaʋn- klaaˈˈ.’ ˈSʋ Sailɩ ˈkpaa Zonatan ˈcɛn. -Zɩn -pla zia, ɲʋn dhbhaˈ Sailɩ -e Zonatan ˈmɛn ˈdhe tʋˈ.

ˈBho -mɛnˈ ˈdhe ɛ, Davidɩ ˈbɔɛn Zonatan anˈ ˈˈjhu -ɲmau -ɔɔˈ ˈɲnɩn nɩan Mefibosɛtɩ i. Ɔ ˈjheɔ ˈsʋ ɛ, -ɔ -ghwluɛ- ˈdhe ɔ bho ɔ ˈnaan: ‘-Manˈ ˈˈbho -nɩɛn- ˈman dhaiˈˈ -dhe. ˈMan muɛn -manˈ dɩ ˈˈdu- ˈdhe -manˈ ˈkmʋn anˈ klɛɛ ˈdhi. -ˈYe ˈdhe ˈman ˈbheɔgbu ˈdhi ˈˈti -wɛeˈ -mɔn ˈe ˈmɔn -e -a ˈye -da dhueˈ -dhii.’ Davidɩ ˈse ɔɔˈ dhaiˈˈ Zonatan bho ˈˈmae- -flɛ.