ˈCƖAANDHƐ- 22
-Kawɛ -ˈbhɛɛ -ˈye -bɔyaˈˈ bo bhla ˈdhe ɲʋn -ˈnʋʋn bho -ɛ?
Tɔˈdɩ aˈ ˈcɩan anˈ ɲan -kpa a muɛn ʋn ˈˈtun- -ˈye ka nʋn ‘ˈman ˈbɔn ɲʋn anˈ klɛɛ ˈyɩ jhibho-!’ Ɛɛn, ɛ -kɔn dɩ ɲʋn anˈ klɛɛ ˈye tɔˈdɩ jhibho-! ˈKlaa, ˈtmʋʋn- ɲʋn dhɩ ˈcɩan anˈ dɩ ɛɛˈ -faʋn ˈbhɛɛˈ ɛ ˈye ʋn nʋn. -ˈMɛn -ka -ˈbhɛɛa -ˈyea -faʋn -ˈnʋn ˈˈdhru ˈjha ˈˈdhe -ˈyea -bɔyaˈˈ -bo nɩan ˈe Biiblʋ ˈdhi ɔˈ bhlaaˈ -dee ˈdhe ˈmʋnan ˈmʋn ɛn, ɛmɛn- -aa mun ˈjhe-.
1. -Kawɛ -ˈbhɛɛ -ˈye -bɔyaˈˈ bo ɔˈ dɩ ˈtmʋn ˈdhe ɲʋn jhibha bho -ɛ?
Zezi ɔˈ dhɛcɩaʋn ˈnaan: “Dhɩ -a ˈjhea ˈˈdhe -a ˈŋwɔan, -a se ˈbhɛɛ- -a ˈye ɩanˈ dɩ aˈ ˈtmʋan bho ˈbhɔ.” (Actes 4:20) Dhɩ ʋa ˈcɩan an nʋbʋ ˈtʋn -dhe ˈjɛɛn-, ɛɛˈ dɩ ʋa ˈbɔn ʋʋ ˈyɩ ɲʋn anˈ klɛɛ ˈtmʋʋn-. Ɛmɛn- -man ˈbɔn -ˈye nʋn -ke? -Bho ɛ -nɩn -kaˈ, -ˈmɛn ˈbɔn nɔnˈˈ nmɔan ˈo ˈi -wɛeˈ -ˈye -manˈ ˈˈgbuzɔncɛ -e -manˈ dhaiˈˈ -ˈˈwe dhɩ ˈcɩan anˈ dɩ ˈtmʋʋn- ˈdhe dhɛŋwɔnjheɛ ˈmʋn.—Zro Colossiens 4:6.
-Ka -ˈyea nʋn ˈˈdhe -ˈyea -dee ɛ
-Bho -man sa ˈe -manˈ ˈˈgbuzɔncɛ ɛˈ dhueˈ bho ghwlu ɛˈ, -ka -ˈbhɛɛa -ˈyea -dee ˈka ka: “Dhɛ dhueˈ ˈɩn zro ˈdhii ˈnɔn ˈdhɔɔ nɔn ˈdhi -ɛ nʋn ˈʋn ˈtʋn.”
-Manˈ dhaiˈˈ dhueˈ -ɔ sea kuzɔin -flɔn -aeˈˈ -ɔ ˈˈzrua, ˈbhɛɛˈ -ˈye Biiblʋ aˈ ˈˈjhriɛ- dhueˈ -ɛɛ poa ɲʋn ˈkpɩ ˈdhii zro -ˈyeɔ ˈˈɲɩn.
-Bho ɲɔn -nɩn -man nʋan dhbho dee- mʋn in ɔ ˈnaan “dhɛwɛ- nʋn ˈbho -manˈ -gwle ghwɩ ˈˈkpe -ɛ?,” -ˈbhɛɛˈ -ˈye ˈo -jhii ˈˈdhe dhɛ ˈcɩan ˈdhe Biiblʋ ˈdhi -aeˈˈ ˈbho ˈˈdhruigbooɛ -nʋʋan ˈbho ˈdhɔɔ ɔˈ ghwɛa ˈmʋn ɛnˈ dɩ ˈtmʋn.
-Tɔɔn -manˈ dhaiˈˈ -ˈˈwe -aaˈ ɛntɛɛnɛtɩ ɛˈ -deɩn jw.org.
