Gätä nuainta kukwe driekäre

1. ¿Ñobätä ütiäte kukwe ükadrete kwin kukwe driekäre?

¹ Jesukwe kukwe driebare ye ngwane kukwe ükaninte kwin kwe. Ye erere nitre sribi Ngöbökwe jie ngwanka tätre nuainne kä jökräbiti tibien kä nengwane. Ye medenbätä konkrekasion jökrä känti gätä nuainta kukwe driekäre, yekänti nitre ükateta kukwe driekäre (Mat. 24:45-47; 25:21; Luc. 10:​1-7).

2. ¿Gätä kukwe driekäre yete dre nuainta?

² Gätä ütiäte. Gätä kukwe driekäre ye nuainta ja mräkätre dimikakäre bätä kukwe driedre ño kwetre ye mikata gare ietre. Kukwe kädrieta texto diario yebätä, ye ütiäte kukwe driekäre angwane blitata texto yebätä. Ruäre, kukwe nieta Sribi Nikwe Ngöbökrä o tärä Razonamiento o Benefíciese yebätä ye kädrieta. Arato tärä driedre ño ye bämikata. Ja mräkä itire itire käkwe kukwe driedre nirebe bätä kä meden känti kukwe driedre ye mikadre gare, biti orasion nuaindre. Gätä ne käkwe ñaka nuadre 15 minuto bäri, gätä ye krütadre angwane medente kukwe driei yekänti nitre jökrä rikadre.

3. ¿Nire käkwe gätä kukwe driekäre ükadrete?

³ Sribi ye tä nire nire kisete. Ni umbre kukwe drieta jie ngwanka kätä gätä kukwe driekäre ye ükete. Ni umbre nitre braibe kukwe driekä jie ngwanka o nitre niara dimikaka käkwe kukwe driedre nitre ükaninte kukwe driekäre yebe bämän krüte yebätä. Ni umbre o ni sribikä konkrekasionte mada mika raba nitre ükaninte kukwe driekäre ye jie ngwen köbö mada yete. Ni umbre nitre braibe kukwe driekä jie ngwanka käkwe sribidre gwairebe ni umbre kukwe drieta jie ngwanka yebe, bätä kä meden känti kukwe driedre ye diandrekä debe näre, ne kwe nitre ükaninte braibe kukwe driekäre käkwe kukwe driedre bämän krüte yebätä. Köbö mada kukwe driekäre yete nirekwe kukwe drieta jie ngwandre, ye ni umbre kukwe driekä jie ngwanka käkwe mikadre gare kwin jai.

4-6. a) ¿Ñobätä gätä kukwe driekäre ye nuaindre kä jene jene känti? b)  Medente bätä ñongwane gätä kukwe driekäre nuain raba yekrä ¿kukwe meden ngwandre törö jai?

⁴ Medente bätä ñongwane nuainta. Kukwe driedre täte konkrekasion käi yekänti, yekäre nitre raba gätä kukwe driekäre ye nuainne ju ja mräkätrekwe yete, ne kwe ñaka ja ükadrekrö kä keteitibe känti. Arato ja ükakrö raba Ju ja Ükarakrö yete. Gätä känti kukwe kädrieta ni jökrä kräke bätä Ja tötikata La Atalaya yebätä, ye bitikäre konkrekasion kwati kätä gätä kukwe driekäre ye nuainne. Gätä kukwe driekäre nuaindre ye ngwane kä känti kukwe driedre ye ñaka rabadre mente krubäte. Sribi nuainta kukwe driekäre ye mikadre ñärärä ne kwe kä känti konkrekasion kätä kukwe driere ye nuaindre kwin täte.

⁵ Kä känti konkrekasion kätä kukwe driere yebätä töbikadre, ne kwe ora meden bätä köbö meden bäri kwin gätä kukwe driekäre nuainkäre ye erere kräke kukwe ükadrete. Medente bätä ñongwane gätä kukwe driekäre ye nuain raba, yekäre töbikadre kukwe ngwantarita párrafo keta ti yebätä.

⁶ ¿Kä meden känti kukwe driedre bäri? ¿Ora meden bäri kwin kukwe driekäre ju ju te? ¿Kä dianka raba kukwe driekäre derekri ju ju te o nitre tuabitikäre? Kä meden känti kukwe driedi ye ükadrete angwane mikadre tablero kukwe mikara gare yebätä. Pablokwe niebare: “tikwe sribibarera ünän jökrä”, ye erere ni jökrä Gobran Ngöbökwe kukwei driekä tö kä känti konkrekasion kätä kukwe driere ye nuainne täte (Rom. 15:​23, KKN).

