Zezi jha Lazaa ˈkmʋn dhe

Zezi ˈbhleɛ ˈdhaiˈˈ -ˈˈwe taan -nmɔn ˈdhi ŋwɔn -ʋʋ ˈˈti ˈo Betanin -dhe. Ɛ nɩn Lazaa -e ɔɔˈ ˈdhoudhi -ɲnʋnkpaeˈ ˈsɔɔn -ʋaˈ ˈɲnɩn nɩan, Mai -e Matɩ. -Zɔn dhueˈ ɛ, Zezi nɩɛn ˈe Zudɛn ɛnˈ ˈfɔ -ˈnɔɔn bho -dhe, ˈsʋ Mai -e Matɩ kpɔ tibhoghwlu- ʋʋ ˈnaan: ‘Lazaa se kuzɔin -flɔn. Kɔngɩnˈ, jhi ˈˈdoo-!’ ˈKlaa Zezi se ˈˈdoo- ɔ ˈse mun. Ɔ nʋɛn ˈghwɩ ˈsɔɔn -kenɛnˈ -wɛeˈ ɔ ˈtmʋʋn- ɔɔˈ dhɛcɩaʋn ɔ ˈnaan: ‘-A mun Betanin. Lazaa ˈkpa ˈˈɲɩnɔnˈˈ. ˈMan muɔn ˈˈɲɩnɔnˈˈ -za aˈ.’ Dhbhoʋn -ghwluɛ- ˈe ɔ bho ʋʋ ˈnaan: ‘-Bho Lazaa ˈkpa ˈˈɲɩnɔnˈˈ ɔnˈ, -ˈmɛn ɛɛ muɔn sʋn bho -po ɔ ˈye ˈpʋ.’ ˈSʋ Zezi ˈtmʋʋn ʋbʋ ˈmɛn -kajɔɔnka ɔ ˈnaan: ‘Lazaa ˈmɛɛnˈ.’

Zezi ɲnian Betanin ɛn, -ˈmɛn Lazaa nɩɛn ˈe -drɛɛn ˈdhi ɛɛ nʋɛn ˈghwɩ ɲɩɛn bhla. Ɲʋn -duuˈˈ jhi Mai -e Matɩ dɩ -ˈgwlɩi ˈˈduaˈˈ. -Jɛn Matɩ ˈŋwɩɩn -ka Zezi jhia, ʋn ˈˈdooˈ ʋn yeɔ ˈˈɩ ˈjhaa-. Ʋn -ghwluɛ- ˈe ɔ bho ʋn ˈnaan: “ˈBhlei-, -bho -nɩn da -dhe ɛˈ, ˈman ˈdhoudhi ˈse ˈmɛn in -dhe.” Zezi -ghwluɛ- ˈe ʋn bho ɔ ˈnaan: ‘Aaˈ ˈdhoudhi ɔ muɛn ˈkmʋn dhe -jhi. A de ɛɛˈ dhɛ tu -gwlɩˈˈ ˈmɛn Matɩ?’ Ʋn -ghwluɛ-ˈe ɔ bho ʋn ˈnaan: ‘ˈƖn jhibhiˈ -ka ɔɔ muan ˈkmʋn dhe -jhi ˈbho ˈkmʋndhejhiɛ ɛˈ nɔnˈˈ ɔn.’ Zezi -ghwluɛ- ˈe ʋn bho ɔ ˈnaan: “ˈƖn -nɩɛn ˈkmʋndhejhiɛ- -e ˈkmʋnɩɛn-.”

ˈSʋ Matɩ muɛn ˈe Mai bho ʋn ˈnaan: ‘Zezi jhiˈ!’ Mai pleˈ ʋn ye ˈe Zezi bho mun ˈˈdhe ɲʋn -duuˈˈ bhla ˈbho ʋn ˈdhe -ke. Ʋn poɛ ˈkɔi glu ˈbho Zezi ˈˈjhibhaˈ ˈˈdhe ʋn -dee ˈvɩanˈˈ. Ʋan ˈˈvɩɩnˈ ˈjɛɛn- ʋn ˈse ˈbɔn ʋn ˈye bhɔˈ. Ʋn ˈnaan: ‘ˈBhlei-, - bho -nɩn da -dhe ɛˈ, -aaˈ ˈdhoudhi ˈse ˈmɛn in -dhe!’ Zezi ˈjheɛ -ka ɛ kpʋn -glʋˈ ˈjɛɛn- ˈsʋ ɔ -dee ˈvɩanˈˈ ˈmɛn -ke. Ɲʋn ˈjheɛ -ka ɔɔ ˈˈvɩan, ʋʋ ˈnaan: ‘Aʋ -ŋmʋn Zezi -kman Lazaa aˈ dɩ -dhe ˈjɛɛn-!’ ˈKlaa -ˈnʋʋn an deeɛ ʋaˈ ˈˈjɛ i ʋʋ ˈnaan: ‘-ˈMɛn dhɛɛdɩ- ɔ ˈse ɔɔˈ dhaiˈˈ ˈpʋʋ- -ɛ?’ Dhɛwɛ- Zezi ˈye nʋn bhla -a?

