Kukwe driedre kä jutobiti Jesús erere

1. ¿Nitre testiko Jehovakwe aune nitre mada tä ja bien kristiano ye ñobätä ñaka ja erebe?

NITRE kristiano erametre töita kukwe driebätä. Ñan tä ja ngwen nitre kristiano ja bämikaka jerekäbe ye erere (Tito 2:14). Akwa yebiti ta ruäre ngwane, kä ñan rabai juto nibätä kukwe driekäre. Ni umbre ji ngwanka konkrekasionte käkwe kukwe ne mikani gare jabätä: “Ruäre ngwane ti ñan töta nemen kukwe driei jire” kukwe ne erere raba nemen bare nibätä arato.

2. ¿Ñobätä ruäre ngwane kä ñan tä nemen juto nibätä kukwe driekäre?

² Sribi jene jene nuainta Jehová kräke ye bäri tä nemen tuin kwin ja mräkätre ie kukwe drie ye kräke. ¿Ñobätä? Ñobätä ñan aune, Ju Ja Ükarakrö sribeta, labores de socorro yete ja mräkätre dimikata bengwairebe ye tä nemen tuin kwin krubäte ja mräkätre kräke. Ne madakäre, nita sribire ja mräkätre ben yekänti käta jäme aune ni tare erametre bätä nita ja di ngwen yebätä debe bianta nie aune mikata ütiäte. Akwa, nita kä ruäre känti kukwe driere mekerabe aune kukwe drieta nikwe ye nitre ruäre tä kukwe nuin. Aune nitre mada abokän ñaka töta nemen kukwe nuin. Aune gare metre nie, kä krüte ne tä nökrö bäri ja ken ye ngwane, ja mika rabai bäri ni rüere (Mat. 10:22). ¿Dre käkwe ni dimikai jankunu ja di ngwen o kukwe driere bäri kä jutobiti?

3. ¿Lucas 13:​6-9 ye tä dre driere nie Jesús yebätä?

³ Kukwe ruäre raba ni dimike kukwe driekäre kä jutobiti ye abokän Jesukwe kukwe bämikani kwin ni käne yebätä nikwe ja kitadre. Nämäne kä tibienbätä ye ngwane, kukwe drie ye käi namani bäri jutobätä aune kukwe driebare bäri kwe (ñäkädre Lucas 13:​6-9 yebätä). Jesús ara ja ketani ni iti nämäne kri higuera ngübare kä kömärä jire yebätä, akwa kri ye ngwä ñaka namani. Ye erere arato, niara kä komä kukwe driebare nitre judío ie, akwa nitre braibe ja mikani ja tötikaka kwe. Akwa ni iti ñaka ja di ngwani nekä kri higuera ngwä ngübakäre ye erere, Jesús ñaka ja di ngwani nekä kukwe driekäre, ñakare aune ja töi mikani kwe kukwe driere nitre jökrä ie aune kä jutobiti ne kwe kukwe metre ye rabadre brukwäte.

4. ¿Nibike ja tötike kukwe ketabokä medenbätä?

⁴ Sö namanina krä ti aibe Jesús käne kä tibienbätä ye ngwane, kukwe driebare ño bäri kwe yebätä nikwe ja tötikai kukwe ja tötikara nekänti (nota de estudio “Después de estas cosas” Lucas 10:1 yekänti ye mikadre ñärärä). Kukwe ketabokä biti Jesús kukwe kwin bämikani ni käne ye rabai gare nie: 1) ja töi mikani kwatibe kwe Jehová mikabätä täte, 2) kukwe rabai bare niebare yebätä ja töi mikani kwe, 3) Jehovakwe dimikai yei tö ngwani kwe aune 4) ñan ja ngwani di nekä kwe, ñakare aune nitrekwe kukwei nuai yei nämäne tö ngwen.

JA TÖI MIKANI KWE JEHOVÁ TÖI NUINBÄTÄ

5. ¿Jesús töi nämäne kwatibe Jehová töi mikabätä nemen bare ye bämikani ño kwe?

