Kukwe ngwantarita
◼ ¿Nikwe dre nuaindre ne kwe nitre tä gätä kukwe nuin konkrekasionte ja tötikakäre ye ñaka töi nikadre? (Deu. 31:12.)
Jehová bätä gätä nuainta konkrekasionte ye ütiäte nikrä, ye medenbätä ni jökrä käkwe ja töi mikadre nüke gätä ye känenkri ne kwe ni tädre juto ja tötikakäre Ngöbö kukwei yebätä. Ju ja ükarakrö yete täkärä ükaninte käne yekänti ni raba nemen täkäni, ne kwe täkärä mrä ye mikadrete nitre monsoibe bätä nitre ruäre tä nüke gätä kömikata ye bitikäre yekrä. Gätä kömika jämi känenkri celular bätä jondron mada ükadrete ne kwe ñaka ngö rabadre ni mada töi nikakäre. Ni jökrä käkwe gätä ye mikadre tuin ütiäte jai angwane ñaka kukwe mada nuaindre nitre mada töi nikakäre (Ecl. 5:1; Fili. 2:4).
Nitre tä kite nüke kena gätäbätä aune ni iti konkrekasionte ie nitre ye gare raba nemen täkäni nitre ye ken. Nitre kätä monso kia ngwen jabe yekrä kukwe ne kwin krubäte. Nitre tä nüke kena gätäbätä ye käkwe täkädre täkärä mikaninte mrä yete angwane ye raba nemen kwin nitre yekrä; ne kwe nitre rüne törbadre monso kia ngwen jubäre ye ngwane ñaka rabadre nitre mada töi nike (Pro. 22:6, 15). Nitre ye ñaka raba nemen täkäni sala madate, ñobätä ñan angwane monso kia raba niken ja denkä yete. Ye medenbätä rün o meye kwe rikadre ngwena jubäre blitakäre ben o kukwe mada nuainkäre kräke, akwa ye bitikäre rikadreta ngwena gätä kukwe nuakäreta.
Ju Ngöbö mikakäre täte yete nitre ni käi ükatekä raba kukwe kwin bämike, ja mräkätre mada dimike täkärä känene bätä nitre ruäre tä nüke gätä kömikata ye bitikäre medente raba nemen täkäni ye dimikakäre arato, akwa nuaindre töi jämebiti bätä töbikadre kwin kwetre ne kwe ñaka nitre mada töi nikadre. Kukweta nakainkä ye ngwane tätre töbike kwin käne kukwe ye ükatekäre. Monsotre ñaka rabadre nitre mada mike gätä kukwe nuin kwin angwane niaratre rabadre ja töimike nitre rüne ye dimike.
Ja tötikakäre kwin kukwe Jehovakwe yebätä aune kukwe käbämikata kwe nie känti kukwe kwin mikai nemen bare kädrieta gätäte, yekrä ni jökrä käkwe dre nuaindre ye nibira gare nie (Heb. 10:24, 25).