-ˈDha ɲʋn -ˈnʋʋn ʋʋ ˈye -manˈ Biiblʋ ˈcɩan- anˈ da ˈjhe -aeˈˈ -tɔɔn ʋbʋ -ka ʋʋ ˈbhɛɛa ʋʋ ˈyea Biiblʋ ˈcɩan- i dee- ˈbho jw.org ˈˈkpe.
2. Dhɛɛdɩ- ɛ -kɔn dɩ -a -nɩn ɲɔnsoagbu ˈye bo bhla -a?
Ɛ se ˈdhe ɲʋn ʋʋ jhibha aˈ ˈsʋ bho -mɔn Zezi ɔˈ dhɛcɩaʋn bhla bo -nɩn. Zezi “dhbhʋbʋ ˈmɛn ˈsɔɔn ˈsɔɔn ʋʋ ˈye ˈˈkwigwlɛ ˈdhii mun” ʋʋ ˈye bo bhla. (Luc 10:1) -Bobhladhbho- -ˈnɔn -pooɛ- kpɔˈˈ -kajɔɔnka ɛɛˈ dɩ ɲʋn -duuˈˈ ˈŋwɔn -bɔyaˈˈ bo. Dhɛ ʋʋ bhla bo ˈsɔɔn ˈsɔɔn nʋɛnˈ ʋʋ ye ˈmʋnan- -duuˈˈ ˈjhe. (Luc 10:17) -ˈBhɛɛˈ -ˈye -manˈ ˈˈjɛ kpɔˈˈ po ˈˈdhe -nɩn ɲɔnsoagbu ˈye bo bhla?
KPA DHƐ I ˈŊWƆƐN ƝAN
-Ka -ˈbhɛɛa -ˈyea nʋn -wɛeˈ -ˈyea -manˈ -faʋn ˈˈdhru ˈjha ˈˈdhe -ˈyea -bɔyaˈˈ bo ɔˈ bhlaaˈ ˈmʋnan ˈdhi ˈjhee- ɛ, ɛmɛn- -man mun ˈcɩan-.
3. Zoova a muɛn ʋn bho -sie-
Ɲʋn -an ˈbɔan -ʋʋ ˈyea bo bhla, -ka ɲʋn an muan ʋbʋ -e -bo ʋa muan -bhla ˈjhe- ɛ, ɛɛˈ -faʋn ˈbhɛɛˈ ɛ ˈyʋbʋ nʋn.
-Man ˈbɔn -ˈye dhɩ ˈcɩan anˈ dɩ ˈtmʋn ˈdhe ɲʋn -ˈnʋʋn bho ˈˈdhe ɛɛˈ -faʋn an nʋn ʋn? Dhɛɛdɩ- -man ˈdha -kaˈ -a?
Po ˈo VIDEO, -ˈmɛn aʋ ˈtmʋn ideedɩ- nɩan da ˈzɔn da aˈ dɩ.
-Kawɛ ˈdhoudhi -ˈˈwe nɩan ˈnɔn video nɔn ˈdhi nʋn ʋaˈ -faʋn ˈˈdhru ˈjha sʋn -ɛn?
Zro Isaïe 41:10, -ˈmɛn aʋ ˈtmʋn ideedɩ- nɩn anˈ dɩ:
-Bho -man sa ˈbɔn -ˈye bo bhla ˈˈdhe ɛɛˈ -faʋn an sa ʋn nʋn ɛnˈ, dhɛɛdɩ- -ˈye bhae- -ɛ?