Zezi muɛn ˈo -drɛɛn ˈˈjhibhaˈ. ˈSouˈˈ paoˈ -klaaˈˈ dhueˈ -ʋn kan -drɛɛn ˈˈŋwɛn. ˈSʋ Zezi ghwluˈ ɔ ˈnaan: ‘Aʋ -za ˈo ˈsouˈˈ.’ Matɩ ˈnaan: ‘Ɲʋn deɔ i ɛɛˈ ˈghwɩ ɲɩɛn ka zɩanˈ! ɔɔ poɛ ˈnʋn bhla.’ -Bho ɛ -nɩn -kaˈ mɔn -dhe ɛˈ, ʋʋ -za ˈo ˈsouˈˈ ˈmɛn ˈˈdhe Zezi bhae- ɔ ˈnaan: ‘ˈMan ˈˈBho, -a ˈsɛ- dhɛ -man poa ˈʋn -dheinˈˈ bho ɛ. ˈƖn jhibhiˈ -ka -man poa ˈʋn -dheinˈˈ bho jheejhee ɛ, ˈklaa ˈman kpa ghwlu ˈˈjha -wɛeˈ ʋaˈ klɛɛ ˈyɩ jhibho- -ka ɛ nɩan -mɔn dhbhoa ˈʋn ɛn.’ ˈBho ɛ ˈdhe ɛ, ɔ kpa ghwlu ˈˈjha ɔ ˈnaan: “Lazaa, ˈˈsi ˈzɔn!” ˈSʋ dhɛ dhueˈ -nʋʋɛn- -ɛ ˈˈmaan ɲʋn -taiˈ: Lazaa ˈghwlʋɛ ˈe -drɛɛn ˈdhi ɔ ye ˈzɔn ˈˈsi! Dhɛ ɲʋn ˈˈfɩɔn -draˈˈ aˈ ˈfɛ i ɛɛˈ dɩ Zezi ˈnaan: “Aʋ bɔin ɔn in -ˈmɛn aʋ ˈˈtai ɔ i ɔ ˈye mun.”

Ɲʋn ˈjhea dhɛ -nʋʋan- -ˈnɛn ɛnˈ da, ʋaˈ -daduuˈˈ deɛ Zezi -gwlɩˈˈ. ˈKlaa ʋaˈ -ˈnʋʋn munˈ ʋʋ ye Faiziɛn -ˈˈwe ˈˈkunanˈˈ po. -Ɛ ˈghwlʋa ˈo ɛ, Faiziɛn -ˈˈwe a ˈbɔn ʋʋ ˈye Lazaa -e Zezi ˈdhbha. Dhbhoʋn nɩan 12 ʋaˈ dhueˈ -ɔɔˈ ˈɲnɩn nɩan Zida Isikariɔtɩ ɛ, ɔ ˈˈmanˈ ɔ ye ˈe Faiziɛn -ˈˈwe bho mun ˈˈdhe ɔ dee ʋbʋ i ɔ ˈnaan: ‘-Bho ˈɩn po aʋ sʋn bho aʋ ˈjhe Zezi ɛˈ, ˈghwɛi- diɛ- aʋ ˈye ˈʋn ˈˈɲɩn -ɛn?’ Ʋʋ ˈŋwɔɔɛn ghwluiˈ -wɛeˈ ʋʋ ˈyeɔ ˈtamanˈˈ ˈjhɔ ɔˈ 30 ˈˈɲɩn. Ɔ -dee nɔnˈˈ -ɔ ˈdhe ˈdhi ɔ ˈyea Zezi ple ˈdhe ʋbʋ bho i ˈbɔanˈ ˈmɛn.