Ɛsidrasɩ ɔ tɔɔɛn ɲʋn Ɲɔnsoa aˈ ˈtee

Israɛkɔʋn anˈ -daduuˈˈ muan Zelizalɛmʋn dhe ɛ, ɛ ˈbhɛɛˈ ɛ ˈye zɩn anˈ 70 ɲnin bhla. ˈKlaa Israɛkɔʋn -ˈnʋʋn ˈˈti Pɛsɩkɔʋn- anˈ ˈbheɔglɔ ɔˈ ˈfɛ -duuˈˈ ˈdhii. Ʋbʋ aˈ dhueˈ mɔn -nɩn Ɛsidrasɩ. Ɔɔ tɔɔɛn ɲʋn Zoova aˈ ˈtee. Ɛsidrasɩ ˈŋwɩɩn -ka ɲʋn ˈˈtiaˈˈ ˈo Zelizalɛmʋn ʋaˈ ˈjhea ˈtee ŋwɔn ɔn, ɔɔ ˈbɔn ɔ ˈye ˈe mun -wɛeˈ ɔ ˈyʋbʋ sʋn bho po. Pɛsikɔʋn- anˈ ˈBheɔ Aatazɛɛsɛsɩ -ghwluɛ ˈdhe ɔ bho ɔ ˈnaan: ‘Ɲɔnsoa ˈˈɲɩɛnˈˈ ʋn ˈtɔdhinɩɛn- -ɛɛ nʋɛn -wɛeˈ jhibho- ɔɔˈ ɲʋn ɔɔˈ ghwlu -tɔɔn ka. Mun Zelizalɛmʋn. Ɲʋn anˈ klɛɛ -ʋa- ˈbɔan -ʋʋ ˈyea mun -ke ɛ, ʋʋ -nɩn mun.’ Ɛsidrasɩ -nɩn ɲʋn -ʋa- ˈbɔan -ʋʋ ˈyea Zelizalɛmʋn mun ˈkpa -dadhueˈ. Ʋʋ bhaeɛ- Zoova -wɛeˈ ɔ ˈyʋbʋ ˈdhei -fuo- ˈbho -jieˈˈ, ˈˈdhe ʋʋ ˈkpa ˈo ʋʋ mun.

ˈCɩ ɲiɛn zia, ʋʋ ɲnin Zelizalɛmʋn ˈmɛn. ˈˈDhrijheʋn -ghwluɛ ˈe Ɛsidrasɩ bho ʋʋ ˈnaan: ‘Israɛkɔʋn- an bhlaa Zoova aˈ ˈtee ŋwɔn. Ʋʋ -nɩn ˈɲnʋnkpaeˈ -ʋa- ˈˈɲɩanˈˈ -baadhɩ- a ˈˈtiiɛ ˈˈbhli.’ Dhɛwɛ- Ɛsidrasɩ nʋn -ɛn? ˈBho ˈcɛ ɛˈ klɛɛ ˈˈjhibhaˈ a, ɔ poɛ ˈkɔi glu ˈˈdhe ɔ bhae- Zoova ɔ ˈnaan: ‘Zoova, dhɩ ˈdhɔɛeˈ nʋan -aʋ ˈˈdhrui ɛ, ɩn -diɛ ˈˈɩ. ˈKlaa -abʋ ɛ, -a nʋɛn dhɛsaʋn- ˈbhoo- ˈˈjhibhaˈ.’ Ɲʋn ˈˈtiaˈˈ ˈo Zelizalɛmʋn -jhibhɛ- ʋaˈ dhɛsaʋn- ˈˈɩn, ˈklaa ɲɔn ˈyʋbʋ sʋn bho po -wɛeˈ ʋʋ ˈye dhɛjɛɛn nʋn. Ɛɛˈ dɩ Ɛsidrasɩ za ˈo ɲankɔʋn -e ˈpeejheʋn ʋʋ ˈye dɩ nɩan ˈo ˈˈdhru -jra. ˈDhe ˈcɩ taan tbha ˈo ˈdhi ɛ, ɲʋn nʋɛn ɲʋn -ʋaˈ ˈˈɲɩanˈˈ Zoova i.