Jhibhodɩ-
ˈBho Zoova aˈ -Bobhlaʋn anˈ -da -duuˈˈ -gwlɩˈˈ -dhe ɛ, ʋʋ se ˈbhɛɛ- -flɛ ʋʋ ˈye -bɔyaˈˈ bo bhla ˈdhe ɲʋn -ˈnʋʋn bho. Ɛmɛn- Sɛɛgɛɩ ɔˈ bo ɔ tɔɔn -abʋ. Ɔɔ nʋɛn dɩn -dhe ˈˈdhe -ghwlu ˈe ɲʋn -ˈnʋʋn bho kmanˈˈ ˈdhe ɔ bho -dhe. ˈSʋ ɔ -dee Biiblʋ ˈcɩaan- ˈmɛn. Ɛ ˈyea ˈo ˈbhɔɔ- ɔ ˈnaan: “-Bho ˈman sa ˈe ɲʋn bho -ghwluɛ plee -mɔnˈ -dhe ɛˈ, ˈɩn -dee ˈdhe ɲʋn bho -ghwluɛ ˈmɛn ˈman yʋbʋ dhɩ ˈɩn ˈcɩan anˈ dɩ ˈtmʋʋn. Dhɛ -ɛɛ ˈˈmaan ˈmʋn -tɔˈ -mɛn -nɩn, dhɛ ˈman ˈtmʋan Biiblʋ aˈ dɩ ˈdhe ɲʋn bho nʋɛnˈ ˈdhe ɲʋn bho -ghwluɛ- ɛˈ -faʋn anˈ nʋn ˈʋn ˈbhodhe. -Bho ˈɩn -nɩn ɲɔn -ɔn -faan -tɛnˈˈ -mɔnˈ -dhe ɛˈ, ˈɩn -dee dhɩ ˈɩn ˈcɩan anˈ dɩ ˈtmʋanˈ ˈmɛn ˈdhe ɲʋn -ˈnʋʋn bho. Ɛɛˈ nʋanˈ -kuuɛ- ˈman ˈˈjɛ ɛˈ dhɛgwlɩdeɛ- i.”
4. -ˈJhe ɲʋn ŋwɔn ˈdhe -bobhlaaˈ
-Bho -man sa bo bhla aˈ, ɛ se dhɛ -man ˈtmʋan anˈ ˈsʋ -kɔn dɩ -nɩn. ˈKlaa -ka -man nʋan ɛnˈ ˈtmʋn sʋn -ke -kɔn dɩ. Zro 2 Timothée 2:24 -e 1 Pierre 3:15, -ˈmɛn aʋ ˈtmʋn ideedɩ- nɩn anˈ dɩ:
-Bho -man sa bo bhla ˈdhe ɲɔn bho ɛˈ, -kawɛ -ˈbhɛɛ -ˈye Biiblʋ aˈ ˈsrɩn nɩn ˈˈjhriɛ ˈˈdu -ɛ?
Dhɛ -man ˈcɩan Biiblʋ ˈbhɛɛˈ ɛ ˈse -manˈ ˈˈgbuzɔncɛ -aeˈˈ -manˈ dhaiˈˈ -ˈˈwe -ˈnʋʋn ˈtʋn -nʋn in. -Bho ɛ -nɩn -kaˈ, dhɛwɛ- -ˈbhɛɛ -ˈye nʋn -ɛn? ˈˈDhe dhɛwɛ- ˈse -nʋn in -ɛn?
-Bho jhibho- ideedɩ aˈ ˈdhe poaˈ aˈ, dhɛɛdɩ- ɛ ˈˈpaa- ɛ ye ˈˈtun ɲɔn -wɛeˈ ɔ ˈye dhɩ dea -gwlɩˈˈ ˈŋwɔɔn- -zii -ɛ?
5. -Bɔyaˈˈ bo ɔˈ bhlaaˈ ˈdhe ɲʋn bho ˈbhleɛ ˈmʋnan-
Zoova deɛ -bɔyaˈˈ bo ɔˈ bhlaaˈ Zezi kwa. Ka Zezi nʋn dhbho -ˈnɔn ˈjhe sʋn -ɛn? Zro Jean 4:34, -ˈmɛn aʋ ˈtmʋn ideedɩ- nɩn anˈ dɩ:
Dhiidhɩ- ˈdhɔɛe -aa dhia a nʋɛnˈ -aa yea ˈkmʋn nɩn ˈˈdhe ɩan nʋɛnˈ -aa yea ˈmʋnan in nɩn -ke. Dhɛɛdɩ- Zezi ˈnaan Ɲɔnsoa aˈ glʋˈdɩ aˈ nʋanˈ -ɛ nɩan -bɔyaˈˈ bo ɔˈ bhlaaˈ -ke gɔ dhiidhɛ ɛˈ dhiaˈ -a?
ˈBhoo- -gwlɩˈˈ ˈdhee, ɲʋn -an bhla -bɔyaˈˈ bo ɛ, ˈmʋnan- -wɛ ʋa ˈjhee ˈbho -ɛ?
ˈSrɩn
ˈBho ˈˈdhruigbooɛ- -ɛɛ nʋʋan ˈbho ˈdhɔɔ ɔˈ gwɛa ˈmʋn ɛn, ˈdhɩ ˈbhɛɛa -ɩn -ˈyea ʋn sʋn bho po ˈˈdhe -ˈyea -bo -bhlaa -dee ˈdhe ɲʋn bho ɛ, poɩ -dheinˈˈ -kajɔɔnka.
