Sribi bäri ütiäte tä ni kisete
1. ¿Sribi Ngöbökwe ye ütiäte nikrä angwane ni tädre juto dre nuainkäre?
1 ¿Ñobätä ni nübaita käre kä denkä jai kukwe driere jondron nikwe bätä ja di ngöi yebiti? ¡Ñobätä ñan angwane sribi ye bäri ütiäte! Sribi nuainta nikwe ye ñaka nuaindi bobukäreta aune kukwe meden kwin tä nemen bare sribi ye köböire, yebätä nikwe töbikadre angwane ye käkwe ni töimikai sribi ye nuainne bäri (Hech. 20:24).
2. ¿Kukwe drieta nikwe yebiti nita Jehová käikitekä ño?
2 Jehová käikitakata. Kristo rabai Reire Gobran Jehovakwe yete aune gobrandi kwe gobran jökrä kä nebätä ye täte bätä ja tare nikata ye jökrä diainkä kwe; nita kukwe driere ye ngwane kukwe ye mikata gare (Mat. 6:9, 10). Jehová aibe raba ni mike kwäre bren bätä gata yebätä ye mikata gare arato (Isa. 25:8; 33:24). Ne madakäre, nita niara kä ye mike gare kä jutobiti bätä nita ja ngwen kwin angwane, ye käkwe nitre mada töimikai Jehová käikitekä siba (1 Ped. 2:12). ¡Jehová ni Gobranka Kri ye nita mike gare Kä jökräbiti tibien, ye kätä kä mike juto krubäte nibätä! (Sal. 83:18.)
3. ¿Kukwe drieta nikwe nitre tä käin ngäbiti aune dre kwin tä nemen kwetre?
3 Nitre mikata kwäre. Jehová “ñan tö ni[tre] tuai nete, akwa niara tö ni jökrä tuai ja töi kwite” (2 Ped. 3:9, Ngöbö Täräe [NGT] (tärä okwä ükaninte mrä)). Akwa ñaka kukwe driedre ietre, ¿ñokänti kukwe kwin bätä kukwe käme Ngöbö okwä känti ye rükadre gare ietre? (Jon. 4:11; Rom. 10:13-15.) Nitre kätä kukwe kwin ye kain ngäbiti bätä tä kukwe käme nuainta kwetre ye tuenmetre angwane raba nüne kärekäre kä ja känenkäre yete, akwa ye ñan aibe ngörä, kä nengwane raba nüne kä jutobiti arato (Miq. 4:1-4). Nikwe kukwe driedre käre ye köböire ni aune nitre tä ni kukwe nuin ye raba nemente kwäre (1 Tim. 4:16). ¡Sribi ütiäte krubäte nuainta nikwe!
4. ¿Ñobätä nikwe Gobran Ngöbökwe kukwei driedre bätä nitre tötikadre käre?
4 Kukwe tare krubäte köböra nemen bare, känti nitre käme gaite, akwa nitre ja mikaka Jehovakri abokän rabaite nire. Kukwe driedre bätä nitre tötikadre ye sribi kwin krubäte bätä bäri ütiäte nuainta kä nengwane. Ye medenbätä, nikwe ja töi mikadre sribi ye nuainne käne jondron mada yebätä (Mat. 6:33.)