Evangelio Juankwe

20 Bämän köböi kena, dekä ngwarbe kä nämäne iko ngwane, María Magdalena nikani dobobiti.* Aune jä dianinkä mento dobobiti jutuabare ie. 2 Aisete niara nikani betekä Simón Pedro aune ni ja tötikaka iti mada, abokän Jesús nämäne tarere yekänti aune niebare kwe ietre: “¡Däkien ñan nebera dobote, jäniki mento aune miri medente ñaka gare nunye!”.

3 Aisete Pedro aune ni ja tötikaka iti mada nikani dobo kokwäre. 4 Niaratre nibu nikani betekä gwairebe, akwa ni ja tötikaka iti ye niabare bäri jötrö Pedro kräke aune namani käne dobo yekänti. 5 Aune ja mikani kwintubu kwe nikrakäre gwäkäre ngwane, dänkwä lino jutuabare yete ie, akwa ñan nikani gwä. 6 Simón Pedro abokän nämäne näin köre ye nükani arato aune nikani gwä. Aune dänkwä lino jutuabare ie yete. 7 Dänkwäbiti Jesús dokwä minianinte ye ñan nämäne dänkwä mada mada yebe, ñakare aune, nämäne minianinkä aune mikani mentokwäre. 8 Ye bitikäre, ni ja tötikaka abokän namani käne dobobiti, ye nikani gwä arato, aune nikrabare kwe ngwane, kukwe niebare ie ye mikani era kwe jai. 9 Ñobätä ñan aune Jesús gadrekröta nitre ngwakare ngätäite nämäne tikani Ngöbö Kukweibätä ye ñan nämäne nüke gare ye ngwane ietre. 10 Aisete nitre ja tötikaka ye nikaninta ja gwirete.

11 Akwa María namani nünaninkä jubäre dobo ye ken muen. Aune ja mikani kwintubu kwe nikrakäre gwäkäre ngwane, 12 angeletre nibubätä dän ngwenbrere nämäne, nämäne täkäni Jesús ngwaka mikani ye käi känti. Iti dokwäkri aune iti ngotokri. 13 Aune angeletre ngwanintari ie: “Meri, ¿ñobätä mäta muen?”. Niarakwe niebare ietre: “Ñobätä ñan aune ti Däkien jäniki mento aune miri medente ñan gare tie”. 14 Mariakwe kukwe ye niebare ye bitikäre, nikwitaninte ja jiebiti aune Jesús nämäne nünaninkä yete jutuabare ie, akwa ni ye abokän Jesús ñan nükani gare ie. 15 Jesukwe ngwanintari ie: “Meri, ¿ñobätä mäta muen? ¿Nire känänta mäkwe?”. Ni ye abokän sribikä jardinbätä* namani ruin María ie, yebätä niebare kwe ie: “Däkien,* mä niki Jesús ngwaka ngwena ngwane, mäkwe miri medente niere tie aune ti näin ngwena”. 16 “¡María!”, niebare Jesukwe ie. María nikwitaninte kokwäre aune niebare kwe ie kukwe hebreo yebiti: “¡Rabbóni!” (ye abokän “dirikä” gärätä). 17 Jesukwe niebare ie: “Ñan ja ketate tibätä, ñobätä ñan aune ti jämi niken kä kwinbiti ti Rün känti. Nän nitre ja tötikaka tikwe yekänti aune niere ietre: ‘Ti bike niken kä kwinbiti ti Rün aune mun Rün yekänti, Ngöbö tikwe aune Ngöbö munkwe yekänti’”. 18 María Magdalena nikani nitre ja tötikaka känti aune kukwe ne niebare kwe ietre: “¡Tikwe Däkien turi!”. Aune Jesukwe dre niebare María ie ye Mariakwe tänbare ietre.

19 Bämän kömikata ye köböi kena derekri, nitre ja tötikaka ja ükaninkrö. Nämäne ja ükaninkrö yekänti jukwe dikani jabiti kwetre llavebiti, ñobätä ñan aune nitre judío jürä nämäne bätätre. Aune Jesús nükani niaratre ngätäite aune niebare kwe ietre: “Kä jäme raba munkwe”. 20 Kukwe ye niebare kwe ye bitikäre, ja kise aune ja krona mikani tuare kwe ietre. Aune nitre ja tötikaka ie Däkien jutuabare ngwane, käi namani juto krubäte bätätre. 21 Jesukwe niebareta ietre: “Kä jäme raba munkwe. Ti Rünkwe ti juani ye erere tita mun juen arato”. 22 Kukwe ye niebare kwe ye bitikäre, burie täkäbare bititre kwe aune niebare kwe ietre: “Tita üai deme bien munye. 23 Munkwe ngite kitai ta ni itibiti ngwane, ngite näinbiti ta. Munkwe ñaka ngite kitaibiti ta ngwane, ngite ñan näinbiti ta”.

24 Akwa nitre Ni Jätäbiti Nibu ye iti kädeka nämäne Tomás, abokän ie Munkin nie nämäne, ye ñan nämäne siba bentre Jesús nükani ye ngwane. 25 Yebätä nitre ja tötikaka mada namani niere ie: “¡Nunkwe Däkien turi!”. Akwa niarakwe niebare ietre: “Tikwe clavo träin kisete tuai aune tikwe kise kriai träinte bätä tikwe kise kriai krona träinte, angwane batibe tikwe mikai era jai”.

26 Aune köbö kwä ye bitikäre, nitre ja tötikaka Jesukwe ja ükaninkröta gwi, aune Tomás nämäne siba bentre. Jukwe nämäne dikani llavebiti, akwa Jesús nükani niaratre ngätäite aune niebare kwe ietre: “Kä jäme raba munkwe”. 27 Biti niebare kwe Tomás ie: “Kise mike nete, aune ti kise mike ñärärä. Kise krien ti krona träinte. Ti ñan ganinkröta ye mäkwe ñaka nie,* kukwe mike era jai”. 28 Ye ngwane Tomás käkwe niebare ie: “¡Ti Däkien aune Ngöbö tikwe!”. 29 Jesukwe niebare ie: “¿Mäta ti tuin yebätä mäta kukwe mike era jai? Nire jämi ti tuin akwa tä kukwe mike era jai yebätä kä juto”.

30 Ne madakäre, kukwe ñan tuabare keta kabre mada Jesukwe nuainbare nitre ja tötikaka okwäbiti, abokän ñan tä tikani rollo nebätä. 31 Akwa meden meden tikani nete ye tikani ne kwe, Jesús abokän Kristo, Ngöbö Monsoi, munkwe mikadre era jai. Aune munkwe mikadre era jai ye köböire ja nire raba nemen munkwe niara käbiti.