¿Ñokänti ni kukwe nuai kwetre?

1. ¿Ñobätä kukwe driedre ye ñaka nuäre nikrä? ¿Akwa ñobätä nita nuainne jankunu?

¹ Köbö Jehovakwe ye nibira nökrö ja ken krubäte, ye medenbätä bäri jötrö ngwarbe nikwe nitre mada dimikadre ne kwe kukwe Ngöbökwe ye rabadre gare täte ietre bätä Ngöbö töita ño ni kä nebätä kräke ye arato (Juan 17:3; 2 Ped. 3:9, 10). Ni kwati ñaka ni kukwe nuin bätä ruäre raba ni kötaire, nita kukwe driere ietre yebätä, ye medenbätä ñaka nuäre nuaindre nikrä (2 Ped. 3:​3, 4). Gare nie nita kukwe driere yekänti nitre ruäre raba ni kukwe nuin aune kukwe kwin Ngöbökwe ye kain ngäbiti. Akwa, ¿kukwe drie ñaka ie aune ñokänti ni kukwe nuai kwetre? (Rom. 10:14, 15).

2. ¿Apóstol Pablo käkwe kukwe bämikani ye kätä ni dimike ño?

² Ja tuin kukwe tare ben. Ni kwati raba Gobran Ngöbökwe ye kukwe nuin, yebätä nikwe ñaka kä jürä ngwandre jabätä. Ñodre; juta Filipo kä Europa känti, yete Pablo käkwe kukwe kwin driebare kena. Nitre käkwe kukwe ngwarbe niebare Pablo bätä Silas ye rüere angwane, niaratre nibu metani krimanabiti bätä kitani ngite (Hech. 16:16-​24). ¿Kukwe tare namani bare yebätä Pablo käkwe kä jürä ngwani jabätä? Ñakare, ne ñan ñobätä aune nikani Tesalónica känti kukwe driere aune ‘Ngöbökwe dimikani üai kwe yebiti’ ye köböire konkrekasion namani kä yekänti (1 Tes. 2:⁠2). Kukwe kwin bämikani ne kwe nikwe ñaka ja di ngwandre nekä (Gál. 6:9).

3. ¿Nitre ñaka nämene kukwe Ngöbökwe kain ngäbiti ye abokän dre raba töi kwite?

³ Nitre kwati ñaka nämene ni kukwe nuin kä kwati krubäte te, akwa kä nengwane tä ja töi kwite. ¿Ñobätä? Ruäre ngwian ñaka, bren, mräkätre tä krüte o kukwe tare nemen bare kä jökräbiti tibien yebätä nitre töi raba nikwite (1 Cor. 7:​31). Monsotre kia ruäre rün o meye nämene ja mike kukwe Ngöbökwe ye rüere arato, akwa ririabare aune matare tä kukwe Ngöbökwe kain ngäbiti. Nikwe kukwe driedre ietre ye köböire raba Jehová mike täte kä jämi krüte ye känenkri (Rom. 10:13).

4. ¿Dre kätä ni töimike kukwe driere “jankunu”?

⁴ Nuaindre “jankunu”. Ngöbö bätä nitre kä nebätä tare nikwe, ye kätä ni töimike kukwe driere bätä nitre tötike “jankunu”, nitre nänkä Jesube käkwe nuainbare siklo kena ye erere (Hech. 5:42). Kä nengwane, nitre kwati “tätre ja tare nike bätä ja muaire jondron käme nuainta” yebätä (Eze. 9:4). Akwa kukwe kwin Ngöbökwe kukwe nuata kwetre ye ngwane, töi nemen jäme bätä nemen tö ngwen arato. Ruäre ni kwati ñan törba ni kukwe nuai, akwa gare kwin nie nita ja di ngwen kukwe driere ye käita nemen juto Jehovabätä ye Biblia kätä mike gare metre nie (Heb. 13:​15, 16).