¿Nita dre bämike nitre mada okwäbiti?
1. ¿Nitre ja tötikaka Jesube yei dre namani gare Jesús yebätä?
1 Jesukwe niebare: “Munkwe ja mika tribe tikwe ngwianka tibe aune munkwe ja tötika tibätä” (Mateo 11:29, nota). Erametre, niara nämene kukwe bämike kwin aune ñaka nämene dirire jerekäbe ja kukweibiti. Jesús käkwe kukwe kwin driebare nitre ja tötikaka ben yei. Töi nämene kwin bätä nämene nitre mada tarere ye bämikani kwe ietre (Mat. 8:1-3; Mar. 6:30-34). Töi nämene bobre (Juan 13:2-5). Nitre ja tötikaka ben nämene niken kukwe driere ye ngwane, Jesús nämene kukwe driere kwin aune sribire krubäte ye niaratre nämene tuin (Luc. 8:1; 21:37, 38). ¿Nitre kätä ni tuin kukwe driere ye ngwane nita dre bämike ietre?
2. ¿Nita ja ükete bätä ja ngwen kwin kukwe drieta ye ngwane ye raba nitre töimike ño?
2 Nitre ie kukwe drieta. Nita ja ükete kwin, ja ngwen kwin bätä ja töimike ni mada dimikabätä, ye raba niaratre töi kwite (2 Cor. 6:3; Fili. 1:27). Nita blite käre Biblia yebiti ye tä nemen gare ietre, aune tädre blite ye ngwane nita kukwe nuin ye nemen tuin kwin ietre arato. Nitre käkwe Gobran Ngöbökwe kukwei nuadre yekäre ütiäte krubäte kukwe nini nete ye nuaindre.
3. ¿Ni raba dre nuainne ja mräkätre töi mikakäre kukwe kwin nuainne?
3 Ja mräkätre kukwebätä. Ni raba ja mräkätre töimike kukwe kwin nuainne arato. Nita kukwe driere käre kä jutobiti angwane ye käkwe ja mräkätre töimikai nuainne erere arato. Hierobiti hierro mada tutikata, ye erere nikwe ja ükadrete kwin angwane ye raba ja mräkätre “dimike” ja ükete kwin kukwe driekäre arato (Pro. 27:17). Nitre tö Ngöbö kukwei mikai gare jai ye nita kä tike täräbätä jai aune ja di ngwen nikenta tuinbiti jötrö ngwarbe, ye raba ja mräkätre töimike nuainne arato. Nita kukwe driere täte angwane ye käkwe ja mräkätre töimikai nuainne erere arato (2 Tim. 4:5).
4. ¿Ñobätä nikwe töbikadre kukwe bämikata ni mada okwäbiti yebätä?
4 ¿Mätä dre nuainne aune dre niere ye tä mate ño nitre madabätä, yebätä mä tärä töbike? Nita kukwe kwin bämike ye käkwe kä mikai juto Jehovabätä aune ja rabai ruin nie apóstol Pablo käkwe kukwe niebare erere: “Tita ja ngwen Kristo erere, ye erere munkwe ja ngwan ti erere” (1 Cor. 11:1).