Mäkwe diri bäri kwin: mäkwe nitre ja tötikaka ye kita kukwe driekäre

Ñobätä ütiäte. Nitre ja tötikaka mrä mrä Jesukwe rabadre “jändrän jökrä” niebare kwe ye mike täte, ñodre, rabadre kukwe metre ye driere (Mat. 28:19, 20, Ngöbö Täräe, tärä okwä ükaninte). Nitre ja tötikaka Bibliabätä kwati tä kukwe kädriere Kwela Sribi Ngöbökwe Kräke yete aune ruäretre tärä kukwe driere mräkätre bätä ja ketamuko kwetre yei. Bätärekä bätärekä, kukwe drieta ietre ye jatai tuin bäri ütiäte ietre. Jehová tö nitre jökrä tuai kukwe kwin ye kukwe nuin ye rabai gare ietre angwane, törbai kukwe driei niedi kwetre, ye abokän tä nirien ja üairebiti bämikai kwetre (Rom. 10:13, 14). Raba kukwe driere konkrekasion yebe niedi ietre angwane, tötikadre kwin nuainkäre, yekwe dimikai kukwe driere töi jämebiti (Luc. 6:40).

Nuaindre ño:

Mäkwe ni kukwe driekä mrä ye dimika tärä o täräkwata känene kukwe driekäre aune kukwe Bibliabätä mikakäre gare. Mätä tärä o täräkwata ükete ño maletín yete jai ye mäkwe mika tuare ie aune tärä yebiti kukwe drie raba ño ye mäkwe mika gare ie.
Täräkwata Sribi Nikwe Ngöbökrä yebätä kukwe nieta kukwe driekäre ye keteitibätä munkwe ja kita. Kukweta nakainkä metre nita kukwe driere yekänti kädekateta tärä Benefíciese página 82 yekänti ye erere munkwe bämika. Mäkwe ni ja tötikaka ye dimika kukwe niere ja kukwei jeñebiti. Ja ükadrete aune ja ngwäkitadre kwin ye ütiäte krubäte mäkwe mika gare ie (2 Cor. 6:3, 4).
Kukwe madabiti dimikadre. Kä medenkänti kukwe drieta tä mikani mapa yebätä ye mäkwe mika tuare ie aune täräkwata kukwe tikara ju ju te yebätä raba kukwe tike ño ye mäkwe drie ie. Nitre törbadre kukwe mikai gare bäri jai ye ngwane dre tikadre täräbätä kwe ye mäkwe drie ie arato. Mäkwe nübai nitre töi mike kukwe mike gare bäri jai (1 Cor. 3:6). Rabadre kukwe känene ño jw.org yete aune rabadre kukwe driere ño täräkwata Buenas nuevas para gente de todas las naciones yebiti ye mäkwe mika gare ie.
Mäkwe ngüba bätärekä aune tä nirien ja üairebiti yebätä mäkwe kwin nie ie (Prov. 25:11). Mäkwe kukwe kwin bämika käne. Mätä kukwe driere kä jutobiti aune ni kukwe driekä mrä dimike ye ñaka käi kwitaikä kwe jabiti.

Mäkwe kukwe ne nuain sö krati:

Mäkwe kukwe drie ju ju te ni ja tötikaka mäbe yebe aune mä rika ngwena jabe nitre tuinbiti o tötike Bibliabätä. Nengwane ni ja tötikaka ñaka mäkwe angwane, mäkwe ni kukwe driekä mrä nübai niken jabe.