Zɩn anˈ -buɔˈ ˈsɔɔn ziˈ. ˈDhe nɔnˈˈ nɔnˈ ˈdhi ɛ, ɲʋn po Zelizalɛmʋn anˈ bhloˈ ˈmɛn -kenɛnˈ. ˈSʋ Ɛsidrasɩ -ˈgbooɛ- ˈcɛ ˈbho glɔ ɔˈ -da ˈbhɛa i -wɛeˈ ɔ -tɔɔn ʋbʋ Ɲɔnsoa aˈ ˈtee. Ɛsidrasɩ -kaian- ˈtee aˈ ˈsɛɛ ˈˈŋwɛn ɛn, ˈcɛ -sɔn ˈmʋn ˈmɛn. Ɔ bhleeɛ Zoova bho ˈˈdhe ʋʋ kpa sɩn ˈˈjha -wɛeˈ ʋʋ ˈyeɛ -to -ka ʋʋ ˈŋwɔɔan ˈbho ɛ. ˈBho ɛ ˈdhe ɛ, Ɛsidrasɩ ɔ zroa ˈtee ˈdhii ˈˈdhe ɔ zelɛ ˈˈkpei ɛ, ʋa poɔ -dheinˈˈ bho -kajɔɔnka. Ʋʋ jhibhɛ ˈˈɩ -ka ʋʋ -tɛɛan Zoova bho -kenɛnˈ ɛn, ˈˈdhe ʋʋ ˈˈviɩnˈ. Zɔn -ˈnɔɔn zɩan, Ɛsidrasɩ kpa ˈtee ˈdhii zroa ɲan ˈdhe ʋbʋ bho. Ʋʋ ˈŋwɔɛin -ka ˈdhe nɔnˈˈ dhɛzaan ˈdhi ʋʋ ˈyea -Peeˈˈ aˈ fɛtɩ po ɛ. ˈSʋ ʋʋ ˈˈdooˈ ʋʋ ye ɛɛˈ dhɩ kpɔ ɔˈˈ poaˈ -dee.

ˈDhe fɛtɩ aˈ ˈghwɩ nɩan -mɛsɔnˈ ˈdhi ɛ, ʋʋ -nɩɛn ˈmʋnain ˈˈdhe ʋʋ poɛ Zoova ˈsɛ dhɛ ʋaˈ ˈˈduudhɩ trooa ɛɛˈ dɩ. -Ɛ ˈghwlʋa ˈe Zozue ɔ nɔnˈˈ ɔn, -Peeˈˈ aˈ fɛtɩ -ɛ -nɩn -jɛn ʋʋ poa ˈyea gʋɔ- ɔ, ɛ se nɩn. Ʋʋ gwɛa fɛtɩ poaˈ a, ʋʋ ˈkɩɩɛn ˈˈdhrui ˈˈdhe ʋʋ bhae-: ‘Zoova, zeie -abʋ ˈmɛn ˈdhe -kʋɔnkwlaˈ, -ˈˈɲɩɛn -aʋ dhiidhɛ- ˈdhe -bɩɛnbhlʋa- ˈˈkpe ˈˈdhe -ˈˈɲɩɛn -aʋ ˈbhlʋa ˈdhɔɛeˈ -ke. ˈKlaa, -kpɛ -duuˈˈ -a ˈse ʋn ŋwɔn ˈjhe. Jha -aʋ ghwlukwajhaaʋn- -ʋʋ ˈye -aʋ -glʋˈ zela-, ˈklaa -a ˈsʋbʋ -dheinˈˈ bho po. ˈˈDhe, -ˈmain ˈdhe -a bho. Ghwlu cɛan ˈdhe Ablaamʋn bho ɛ, -ɲnian- ʋn ˈbho ˈmɛn. -Kaanka bhla, -aa cɛn ghwlu ˈdhee- bho -a ˈye ʋn ŋwɔn ˈjhe.’ Ʋʋ ˈcre ghwlu ʋbʋ ˈcɛan ˈmɛn ˈˈdhe ˈˈdhrujheʋn- -e Levi ɔˈ ˈˈɲnuun- -e ˈsraazaʋn- -ˈˈduɛ -jhibho -ˈnan.