Nitre mrä ükadrete ja tuakäre rüe rakadrekä ye ngwane
1 Nitre tä kite ja tötike Bibliabätä aune töta nemen nünain ‘Ngöbö kukwei’ erere, ye abokän Satana kätä ja mike rüere (2 Tim. 3:12). Nitre sribi muko nikwe, nänkä kwelate nibe o nitre nünanka ni bäre ye raba ja mike ni rüere. Ruäre ni mräkätre arabe raba ja miketa ni rüere ye abokän ñaka nuäre nikrä (Mat. 10:21; Mar. 3:21).
2 Ni rüe rabai niebarera. Ni rüe rabai ye mikadre gare kwin nitre mrä yei, yeta mike gare ni niena ja mike ja tötikaka metre Kristokwe erere (Juan 15:20). Ruäre, nitre mada raba ja mike ni rüere, nitre testiko Jehovakwe ñaka gare ietre yebätä. Nita näin Kristo jiebiti bätä nita Ngöbö mike täte yebätä ni rüeta nakainkä, ye käkwe kä ngwandre juto nibätä (Hech. 5:27-29, 40, 41). Jehová käkwe nitre mrä ye dimikai ye mikadre gare kwin ietre (Sal. 27:10; Mar. 10:29, 30). Kä ngwain nüke jai kwe bätä ja ngwandi metre kwe ye käkwe mikai ja mike Jehovakri Gobran kwe ye mikakäre bäri kri (Pro. 27:11).
3 Ñobätä ütiäte ja tötikadre täte. Nitre ja tötikaka rüe rakadrekä akwa ütiäte krubäte ja tötikadre täte jankunu kwe, ye mikadre gare ietre. Kukwe nemen gare nie ye Satana ñaka tö tuai nirien ni brukwäbätä, aune ni rüe yebiti tä ni di ngwen nekä (Pro. 4:23; Luc. 8:13). Nitre mrä käkwe ja tötikadre täte jankunu Kukwe Ngöbökwe yebätä, ne kwe tödeka ye rabadre dite kwe (Sal. 1:2, 3; Col. 2:6, 7).
4 Kä ngwandre nüke jai. Kukwe tare rakadrekä nibätä ye ngwane ütiäte krubäte nikwe kä ngwandre nüke jai, aune ye köböire kukwe kwin krubäte raba nemen bare (Luc. 21:16-19). Nitre mrä rüeta nakainkä ye ngwane, kukwe kwin tä nemen bare kräke bätä nitre madakrä arato. Nitre kätä kä ngwen nüke täte jai, ye kräke Jehovata kukwe kwin mike nemen bare ye tä nemen gare metre ietre (Sant. 1:12).
5 Ja mräkätre Tesalónica ririabare kukwe ja üairebiti, ye käi namani juto apostol Pablo yebätä. Niara käkwe nitre kwati ie kukwe metre mikani gare aune debe biani kwe Ngöböi nitre yebätä (2 Tes. 1:3-5). Nitre ja tötikaka Bibliabätä nibe ye nikwe dimikadre kä ngwen nüke jai bätä ja tuakäre rüe rakadrekä yebe, ye käi raba nemen juto nibätä arato.