¿Dreta ni töi mike kukwe driere?
1. ¿Kukwe drieta nikwe yebiti nita bämike ño ja tare nikwe?
1 Kukwe kwin Gobran Ngöbökwe yebätä driedre kä nengwane ye sribi bäri kwin ni raba nuainne, ñobätä ñan aune ye erere nita kukwe ketebu bäri ütiäte biani nuaindre ye mike täte: Jehová taredre aune ni mada taredre (Mar. 12:29-31). Ja tare ye raba ni töi mike kwatibe kukwe driere jankunu (1 Juan 5:3).
2. ¿Jehová tare nikwe ye nita bämike ño kukwe drieta nikwe yebiti?
2 Jehová taredre. Kä nikanina 6.000 ta yete Satana tä Jehová bämike käme, akwa Jehová, Ja Ketamuko bäri tare nikwe ye kätä ni töi mike ja mike niarakri (2 Cor. 4:3, 4). Diablu ye köböite, nitre tä nütüre Ngöböta nitre kukwe blo nuainkä mike ja tare nike kä ñukwäre te, niara ye ni nimä ngöböre itibe abokän ñaka raba nemen gare o töi ñaka nibätä. Nitre kwati ie nüke gare niara ye ñaka tärä jire chi. Ni Rün kä kwinbiti yebätä kukwe metre rabadre gare nitre jökrä ie ye käi rabadre juto nibätä, ¿ñan ererea? Nita ja di ngwen ja ngwankäre testiko kwin niarakwe angwane, nita kä mike juto brukwäbätä aune Diablu tä kukwe ükete ye rüere nita ja mike (Prov. 27:11; Heb. 13:15, 16).
3. ¿Ñobätä kukwe drieta yebiti nita bämike ni mada tare nikwe?
3 Ni mada taredre. Batire batire nita kukwe driere ni madai, yebiti nita bämike ni ye tare nikwe. Kä blo krubäte te nita nüne yebätä kukwe kwin mikadre gare drekebe ngwarbe nitre ie ye gare kwin nie. Nitre kwati töita nitre Nínive nünanbare Jonás näire ye erere, niaratre ye töi nämene “ngäbäkre kiakia töi ñakare kwrere” (Jon. 4:11, Jonás/Rut, Sociedad Bíblica de Panamá). Akwa nünandre kwin kwetre aune kä jutobiti ye ni raba driere ietre kukwe drieta nikwe yebiti (Is. 48:17-19). Nita niaratre mike tö ngwen kukwe ja känenkäre yei arato (Rom. 15:4). Aune kukwe drieta nikwe ye kukwe nuai kwetre bätä kukwe nemen gare ietre ye erere nuaindi kwetre angwane, rabaite kwäre (Rom. 10:13, 14).
4. ¿Dre abokän Jehovakwe ñaka käi kwitaikä jire jabiti?
4 Monso töi kwin yekwe rün aune meye tare ye tä bämike kä jökrä ngwane, aune ñaka kä ruäre aibe te. Ye erere arato, Jehová aune ni mada tare krubäte nikwe ye tä ni töi mike kukwe driere kä jökrä te, aune nita niken kukwe driere ye ñan aibe ngwane. Ye medenbätä nikwe kukwe driedre bäri (Hech. 5:42). Nikwe nuaindi ye erere angwane, ni mada tare nikwe nita bämike ye Jehovakwe ñaka käi kwitaikä jire jabiti (Heb. 6:10).