⁵ Jesukwe “kukwe kwin Gobran Ngöbökwe” yebätä driebare kä jutobiti, Jehová tö namani ye erere (Luc. 4:43). Jesús nämäne kä tibienbätä ngwane, kukwe drie ye nämäne bäri ütiäte kräke. Sö namanina braibe niara käne kä tibienbätä ye ngwane, niarakwe kukwe driebare bäri “juta kwatirekwatire te” (Luc. 13:22). Arato nitre ja tötikaka kwe ye kitani kwe kukwe driekäre bäri kwin niara nämäne nuainne ye erere (Luc. 10:1).

6. ¿Sribi keta kabre ja üaire bianta nie ye tä kukwe drie ye dimike ño? (Üai mikadre ñärärä).

⁶ Kä nengwane, kukwe kwin Gobran Ngöbökwebätä driedre ye sribi bäri ütiäte nuaindre nikwe ie Jehová bätä Jesús tö (Mat. 24:14; 28:​19, 20). Sribi jökrä nuainta Jehová kräke ye tä kukwe drie ye dimike. Ñodre, nitre ie kukwe drieta ye raba niken Jehová mike täte Ju Ja Ükarakrö sribeta nikwe yete. Sribita betelte bätä kä mada känti yebiti kukwe drie dimikata. Kukwe tare tä nemen bare ngwane, nita labores de socorro dimike akwa jondron tä nete ja mräkätre kän ye ñan aibe biankäreta ie, ñakare aune rabadre kukwe ja üaire ye miketa nuaindre jai yekäre, ye ngätäite kukwe drie ye tä. Kukwe driedre ye sribi bäri ütiäte mikadre nuaindre jai ie Jehová tö ye ngwandre törö jai. Aisete ni töita kukwe driebätä ye jatai nirien bäri. Ni umbre ji ngwanka konkrekasionte iti nünanka Hungría kädekata János tä niere: “Käre tita ngwen törö jai sribi keta kabre ye nuain ñan raba jire kukwe drie ye täte. Ñobätä ñan aune, kukwe drie ye sribi bäri ütiäte tä ni kisete”.

7. ¿Ñobätä Jehová tö ni tuai kukwe driere jankunu? (1 Timoteo 2:​3, 4).

⁷ Kukwe mada raba ni dimike kukwe drie ye käi ngwen juto krubäte jabätä, ye abokän nitre tuin ño Jehovai ye erere mikadre tuin jai. Nitre kwati krubäte käkwe kukwe metre ye kukwe nuadre aune kadre ngäbiti kwe ie Jehová tö (ñäkädre 1 Timoteo 2:​3, 4 yebätä). Kukwe metre yebiti nitre raba nemente nire gare Jehovai. Yebätä tä ni tötike ne kwe ni raba niken kukwe metre ye ngwena nitre jökrä ie. Ñodre, täräkwata mrä kädekata Nitre tarere tötikakäre yete blita kömikadre ño aune ja tötika kömikadre ño ni iti ben ye mikata garebätä. Ne madakäre, niaratre ñan ja tötika kadre ngäbiti akwa ja tare nikadi kri ye jämi krüte känenkri niaratre raba kai ngäbiti. Nita kukwe driere nengwane ye raba niaratre töi mike ja töi kwite ja känenkäre. Ye medenbätä ütiäte krubäte ja di ngwandre kukwe driere.

TÖBIKATARIBARE KWE PROFECÍA YEBÄTÄ

8. ¿Profecía nämänena gare Jesús ie yekwe dimikani ño?

⁸ Profecía Jesubätä ye näin nemen bare ño jatäri ye namanina gare ie, yebätä kä komä biti ötare aibe niarakwe kukwe driei kä tibienbätä nämäne gare ie (Dan. 9:​26, 27). Arato murie ketai ño aune ñongwane ye nämänena gare ie, ñobätä ñan aune kukwe ye käbämikani (Luc. 18:​31-34). Profecía nämäne gare kwin Jesús ie, yebätä kä dianinkä kwe kukwe drie ye aibe kräke, sribi mikani Jehovakwe kisete ye mikakäre krüte.

9. ¿Ñobätä profecía Bibliabätä ye tä ni töi mike kukwe driere bäri?

