Zoova aˈ dhbhoozuu- fuɛ Ezekiasɩ ˈdhei

Asirikɔʋn anˈ ˈbheɔglɔ kpa tʋ aˈ ˈˈdhru ˈbho Israɛ ɛˈ ˈcɛdhri -bue- aˈ ˈbheɔglɔ- ˈˈkpe. ˈKlaa Asiri aˈ ˈbheɔ Senakeribʋ ɔ ˈbɔn ɔ ˈye Zida kpʋn, ˈcɛdhri ˈsɔɔn ɔnˈ ˈbheɔglɔ-. Ɔ -dee Zida aˈ ˈˈkwigwlɛ- kpʋanˈ ˈmɛn dhueˈ dhueˈ. ˈKlaa ˈˈkwiglɔ- ɔɔ ˈbɔan ɔ ˈyea kpʋn -gblein -mɔn -nɩn Zelizalɛmʋn. -Jɛn ɔ sea jhibho- mɛn -nɩn Zoova aˈ ˈˈjɛ -ɛ fuo Zelizalɛmʋn ˈdhei.

Zida aˈ ˈbheɔ Ezekiasɩ ˈˈɲɩɛnˈˈ Senakeribʋ ˈghwɛi -duuˈˈ -wɛeˈ ɔ ˈse Zelizalɛmʋn -kpʋn in. Senakeribʋ kpʋn ˈgwɛi ˈmɛn, ˈklaa ɔ dhbhoɛ ɔɔˈ ˈsʋlɩˈˈ -wɛeˈ ʋʋ ˈye Zelizalɛmʋn kpʋn. Ɲʋn ˈˈtiaˈˈ ˈbho Zelizalɛmʋn -dhe ɛ, -faʋn- an nʋn ʋbʋ ˈmɛn ˈjɛɛn-, dhɛ nɩan ˈo ɛ, Asirikɔʋn an ˈˈkʋan in. ˈSʋ Ezekiasɩ -ghwlu ˈe ʋbʋ bho ɔ ˈnaan: ‘-Faʋn- anˈ nʋn aʋ -dhe. Asirikɔʋn- -kman anˈˈ, ˈklaa Zoova a mʋɛn -abʋ i -kuu -kenɛnˈ ɛ ˈyʋbʋ -zii.’

Ɲɔn ɲʋn an ˈdhaa Rabʋsake ɛ, ɔmɔn- Senakeribʋ dhbho bho Zelizalɛmʋn -wɛeˈ -ɔ ˈye ɲʋn nɩan ˈo -ghwlaa. Ɔ -nɩɛn ˈe ˈˈkwiglɔ ɔˈ -bhloeˈ ˈdhe ˈsʋ ɔɔ yea ˈˈghwɔ ɔɔ yea ka ˈdha: ‘Zoova se ˈbhɛɛ- ɔ ˈye dhɛ ooˈˈ dhɛ nʋn ɔ ˈye aʋ ˈˈɲɩn. Aʋaˈ ˈˈtai- aʋaˈ ˈˈjɛ i Ezekiasɩ ɔˈ poo aʋ ˈsrɛ i -dhe. Gela aˈ ˈdhue ka se ˈbhɛɛ- ɔ ˈye aʋ dhei -fuo-.’

Dhɛ Ezekiasɩ ˈyea nʋn ɛn, ɛmɛn- ɔ dee- Zoova i. Zoova ˈnaan: ‘-Faʋn- anˈ nʋn ʋn -dhe dhɛ Rabʋsake ˈtmʋan ɛɛˈ dɩ. Senakeribʋ ˈse Zelizalɛmʋn -kpʋn in.’ ˈBho ɛ ˈdhe ɛ, Senakeribʋ jha Ezekiasɩ ˈsɛɛ-. ˈDhe ˈsɛɛ- -ˈnɛn ˈdhi ɛ, ɔ ˈnaan: ‘Zoova se ˈbhɛɛ- ɔ ˈye aʋ ˈpʋʋ-, aʋ -to ˈo aʋaˈ ˈˈjɛ.’ Ezekiasɩ ˈbhae ɔ ˈnaan: ‘-Kɔngɩnˈ Zoova, ˈpʋʋ -abʋ, -wɛeˈ ɲʋn anˈ ˈklɛɛ ˈyɩ jhibho- -ka -manˈ ˈsʋ -nɩn Ɲɔnsoa.’ Zoova -za ɔɔˈ ghwlu aˈ kpa ɔ ˈnaan: ‘Asiri aˈ ˈbheɔ ˈse ˈo Zelizalɛmʋn -pa i. ˈMan muɛn ˈman ˈˈkwiglɔ- ˈdhei -fuo-.’

Asirikɔʋn- anˈ ˈsʋlɩˈˈ bin Zelizalɛmʋn ˈmɛn. Senakeribʋ deɛ -gwlɩˈˈ ˈjɛɛn- -ka ɔ ˈyea ˈˈkwliglɔ- -ˈnɔn kpʋn ˈdhe nɔnˈˈ dhɛzaan ˈdhi ɛ. ˈKlaa ˈdhe ˈˈmaʋn -glʋ dhueˈ ˈdhi ɛ, Zoova dhbhoɛ -ɔɔˈ dhbhoozuu- dhueˈ ʋn ye ˈsʋlɩˈˈ aˈ 185.000 ˈdhbha ˈdhe Asirikɔʋn- anˈ ˈkaman ˈdhi. ˈBheɔ Senakeribʋ ɔˈ tʋvɔʋn- -klaeˈˈ ˈmɛɛnˈ. Dhɛ ɔ ˈyea nʋn bhla ɛmɛn- -nɩn ɔ ˈye ˈdhe ɔ ˈˈbhli dhe mʋn. Zoova -fuɛ- Ezekiasɩ -e Zelizalɛmʋn ˈdhei -ka ɔ nʋan ɛɛˈ ˈtmʋn sʋn -dhe ɛ. -Bho -nɩn ˈbho Zelizalɛmʋn -dhe ɛˈ, -man mun Zoova -gwlɩˈˈ -de ˈmɛn?