ˈTmʋʋn- ɲɔn -nɩn -man ˈcɩan dhɩ -ka -man ˈbɔan -ˈyea dhɛ -to ˈdhe ˈˈdhruigbooɛ- -ɛɛ nʋʋan ˈbho ˈdhɔɔ ɔˈ gwea ˈmʋn ɛn. -Bho -man sa dhɛ to ˈdhe ˈˈdhruigbooɛ- -ˈnɛn ˈmʋn jheejhee ɛˈ, -bobhla- a muɛn ʋn kwa i ˈghwlʋ-.
-Jhii ˈsɛɛ- nɛn ɛnˈ ˈfɔ ɲʋn an ˈdhaa “Ɲʋn -ˈnʋʋn ˈnaan” -aeˈˈ “-Bho ɲɔn ˈnaan” in -wɛeˈ -ka -ˈyea nʋn ˈˈdhe -ˈyea ideedɩ- -aeˈˈ dɩ -dhee -ˈnɩɩn ɲʋn an ˈtmʋan ˈdhe -bobhlaaˈ ˈˈdhru ˈjha a, -ˈyeɛ jhibho-.
-BHO ƝƆN ˈNAAN: “-A ˈŋwɔn -e bho ˈman dhaiˈˈ?”
-Kawɛ -ˈbhɛɛ -ˈye ˈo dɩ ɔ deea- mʋn in -ˈnɩn ˈˈkpe tbha ˈˈdhe -ˈyeɔ dhɩ ˈcɩan ˈdhe Biiblʋ ˈdhi aˈ dɩ ˈtmʋʋn- -ɛn?
DHƐWƐ- ˈCƖAN-?
-Bɔyaˈˈ bo ɔˈ bhlaaˈ ˈdhe ɲʋn bho ˈbhleɛ ˈmʋnan- ˈˈdhe ɔɔˈ bhlaaˈ aˈ -deenanˈ ˈdhe ɲʋn bho se ˈˈɩkman-.
Dhɛwɛ -ˈŋwɔn in -ɛn?
Dhɛɛdɩ- -a ˈye -bɔyaˈˈ bo ɔˈ dɩ ˈtmʋn ˈdhe ɲʋn bho -ɛ?
Ka -ˈye nʋn -wɛeˈ -ˈyeɛ -to -ka -man ˈjhea ɲʋn ŋwɔn ˈdhe -bo -bhlaaˈ -a?
Ka -ˈye nʋn -wɛeˈ ˈse -faan in ˈdhe -bo -bhlaaˈ -a?
ˈBƆN DHƖ -ˈNƖƖN ANˈ I ˈŊWƆAN IN
Dhɩ aˈ kpɛ ɲiɛn nɩn ˈbhɛɛˈ -ɩn ˈye ʋn sʋn bho po -ˈye jw.org ɛˈ ɲʋndhasɛɛ i -jhii ˈˈdhe -ˈye -boyaˈˈ bo bhla.
Kplɩn anˈ kpɛ ɲiɛn ˈbhɛɛa -ɩn ˈyea ʋn sʋn bho po ˈˈdhe -ˈyea -bɔyaˈˈ bo bhla, ɩanˈ dɩ -mɩn ˈtmʋɛn- ˈnɔn ˈsɛɛ- nɛn ˈdhi.
“Es-tu pret à devenir un pêcheur dˈhommes?” (La Tour de Garde, septembre 2020)
Video nɔn ɔn ˈtmʋɛn Biiblʋ aˈ -bo dhueˈ ɔˈ dɩ -ɔ ˈbhɛɛ -ɔ ˈye -aʋ ˈkpɩ ˈˈɲɩn ˈˈdhe -a ˈye -bɔyaˈˈ bo bhla, -bho -a -nɩn ˈˈjhu ˈˈzaan mɔn -dhe ɛˈ.
-Ka -ˈbhɛɛa -ˈyea nʋn -wɛeˈ -ˈyea Biiblʋ aˈ dɩ ˈtmʋn ˈdhe -manˈ ˈcɛ -ʋʋ- sea Zoova jhibho- bho ɛ, ɛmɛn- -man mun ˈjhe- ˈnɔn ˈsɛɛ- nɛn ˈdhi.
“Touchons le cœur de nos parents non Témoins” (La Tour de Garde, 15 mars 2014)