⁹ Profecía Bibliabätä rükadre gare kwin nie ye ni dimike kukwe driere bäri. Kä ne köböi krüte gare nie. Profecía Bibliabätä tä blite kä krüte näire yebätä ye tuin metre nie, kukwe nakainkä käbiti tibien aune nitre tä ja ngwen ño yebiti. Kä krüte näire rei mötörikri rüdi ye abokän juta (Estados Unidos aune Reino Unido) bätä rei ngwitärikri (Rusia bätä juta ja ketaka ben) ye nibira nemen baretuin metre nie (Dan. 11:40). Profecía tä tikani Daniel 2:​43-45 yete jondron üai tuabare känti mrä temen ngoto yebätä blitata, ye abokän juta dite Reino Unido bätä Estados Unidos ye gärätä. Kä nebera braibe Gobran Ngöbökwe käkwe gobran kä nebätä ye gaite, ye ie tö ngwain bäri ja tötikai profecía nebätä ngwane. Profecía tä nemen bare yebiti nüke gare nie köbö meden näire nita nüne aune ye tä ni töi mike kukwe driere bäri.

10. ¿Kukwe meden mada tä mikani Profeciabätä abokän tä ni dimike kukwe driere bäri?

¹⁰ Profecía Bibliabätä ye tä kukwe ütiäte mike gare tä nemen gare nie ngwane, ni töta nemen driedi ni madai. Meri testiko iti kädekata Carrie tä kukwe driere República Dominicana tä niere: “Kukwe kwin Jehovata käbämike ja känenkäre yebätä tita töbike ngwane, tikwe tändre ni madai tita nemen nütüre. Kukwe ben nitre tä ja tuin, tuin tie ye ngwane, Jehovakwe ñaka kukwe kwin käbämikani ti aibe kräke, ñakare aune nitre ye kräke arato nüke gare tie”. Profecía tä Bibliabätä ye tä ni dimike kukwe driekäre jankunu ñobätä ñan aune Jehová tä juto biare ni dimikakäre tä ye ngwen törö nie. Meri testiko iti nünanka Hungría kädekata Leila tä niere: “Isaías 11:​6-9 tä ne driere tie, Jehová raba ni iti dimike ja töi kwite. Ye tä ti dimike kukwe driekäre jankunu, nitre ñan ti kukwe nuai tä nemen ruin tie yebiti ta”. Ja mräkä iti kädekata Christopher nünanka Zambia tä niere: “Kukwe driedi kä jökräbiti tibien marcos 13:10 tä mike gare, yebätä ti töita kwatibe kukwe driebätä aune ti tö profecía ne mikai nemen bare siba”. ¿Aune mä? ¿Profecía meden tä mä dimike kukwe driere jankunu?

JEHOVAKWE DIMIKAI EI TÖ NGWANI KWE

11. ¿Jesús rabadre kukwe driere jankunu yekäre rabadre tödeke Jehovabiti ye ñobätä nämäne ribere jai? (Lucas 12:​49, 53).

¹¹ Jehovakwe Jesús dimikai kukwe driere yei Jesús nämäne tö ngwen kwatibe. Jesús nämäne kukwe driere ngwane, nämäne nuainne töi kwinbiti aune nämäne ni mada mike ütiäte jai, akwa yebiti ta nitre rikwitai jabätä aune ja mikai jume niara rüere nämäne gare ie ( ñäkädre Lucas 12:​49, 53 yebätä). Arato nitre ji ngwanka kukwe ngwarbebätä brukwä namani Jesús kräke yebätä bä kabre tö namani murie ketai (Juan 8:59; 10:​31, 39). Akwa yebätä Jesukwe ñaka kukwe drie tuanimetre jire, ñobätä ñan aune Jehová nämäne ben ye nämäne gare ie. Niara ara käkwe niebare: “Ñan tita kukwe ükete kaibe ja töi jenbti, ti Rün käkwe ti juani abko käta kukwe ükete ti ben” (Juan 8:16). Arato niebare kwe: “Ti Rün tä ti mikete ñakare kaibe, ñobätä ñan aune dre tuin kwin ie abokän erere tita nuainne” (Juan 8:29).

