2. Ja di ngwandre gwairebe

¿YE NUAINDRE ÑO?

Nitre ja mäkäninte tä ja di ngwen gwairebe ngwane, tätre ja ngwen ni ru ngwanka kwinta aune dimikaka tä sribire jabe ye erere. Ñaka tätre töbike ja aibebätä, ñakare aune dre kwin niaratre nibu kräke yebätä tätre töbike, kukwe ño ño ben ja tuadre kwetre yebiti ta.

BIBLIA TÄ KUKWE NE DRIERE: “Ni nibu ye ñan rabadi ni nibu kwrere mda, akwa rabadi ni itibe kwrere” (Mateo 19:6).

“Ni brare aune merire käkwe ja di ngwandre gwairebe nünankäre kwin jabe” (Christopher).

¿NUAINDRE YE ÑOBÄTÄ ÜTIÄTE?

Nitre gure ñaka ja dimikai kwärikwäri ngwane, kukwe chi rabai kisete ükadrete kwetre näre, nire ngite yebätä rabaitre ja kwete. Mrä mada, kukwe chi rabai bäri kri.

“Ni brare aune merire käkwe ja dimikadre kwärikwäri ye ütiäte krubäte nünankäre kwin jabe. Ti aune ti muko, nun ñaka ja dimikadre kwärikwäri akräke, ni ja ketamukore tä nüne ju kwatibe te, akwa ñaka ja töi mike kukwe den nuaindre jai gwairebe ye erere nun rabadre ja ngwen” (Alexandra).

¿MÄ RABA DRE NUAINNE?

TÖBIKE JABÄTÄ

• ¿Mätä ngwian ganainne ye kaibe mäkwe ruin mäi?

• Mä muko kämikadrekä chi mäbätä, ¿ye ngwane batibe jata nemen ruin jäme mäi?

• Mä muko tä ja kete kwin mräkä kwebe, ¿akwa mä ñan ja kete kwin bentre?

KUKWE NE EREREBÄTÄ MUN RABA BLITE JABE

• ¿Kukwe meden känti nunta ja dimike kwin kwärikwäri?

• ¿Kukwe meden känti nun raba ja dimike bäri kwin?

• ¿Nun raba kukwe ükete ño jai ja dimikakäre kwin kwärikwäri?

NE NUAIN RABA

• Mun ja mäkäninte ye abokän ni bola täkätekä ye kwrere. ¿Mun raba dre nuainne ne kwe mun rabadre equipo keteitibe ye kwrere aune ñaka equipo mada yekri?

• Mä raba ganane ño yebätä mäkwe ñaka töbika, ñakare aune mun nibu raba ganane ño yebätä mäkwe töbika.

“Nire ngite ye ñaka bäri ütiäte, ñakare aune nünandre jäme jabe aune keteitibe ni mukokwe ye bäri ütiäte” (Erick).

BIBLIA TÄ KUKWE NE DRIERE: “Munkwe ñan töbika jändrän kuinbtä kaibe jakrä akwa, munkwe töbika jändrän kuinbtä ni mda mdakrä arato” (Filipenses 2:3, 4).