¿Ti niena juto?
¿Tita juto kukwe driekäre konkrekasion ben?
Kukweta jatäri ne mäta nuainne ngwane, mä rabaira juto ni kukwe driekä jämi ja ngökö ñöte erere.
Käre mäta orare, ja tötike Bibliabätä aune niken gätäbätä konkrekasionte ngwane.
Drebätä mäta ja kite ye ütiäte aune era mä kräke aune mä tö mikai gare nitre madai ngwane.
Mäta Jehová tarere aune ni Jehová tarekä yebe mäta ja kete ngwane.
Mä ñaka niena ja mike politicate o ja ükekrö iglesia ngwarbe yete ngwane.
Ngöbökwe kukwe ükaninte ye erere mäta nuainne aune mä tö ja mikai testiko Jehovakwe ngwane.
Mä niena juto kukwe driekäre konkrekasionbe ruin mäi ngwane, ni mä tötikaka raba blite nitre umbre ji ngwanka konkrekasionte yebe aune niaratre ja ükaikrö mäbe mä niena juto ye mikakäre gare jai.
¿Ti niena juto ja ngökakäre ñöte?
Kukweta jatäri ne mäta nuainne ngwane, mä rabaira juto ja ngökakäre ñöte.
Mä ni kukwe driekä jämi ja ngökö ñöte ngwane.
Mä raba kukwe driere nuai ye erere mäta ja di ngwen nuainne ngwane.
“Ni klabore ie tö ngwan raba bätä töbätä” tä kukwe ükete nuaindre ye erere mäta nuainne ngwane (Mateo 24:45-47).
Mäkwe orabarera Jehovai ja diankakäre mento kräke aune mä tö sribidi käre kräke ngwane.
Mä niena juto ja ngökakäre ñöte ruin mäi ngwane, ni mä tötikaka raba blite nitre umbre ji ngwanka konkrekasionte ben, aune niaratre ja ükaikrö mäbe mä niena juto ye mikakäre gare jai.