12. ¿Jesukwe nitre ja tötikaka kwe ye kitani ño ne kwe rabadre kukwe driere jankunu ja mikadre rüere yebiti ta?

¹² Nitre ja tötikaka ye Jehovakwe dimikai yebiti rabadre tö ngwen käbämikani Jesukwe ietre. Ja mikai niaratre rüere nämäne gare Jesús ie yebätä bä kabre Jehová täi biare dimikakäre ye ngwani törö kwe ietre (Mat. 10:​18-20; Luc. 12:​11, 12). Niaratrekwe ja ngübadrebiti ribebare kwe ietre arato (Mat. 10:16; Luc. 10:3). Ne madakäre, nitre ñan törbadre niaratre kukwe nuai ngwane, ñaka töi mikadre kwetre ja dibiti nuainne niebare Jesukwe ietre (Luc. 10:​10, 11). Ja mikadre rüere ngwane niaratre gitiadre Jesukwe niebare ietre (Mat. 10:23). Jesús nämäne tö ngwen Jehovabiti aune nämäne kukwe driere kä jutobiti akwa ñan nämäne ja mike kukwe kri te (Juan 11:​53, 54).

13. ¿Jehovakwe mä dimikai yei ñobätä mäkwe tö ngwandi kwatibe?

¹³ Kä nengwane, ja mikata ni rüere arato ye medenbätä Jehovakwe ni dimikadre jankunu kukwe driekäre kä jutobiti ye nita ribere jai (Apoc. 12:17). ¿Jehovakwe ni dimikai ye ñobätä tädre gare nie? Ñobätä ñan aune, Jesukwe orasion nuainbare Jehovai tä tikani Juan kapitulo 17 yete ngwane, nitre apóstol ngübadrebiti ribebare kwe Rün ie, ye erere namani bare. Tärä Hechos yete Ngöbökwe nitre apóstol dimikani ño kukwe driere kä jutobiti ja mikani rüere ye ngwane, ye mikata gare. Arato Jesukwe orasion nuainbare ngwane, nire käkwe kukwe metre yebiti tödekadre ye dimikadre kwe ribebare kwe. Ye ngwane, nämäne blite nibätä arato nie raba. Jehovakwe nitre apóstol dimikani ye erere tä ni dimike jankunu nengwane yebiti nikwe tö ngwandre kwatibe (Juan 17:​11, 15, 20).

14. ¿Ni kukwe drie kä jutobiti jankunu ye ñobätä tädre gare metre nie? (Üai mikadre ñärärä).

¹⁴ Kä krüte tä nökrö bäri ja ken yebätä ñan raba nemen nuäre ni kräke kukwe driekäre kä jutobiti. Akwa nita dre ribere jai ye erere täi nikwe käbämikani Jesukwe (Luc. 21:​12-15). Jesús aune nitre ja tötikaka ben erere, nitre tö ni kukwe nuai o ñakare ye tuadremetre den jai, ñan ja kwetadre bentre. Juta ruäre känti ñan nuäre kukwe driekäre ja mräkätre kräke akwa yebiti ta tätre kukwe kwin Gobran Ngöbökwe yebätä driere jankunu, ñan tätre tö ngwen akwle jai, ñakare aune tätre tö ngwen Jehovai. Siklo kena ye ngwane, Jehovakwe nitre niara mikaka täte ye dimikani “kukwe driere ja di tätebiti”, ye erere kä nengwane niarata ni dimike kukwe driere nememe ñan kukwe driemana kwe ye ngwane (2 Tim. 4:17). Tö ngwandre kwatibe kukwe ne ie: tö ngwain Jehovabiti ngwane, ni dimikai kwe kukwe driekäre kä jutobiti.

TÖ NGWANI KWANI KWATIBE KWE

15. ¿Kukwe drie ye nämäne tuin ütiäte Jesús ie ye ñokänti gare nie?

