Zezi to ɔɔˈ ˈˈjɛ ˈmɛn ˈdhe ˈsaipoʋn- bho

Zezi toa ɔɔˈ ˈˈjɛ ˈdhe dhbhoʋn bho ɛ, nɔnˈˈ dhɛ ˈˈzaan- -zia, Piɛɛ ˈnaan ɔɔ muɛn ˈsai -poaˈ ˈdhe Galile ɛˈ ˈtɔnin ˈˈkpe. Toma -e Zakɩ -e Zan -e dhɛcɩaʋn -ˈnʋʋn kpɔ -jieˈˈ. Ʋʋ poɛ ˈsai ˈdhe ˈˈmaʋnglu aˈ klɛɛ ˈdhi ˈklaa ʋʋ ˈse dhɛ kpʋn.

-Druun pɛɛn ˈsʋ ɛ, ʋʋ ˈjheɛ ˈˈjhu dhueˈ ˈbho ˈˈnin -gwlɩˈˈ. Ɔ ˈˈghwɔɔˈ ˈdhe ʋbʋ bho ɔ ˈnaan: ‘Aʋ kpʋn zmiin ˈmɛn?’ Ʋʋ -ghwluɛ- ˈe ɔ bho ʋʋ ˈnaan: “ˈˈƖɩn-!” ˈˈJhu -ˈnɔn ˈnaan: “Aʋ po aʋaˈ ˈsai ˈˈniɔn ˈbho bato ɔˈ -dhian fɔ bho.” Ɛmɛn- ʋʋ nʋn ˈsʋ zmiin ˈˈjhi ˈsai ˈmɛn. Zmiin -ˈnɩn -diɛˈˈ -dhe ˈjɛɛn- ˈsʋ ʋʋ se ɩanˈ ˈdhe bato ˈdhi ˈjhaa ˈbhɛɛ-. ˈSʋ Zan ˈŋwɔɛn in -ka ɛ nɩan Zezi ɛ ˈˈdhe ɔ ˈnaan: “Ɛ nɩn ˈBhlei!” Piɛɛ ˈˈdooˈ ɔ ye ˈˈniɔn ˈkpa ˈˈdhe ɔ ˈˈbile ˈsʋ ɔ ye ˈe ˈkpʋʋ ˈˈkpe ɲnin. Dhɛcɩaʋn -sia ˈo nɩɛn ˈe bato ˈdhi ʋʋ ye ˈbho ɔ ˈdhe bhla.

Ʋʋ ɲnian ˈbho ˈˈnin -gwlɩˈˈ ɛ, ʋʋ ˈjheɛ dipɛn -e zmiɛn- -nɩn ˈbho ˈˈjhri. Zezi ˈnaan ʋʋ jha zmiin- ʋʋ kpʋan ɩanˈ ˈpla. ˈˈDhe ɔ ˈnaan: ‘Aʋ jhi aʋ ˈye dhɛ dhi.’

Ʋʋ gwɛa dhɛ dhiaˈ a, Zezi deeɛ Piɛɛ i ɔ ˈnaan: ‘-Kman ˈman dɩ ˈmɛn ɛ ye ˈsai -poɛ -zii?’ Piɛɛ -ghwluɛ- ˈe ɔ bho ɔ ˈnaan: ‘Ɛɛn, ˈBhlei. -Manˈ ˈˈjɛ jhibhiˈ o.’ Zezi ˈnaan: ‘-ˈˈƝɩn ˈman ˈbhlae -ɲnuun dhiidhɛ-.’ Zezi deeɔ i -kenɛnˈ ɔ ˈnaan: ‘Piɛɛ, -kman ˈman dɩ ˈmɛn?’ Piɛɛ ˈnaan: ‘ˈBhlei, -manˈ ˈˈjɛ jhibhiˈ -ka ˈɩn kman -manˈ dɩ ɛ.’ Zezi -ghwluɛ- ˈe ɔ bho ɔ ˈnaan: “ˈˈDu ˈman ˈbhlae -ɲnuun anˈ dɩ.” Zezi deeɔ i -kenɛnˈ kpɛ taan -nɛn. ˈSʋ Piɛɛ -ˈˈzruuˈ ˈjɛɛn-. Ɔ ˈnaan: ‘ˈBhlei, jhibho- dhɩ aˈ klɛɛ ˈmɛn. Jhibhiˈ -ka ˈɩn kman -manˈ dɩ ɛ.’ Zezi ˈnaan: “-ˈˈƝɩn ˈman ˈbhlae -ɲnuun dhiidhɛ-.” -Wɛeˈ ɔ -ghwlu ˈdhe Piɛɛ bho ɔ ˈnaan: “Bhla ˈbhoo ˈdhe jheejhee.”