Jehovakwe Jonás ngübabare bätärekä

Kä Asiria yekänti juta keteiti kädeka nämene Nínive yete, nitre nämene ja ngwen blo krubäte. Jehovakwe ni niara kukwei niekä Jonás ye juani Nínive aune nitre rabadre ja töi kwite ye niedre kwe ietre. Akwa Jonás rikadre Nínive näre, jerekäbe ngitiani ji madabiti aune nikani ru mrente yebiti kä kädeka nämene Tarsis ye kokwäre.

Ru namanina mrenbiti angwane, murie dite ñübe minimini mata namani aune nitre ru ngwanka yebätä kä jürä namani krubäte. Niaratre orabare ngöbö kwetre yei aune namanintre ngwentari jai: ‘¿Ñobätä kukwe ne tä nemen bare nibätä?’. Mrä mada, Jonás niebare ietre: ‘Ye ti köböite. Jehová kukwe ribebare nuaindre tie ye ti ñaka tö nuain yebätä tita ngitie. Ti kite mrente ne kwe murie tä ñübe minimini ye rabadre kwekebe’. Nitre ru ngwanka ye ñaka tö namani Jonás kitai mrente, akwa niara namani ye ribere jankunu ietre. Aisete nitre käkwe niara kitani mrente aune murie dite ñübe minimini ye namani kwekebe.

Jonás krütai namani ruin ie. Niara jatani niken bäri mrente nguse ye ngwane orabare kwe Jehovai. Angwane, Jehovakwe gwa kri krubäte mikani Jonás ñainkä, akwa gwa ye ñaka niara kwetani. Jonás nämene gwa teri ye ngwane orabare kwe Jehovai: ‘Ti mä kukwei mikai täte käre ye tita käbämike mäi’. Jehovakwe Jonás tuanimetre köbömä gwa teri aune biti gwa mikani kwe niara yaire kä nötabiti.

Jehovakwe Jonás kriemikani, akwa ¿yebätä namani kwekebe mada? Ñakare. Jehovakwe juaninta bobukäre Nínive aune ye ngwane Jonás niara kukwei mikani täte. Jonás janamene aune niebare kwe nitre töi blo krubäte yei: ‘Köbö 40 te Jehová bike juta ne juen ngwarbe’. Angwane niara ñaka kukwe ngübare nemen bare erere namani bare. Nitre Nínive niara kukwei mikani täte aune ja töi kwitani kwetre. Rei juta Nínive yekwe niebare nitre ie: ‘Munkwe ja di kärä Ngöböi aune munkwe ja töi kwita, ye köböire niarakwe ñaka ni gadrete raba ruin tie’. Nitre ja töi kwitani jutuabare Jehovai, ye ngwane ñaka nitre ye ganinte kwe.

Jehovakwe ñaka nitre juta yete ganinte yebätä Jonás namani rubun. Mä raba töbike kukwe nebätä: Jehovakwe Jonás ngübabare bätärekä aune mikani tuin bobre kwe jai. Akwa Jonás ñaka nitre Nínive mikani tuin bobre jai. Jerekäbe namani täkäni juta ye bäre mentokwäre mrü kökräi täni aune ja ngwäre mikani rubun kwe. Ye bitikäre, mrü kökräi bä ngrötaninkä aune Jonás namani rubun krubäte. Aisete Jehová niebare ie: ‘Mrü kökräi ye bäri ütiäte mä kräke nitre Nínive ye ngwä. Ti abokän käkwe niaratre mikani tuin bobre jai aune ye medenbätä namaninte nire’. ¿Ngöbö tö namani kukwe meden driei ja töi kräke Jonás ie? Nitre Nínive ye namani bäri ütiäte kri mu ye kräke.