¹⁵ Nitrekwe Jesús kukwe nuai aune kukwe kwin Gobran Ngöbö yebätä kai ngäbiti yei nämäne tö ngwen ye käkwe dimikani kukwe driere jankunu kä jutobiti. Kä 30 jatanina niken ta ngwane, nitre kwati käkwe kukwe metre ye kani ngäbiti ye medenbätä Jesukwe nitre ye ketani nüra ngwä tärä nemen ötakäre tirete ye kwrere yebätä (Juan 4:35). Kä nikani kwati näre ta ye bitikäre, Jesukwe niebare nitre ja tötikaka kwe ie: “Jondron tä ere ötadre” (Mat. 9:​37, 38). Ja känenkäre Jesukwe niebareta ietre: “Nura nena biare kabre ötadre, […] aisete sribi Bkänkä Ngöbö käkwe sribikä mda mda juandre jötrö sribire abko munkwe ribe ie” (Luc. 10:2). Nitre kwati raba kukwe metre kai ngäbiti nämäne gare Jesuye, ye erere ni iti nämäne kukwe metre kai ngäbiti ngwane kä nämäne nemen jutobätä (Luc. 10:21).

16. ¿Jesukwe kukwe meden bämikani ni dimikakäre kukwe drie ye mike tuin kwin jai? (Lucas 13:​18-21; üai mikadre ñärärä).

¹⁶ Kukwe drieta ye ngwane, kukwe kwin tä nemen bare yebätä nitre ja tötikaka käkwe ja töi mikadre, ye köböire kukwe driedi kwetre kä jutobiti niebare Jesukwe ietre. Ani ja kite kukwe ketebu Jesukwe bämikani yebätä (ñäkädre Lucas 13:​18-21 yebätä). Kukwe bämikani kena Jesukwe ye abokän, nura mostaza ye nura chi biti tä nirien tä nemen kri krire näre kwin, ye kwrere Jesukwe Gobran Ngöbökwe bämikani. Yebiti mikani gare kwe kukwe kwin Gobran Ngöbökwe ye nitre kwati rabai kai ngäbiti aune ñaka ketabätä raba jire chi. Kukwe ketebu bämikani Jesukwe ye abokän kukwe kwin Gobran Ngöbökwe ye ketani kwe levadura yebätä. Yebiti bämikani kwe kukwe kwin Gobran Ngöbökwebätä ye driedi kä jökräbiti tibien ye köböire nitre ruäre käkwe ja töi kwitai, nitre ja töi kwitai ye ñaka rabai tuin bengwairebe yebiti ta. Kukwe drie ye rabai bare kwin ye Jesukwe mikani nüke gare nitre ja tötikaka kwe ie kukwe bämikani kwe ietre yebiti.

17. ¿Ñobätä nikwe ja di ngwandre kukwe driere jankunu kä jutobiti?

¹⁷ Kä kwatire kwatire te Jesukwe ja nire biani ni ütiäre Ngwanta törö jai yebätä nitre kwati tä kwen. Arato nitre kwäti tä ja tötika ye kömike bätä tä kukwe driere siba nibe aune tätre ja ngökö ñöte kukwe jökrä ne tä ni dimike kukwe driere jankunu kä jutobiti. ¿Ni nibe jämi kukwe metre ye ka ngäbiti? ñan gare nie. Akwa Jehovata nitre kwati ükekrö rabakäre nire ja tare nikai kri ye näire yebrä gare nie (Apoc. 7:​9, 14). Jehová ye abokän nura ngwä bäkänkä yebätä nura ngwä ririai bäri gare ie. Ye medenbätä ja di ngwandre kukwe driere jankunu.

18. ¿Dre jutuadre nibätä ni madai ie ni tö?

¹⁸ Nitre ja tötikaka metre Jesukwe tä kukwe driere kä jutobiti yebätä nüke gare. Nitre ja tötikaka Jesukwe yebätä kä jürä ñaka nämäne blitakäre yebätä nükani gare nitre mada ie nitre ye “käkwe dikakabare Jesube abko gani btä kwetre” (Hech. 4:13). Nita niken kukwe driere ye ngwane, nita kukwe driere kä jutobiti Jesús erere ye jutuadre nitre mada ie, ie ni tö.