-Zuu gwɛai jhiɛ ˈo dhɛcɩaʋn ˈˈkpe

Zezi muan ˈe jhaʋn ˈdhi dhe ˈghwɩn -bue- zia, -zuu gwɛai jhiɛ ˈo ɔɔˈ dhɛcɩaʋn ˈˈkpe. Ɛ nɩn ˈbho 33 zʋn anˈ Pantekɔtɩ ˈˈkpe. Ɲʋn -duuˈˈ -ˈghwlʋ ˈbhlʋɩ ˈdhii -ʋʋ jhi fɛtɩ -poaˈ ˈbho Zelizalɛmʋn. ˈBho ɛɛˈ -zɔn tu ˈˈkpe ɛ, dhɛcɩaʋn -ˈgbooa dhi ˈdhe etazi dhueˈ jha, ʋʋ ˈbhɛɛ 120 ˈmɛn. ˈSʋ, dhɛ dhueˈ -nʋʋɛn- -ɛ ˈˈmaan ɲʋn -taiˈ. Dhɛ dhueˈ gwɛa nɛn, ɛmɛn- -ɲnan in ˈbho dhɛcɩaʋn ˈˈdhru ˈˈdhe ʋʋ -dee ghwlu ˈsrɩ -pooaˈ. -Ka pʋɔˈ -klaaˈˈ aˈ jhia ˈkamɔn- -druɛnˈˈ ˈˈjhiaˈˈ ˈe -ˈˈgbu ˈdhi -nɩn -dhe.

ˈDhɩbhʋ- jhia Zelizalɛmʋn ɛn, ʋʋ ˈŋwɔn -druɛnˈˈ -ˈnɛn ˈmɛn ˈˈdhe ʋʋ pleˈ ʋʋ ye dhɛ -ɛɛ nʋʋan ˈdhe -ˈˈgbu ˈjheea jhi. Ʋʋ ˈjhea dhɛcɩaʋn ʋa poa ghwlu ˈsrɩ -ˈnɩn ɛn, taiˈ ˈˈmaan ʋbʋ ˈmɛn. Ʋʋ ˈnaan: ‘Ɲʋn nʋn ˈghwlʋɛ Galile. Kɛ nʋn ˈsʋ ʋa po -aaˈ ˈˈbhlighwlu -ɛ?’

Piɛɛ -e dhbhoʋn sia ˈo -sʋn ˈmʋn ˈmɛn ʋʋ ye i -ɲnan ˈbho ɲʋn -duuˈˈ -ˈnʋn ˈˈjhibhaˈ. Piɛɛ ˈtmʋʋn ʋbʋ -ka ɲʋn ˈdhbha Zezi ˈˈdhe Zoova jhɔ ˈkmʋn dhe ɛ. Ɔ ˈnaan: ‘Kaan bhla Zezi -nɩɛn ˈo Ɲɔnsoa aˈ -dhian- fɔ bho ˈdhe jhaʋn ˈdhi ˈˈdhe -zuu gwɛai ɔ ˈˈsiaˈˈ ˈɲnɩn -ʋn ˈyea jhi -dhe ɛ, ʋmʋn- jhi. Ɛɛˈ dɩ aʋa ˈjhe -jhriiˈ- nɩn ˈˈdhe aʋa ˈŋwɔn ghwlu ˈsrɩ nɩn.’

Dɩ Piɛɛ ˈtmʋan, ɩn ˈtʋɛn ʋbʋ aˈ -pɛɛ i ˈˈdhe ʋʋ dee- dɩ i ʋʋ ˈnaan: “Dhɛwɛ- -a ˈye nʋn -ɛn?” Ɔ -ghwluɛ ˈe ʋbʋ bho ɔ ˈnaan: ‘Aʋ jhibho- aʋaˈ dhɩsaɩn- ˈˈɩn -ˈmɛn aʋ -jhii- ˈˈnin -zɔnˈ ˈdhe Zezi ɔˈ ˈɲnɩn ˈmʋn. Aʋbʋ -ke ɛ, -zuu gwɛai a muɛn ˈbho aʋ ˈˈkpe -jhi.’ ˈDhe ɔɔˈ -zɔn tu ˈdhi ɛ, ɲʋn -jhiia ˈˈnin -zɔnˈ ɔn, ʋʋ ˈbhɛɛˈ ʋʋ ˈye ɲʋn anˈ 3.000 ɲnin. -Ɛ ˈghwlʋa ˈo ɛ, dhɛcɩaʋn an ˈkpa ˈˈkpe ˈbho Zelizalɛmʋn -sɔɔn -sɔɔn. ˈDhe Ɲɔnsoa aˈ -zuu aˈ ˈsaa ˈmʋn ɛn, dhbhoʋn man ɲɔnsoagbi- ˈˈdhe ʋʋ ˈye dhɛcɩaʋn dhɩ aˈ klɛɛ Zezi ˈnaan ʋʋ ˈyea nʋn -tɔɔn.