Zezi ɔ muɛn ˈe jhaʋn ˈdhi dhe

Zezi -jhɛɛ ɔɔˈ dhɛcɩaʋn- ˈmɛn ˈdhe Galile. Ɔ ˈtmʋʋn ʋbʋ dɩ nɩn -ɩn -kɔandɩ ɔ ˈnaan: ‘Aʋ mun ɲʋn nɩan ˈbhlʋɩ aˈ klɛɛ ˈdhii bho i ˈˈdhe aʋ ˈye dhɛcɩaʋn -nʋn ˈdhe ʋbʋ ˈˈklun. Aʋ -tɔɔn ʋbʋ dhɩ ˈɩn -tɔɔan aʋbʋ ɛ, -ˈmɛn aʋ -jhaa ʋbʋ ˈˈnin ˈzɔn.’ ˈˈDhe ɔ cɛn ghwlu ɔ ˈnaan: ‘ˈƖn -nɩn aʋa muɛn -nan jheejhee. Aʋaˈ ˈˈmae- -dhe.’

Zezi jhia ˈkmʋn dhe ɛ, ˈdhe ˈghwɩ aˈ 40 ˈdhi, ɔ -to ɔɔˈ ˈˈjɛ ˈmɛn ˈˈdhe dhɛcɩaʋn anˈ kmɛnˈ -ˈˈwe bho ˈdhe Galile -e Zelizalɛmʋn. Ɔ ˈˈdʋbʋ ˈsrɩn -ɩn -kɔndɩ ˈjɛɛn- ˈˈdhe ɔ nʋɛn -jhriiˈ- -duuˈˈ. -Wɛeˈ ɔ -jhɛɛ ɔɔˈ dhbhoʋn- ɛɛˈ dhe ˈbhɔɔ -nɛn ˈbho Olivʋ ɛˈ trʋ ˈˈkpe. Ɔ -ghwluɛ- ˈe ʋbʋ bho ɔ ˈnaan: ‘Aʋaˈˈ ˈghwlʋ ˈo Zelizalɛmʋn -dhe. Aʋ kpa dhɛ -ɛɛˈ ghwlu ˈˈBho cɛan anˈ -fuaˈ ɲan.’

ˈKlaa dhɛ ɔɔ ˈbɔan ɔ ˈyea ˈtmʋn ɛn, ɔɔˈ dhbhoʋn- seɛ i ˈŋwɔn -dhe. Ʋʋ deeɔ i ʋʋ ˈnaan: ‘Ɛ nɩn ˈnɔn ˈghwɩ -ˈnɩn ˈdhi -ˈye Israɛ ɛˈ ˈbheɔ ˈkpa?’ Zezi -ghwluɛ- ˈe ʋbʋ bho ɔ ˈnaan: ‘Ɛ se ˈnɔn ˈghwɩ -ˈnɩn ˈdhi Zoova a ˈbɔn ˈye ˈbheɔ ˈkpa -nɩn. ˈDhe nɔnˈˈ dhɛ ˈˈzaan ˈdhi ɛ, zuu gwɛai a muɛn aʋ ˈˈɩkman- ˈˈɲɩn-, -wɛeˈ aʋ ˈye ˈman -bobhlaʋn- -nɩn. Aʋ mun aʋ ˈye -bo bhla ˈdhe Zelizalɛmʋn -e Zide -e Samari ɛmɛn- -eˈbhlʋɩ -tɛɛan bho ˈdhii.’

ˈSʋ Zezi ˈjha ˈe jhaʋn ˈdhi ˈˈdhe ˈˈnin ɛnˈ ˈplɩ kɔɔn ˈˈjhrii. Ɔɔˈ dhbhoʋn an kpa ˈe jhaʋn ˈdhi -ŋmʋanˈ ɲan, ˈklaa ɔ munˈ.

Ʋʋ ˈghwlʋ ˈe Olivʋti aˈ trʋ ˈˈkpe ˈmɛn ˈˈdhe ʋʋ mun ˈe Zelizalɛmʋn. Ʋa ˈgbooɛ i jheejhee ˈdhe ˈˈgbu -die- dhueˈ ˈdhi ˈdhe etazɩ ˈjha ˈˈdhe ʋa bhae -dhe. ˈSrɩn Zezi ˈyʋbʋ ˈˈɲɩn ɛn, ɩmɩn- ʋa fuo -dhe.