¿Kä kärätä jai kukwe driekäre yekänti kukwe kwin raba nemen nikwe?
1. ¿Kä kärätä jai kukwe driekäre ye dre gärätä?
1 ¿Kä kärätä jai kukwe driekäre ye dre gärätä? Konkrekasion kwe kä tärä krubäte kukwe driekäre, yekänti ni iti kukwe driekä raba kä kärere jai kukwe driekäre, raba kä nemenkä no niara tä nüne bäre ye kärere ja kräke. Tärä Oganizados página 103 tä mike gare, kä tädre jeñe nikwe kukwe driekäre ye raba ni dimike “kukwe driere kwin kä diankata nikwe jai kukwe driekäre ye näre te”. Aune tä niere arato: “Ni raba nitre kukwe driekä mada ye nübaire kukwe driekäre ja mukore”.
2. ¿Kä kärätä jai kukwe driekäre aune kukwe drieta gwairebe ja mräkätre ben ye kräke dre nuain raba?
2 Kä kärätä jai kukwe driekäre aune kukwe drieta gwairebe ja mräkätre ben. Mäkwe kä käräbare jai kukwe driekäre ye rabadre mäkwe aune kä ye rabadrekä no mätä sribire yekänti angwane, mä raba kukwe driere mröta ñänä ruäre ye käi näire o mä rikadreta ja gwirete ye känenkri. Ni mada kukwe driekä tädre sribire mä ken ye mä raba nübaire kukwe driere jabe arato. Kä biandre kukwe driekäre mäi ye tädre no mä jue yekänti angwane, mä aune mä mräkätre raba niken kukwe driere kä yekänti derekri. Akwa, gätä sribeta kukwe driekäre yebätä mä ñaka rabadre angwane, mäkwe kukwe driedre känenkri mä rabadre orare Jehovai ja di käräkäre ie (Filip. 4:6). Ne madakäre, mä rabadre köbö ükete kwin jai ne kwe mäkwe kukwe driedre kä kukwe driekäre mäi yekänti aune kukwe driedre gwairebe arato ja mräkätre konkrekasionte yebe. Bämän krüte yete ja mräkätre kwati tä niken kukwe driere ye ngwane, kukwe ükaninte ye dimikadre. Akwa metrere nitre ükaninte braibe kukwe driekäre ben mätä kukwe driere ye mä rabadre dimike.
3. ¿Kä kärädre jai kukwe driekäre ye köböire kukwe meden kwin raba nemen nikwe?
3 Kukwe kwin raba nemen nikwe. Mäkwe kä käräbare jai kukwe driekäre yekänti käre kä täi kukwe driekäre mäi, aune ora te raba nemen kukwe driebare mäi ye erere te mäkwe nuaindi. Ora rabai bäri mäi kukwe driekäre aune ñaka rabai nändre mente mäi gätä nuainta kukwe driekäre ye kräke. Kukwe ne erere köböire ora nuaindre nuäi sribi prekursor ausiliar o regular kräke ye raba nemen bare kwin. Ne madakäre, mä täi kukwe driere kä keteitibe känti ye ngwane, nitre tö kukwe mikai gare jai täi nüne mätä nüne ye arabe käi känti, ye rabai nuäre tuadrebiti mä kräke aune tötikakäre Bibliabätä. Mä rabadre kukwe driere bä kabre kä käräbare mäkwe jai kukwe driekäre ye jökrä känti biandreta mäkwe ye känenkri ne kwe ni madakwe kärädre jai kukwe driekäre. Nitre ruäre tä niere, tätre kukwe driere kä kärätä kwetre jai yekänti angwane, nitre tä nemen gare bäri kwin ietre aune nitre tä kain ngäbiti töi jämebiti. ¿Kä kärätä jai kukwe driekäre ye raba mä aune mä mräkätre dimike kukwe driekäre bäri täte? (2 Tim. 4:5.)