7. ¿Nitre kätä gätä kukwe driekäre jie ngwen ye sribi meden tä kisete?

⁷ Gätä ye nuainta ño. Ja tötikadre kwin gätä kukwe driekäre nuainkäre ye kätä mike gare nita Jehová kukwei mike ütiäte jai. Kä meden känti kukwe driedre ye ni kukwe driekä jie ngwanka käkwe diandrekä biare nitre jämi kukwe driere ye känenkri. Gätä kukwe driekäre ye kömikadre ora näre te bätä mikadre krüte 10 o 15 minuto aune yete kukwe ütiäte kukwe driekäre ye mikadre gare jötrö ngwarbe. Gätä ye krütadre angwane kä känti kukwe driei yekänti nitre jökrä rikadre. Ja mräkä mada rükadre gätä ye, bitikäre angwane kukwe mikadrete kräke, känti mikadre gare kä meden känti nitre täi kukwe driere. Gätä kukwe driekäre ye nuaindi kwin bätä kukwe ükaite kwin angwane, ye käkwe nitre jökrä dimikai kukwe driere kwin arato (Pro. 11:14).

8. ¿Ni gätä kukwe driekä jie ngwanka ye ni raba dimike ño?

⁸ Sribidre gwairebe ye ütiäte. Ja dimikadre kwärikwäri ye ütiäte krubäte (Heb. 13:17). Ja mräkä kätä kukwe drieta jie ngwen ye kätä ni itire itire käkwe kukwe driedre nirebe ye erere tä ükete. Ja mräkätre kukwe drie gare ie rabadre gätä yebätä angwane raba nitre mrä kukwebätä bätä ja mräkä kukwe drie ñaka gare kwin ye dimike. Nikwe ja töi mikadre kukwe driere ni madabe angwane ni raba dimike bäri kwin (Pro. 27:17; Rom. 15:​1, 2). Ni jökrä käkwe ja töi mikadre nüke ora te gätä kukwe driekäre nuainta yebätä, ye ütiäte krubäte. Kukwe ükateta Ngöbökwe ye ni tö mikai täte bätä ja mräkätre mada ye nita mike ütiäte jai, ye medenbätä nita ja di ngwen kukwe ükaninte ye erere nuainkäre kwin (2 Cor. 6:​3, 4; Fili. 2:⁠4).

9. ¿Gätä kukwe driekäre tä ükaninte yebätä nitre prekursor raba nitre dimike ño?

⁹ Prekursor raba kwen gätä yebätä. Nitre prekursor tä kwen gätä yebätä angwane ye kwin ja mräkä jökrä kräke bätä tätre dimike arato. Nitre prekursor ye kisete sribi krubäte: tätre nitre tötike Bibliabätä, nitre tuinbiti, mräkätre kwe dimike bätä tätre sribire arato. Ye medenbätä konkrekasion kätä bämän kratire kratire gätä mada nuainne kukwe driekäre, ye nitre prekursor kwandre gätä jökrä yete ye ñaka ribe rabadre ietre. Akwa raba ja töimike kwen gätä ruäre yebätä bämän kratire kratire te. Kwela ni tötikara ye kwrere gätä kukwe driekäre yete ni tötikata kukwe ja üairebiti. Nitre prekursor kwandre gätä yebätä angwane kukwe kwin nemen bare niaratre yebätä, yebiti raba nitre mada dimike. Nitre prekursor tä Sribi Ngöbökwe nuainne mantre jetebe ye medenbätä kukwe gare krubäte ietre. Kukwe nemen barebätä ye niaratre raba kädriere. Arato nitre prekursor tä kukwe driere käre bätä tä kwen gätä kukwe driekäre yebätä angwane, tätre kukwe kwin bämike ni käne. Ye medenbätä kwandre gätä yete ye ütiäte krubäte nikrä.

10. ¿Ñobätä ni kukwe driekä jökrä kwandre gätä kukwe driekäre nuainta yebätä?

¹⁰ Jesús bätä nitre ja tötikaka ben käkwe nuainbare, ye erere nita kukwe driere ju ju te. Gätä kukwe driekäre yete ni raba ja dimike kwärikwäri aune ni raba sribi ye nuainne bäri kwin. Ye medenbätä nitre jökrä Gobran Ngöbökwe kukwei driekä käkwe ja töi mikadre kwen gätä yebätä (Hech. 5:42; 20:20). Nikwe ja töi kwinbiti kukwe ükadrete jai kukwe ye nuainkäre, ¿ye ngwane dre kwin raba nemen bare? Kukwe drieta nikwe yebätä Jehovakwe ni dimikai bätä nikwe kämikai juto ni Däkien Jesukristo yebätä (Mat. 25:​34-40; 28:​19, 20).