Siklo kwatira Gobran Ngöbökwe mika niena gare
1. ¿Juta Jehovakwe dre nuaindre niebare bäsi siklo kwatira?
1 “¡Rei niena gobrane! Mun dianinkä kukwe ye niekäre nitre madai. Ye medenbätä, munkwe mika gare, munkwe kädrie, munkwe blita Rei bätä gobran kwe yebätä.” Bäsi siklo kwatira ja mräkä Rutherford kukwe ye niebare, yebiti mikani gare kwe juta Jehovakwe rabadre Gobran Ngöbökwe ye mike gare Kä jökräbiti tibien. ¡Aune ye erere nikwe nuainbarera! Nitre kristiano siklo kena ye erere, nikwe kukwe kwin Gobran Ngöbökwe yebätä mikanina gare “ni kwatiye kä jökräbti temen” (Col. 1:23, Kukwe Kuin Ngöbökwe). ¿Siklo nikanina ta yete nikwe dre nuainbarera Gobran Ngöbökwe mikakäre gare? ¿Gobran Ngöbökwe ükaninte ye käi nibira nüke 100 yebätä nikwe dre nuaindre mikakäre gare jankunu?
2. ¿Tärä bätä täräkwata sribeta yebiti Gobran Ngöbökwe mikata gare ño?
2 Drie jatani ño mekerabe. Mekerabe tärä bätä täräkwata sribeta yebiti Gobran Ngöbökwe mikata gare. Kä 1939 yete ja käne täräkwata keteitibiti nita kukwe driere metrere ye kädekani La Atalaya. Anunciando el Reino de Jehová. Täräkwata ye tä blite Gobran Ngöbökwe aune dre nuaindi kwe yebätä arato. Täräkwata ¡Despertad! ye tä mike gare arato Gobran Ngöbökwe ye aibe käkwe kukwe kwin nuaindi ni kä tibienbätä kräke. ¡Täräkwata ketebu ye kwitata bäri aune döräita bäri kä jökräbiti tibien ye käi juto krubäte nibätä! (Apoc. 14:6.)
3. Nikwe dre dre nuainbarera Gobran Ngöbökwe mikakäre gare ye mun raba niere.
3 Juta Jehovakwe kukwe bätäkä ngwarbe nuainbarera Gobran Ngöbökwe ye mikakäre gare. Kenanbe jatanintre kukwe driere kukwe grababare mika nämene karote kukwe nuadre bosina yebiti, radiote aune gramófonos (jondron kukwe grababare kukwe nuara) yebiti. Nitre kukwe driekä Gobran Ngöbökwe yebätä nämene braibe, akwa kukwe driebare ye erere köböire kukwe kwin driebare nitre kwati krubäte ie (Sal. 19:4). Gobran Ngöbökwe driedre nitre kwati krubäte ie aune juta ruäre te ni tuanmetre ñaka kukwe driere nitre madai yei Gobran Ngöbökwe driedre arato yekäre jw.org yete nikwe tärä bätä täräkwata keta kabre mikanina.
4. ¿Nikwe kukwe meden meden mrä ükaninante?
4 Juta Jehovakwe kukwe ükaninante mrä mrä Gobran Ngöbökwe mikakäre gare arato. Ñodre, kä 1990 ye ngwane ja känenkäre, kukwe drie nämene ju ju te ye ñaka aibe nuain jatani, ñakare aune kukwe drie jatani parquete, karo mikate käi aune jondron rürübäinta yekänti arato. Bitinkä kukwe ükaninte mrä kukwe driekäre ni jökrä ngwärekri kä jökräbiti tibien juta krikri yekänti. Ne madakäre, konkrekasion keta kabre tä kukwe driere ni jökrä ngwärekri aune tätre mesa aune jondron tärä bätä täräkwata mikara tuadre ye mikekä nitre näin kwati ta yekänti. Akwa, metrere ni täbe Gobran Ngöbökwe mike gare ju ju te (Hech. 20:20).
5. ¿Sribi Ngöbökwe kömikaita ye ngwane dre dre rabai nuaindre nie?
5 Driei ño ja käne. Sribi Ngöbökwe kömikaita sö septiembre yete ja känenkäre ye ngwane, ja mräkätre kwati krubäte käkwe prekursor regular kömikai. ¿Mä täi niaratre ye ngätäite siba? Ñakare ngwane, ¿mäkwe ja töi mikanina prekursor ausiliar nuainne nane nane? Mä raba ja mike prekursor o ñakare, akwa mäkwe ja di ngwandi Gobran Ngöbökwe mike gare bäri angwane Jehovakwe kukwe kwin mikai nemen bare mä kräke (Mal. 3:10).
6. ¿Ñobätä sö octubre 2014 ye rabai ütiäte?
6 Gobran Ngöbökwe ükaninte yebiti kä rabaira 100 sö octubre 2014 yete. Yebätä, täräkwata Ni Mikaka Mokre ni jökrä kräke sribedi sö ye kräke ye täi blite metrere Gobran Ngöbökwe yebätä ye kwin krubäte. Nikwe ja di ngwandre täräkwata ye mikete nitre kwati krubäte ie. Ni jökrä rabadre ja töi mike ja käne “kukwe kwin Ngöbö gobrain[bätä], [...] drie[kä]re” nire nire törbadre ni kukwe nuai yei (Hech. 8:12, Ngöbö Täräe, tärä okwä ükaninte).