Kukwe ükaninte mrä kukwe driekäre ni jökrä ngwärekri
1. ¿Nitre kristiano siklo kena nämene kukwe driere ño?
1 Siklo kena yete, nitre kristiano nämene kukwe driere ju ju te, aune nämene kukwe driere ni jökrä ngwärekri arato (Hech. 20:20). Ñodre, nitre kwati kwandi ietre templote nämene gare ietre yebätä nämene niken yete (Hech. 5:42). Kä Atenas yekänti, apóstol Pablo nämene kukwe driere mantre jetebe jondron rürübäin nämene yekänti (Hech. 17:17). Kä nengwane, nita kukwe kwin ye driere metrere ju ju te. Akwa karo mikateta, jondron rürübäinta, parque, ni kwati ji ngrabare aune nitre tä medente ye jökrä känti nita kukwe driere arato. Ni jökrä rabadre kukwe driere kä jökrä känti nieta nie, akwa kukwe mrä aune kwin ükaninte ketebu kukwe driekäre ni jökrä ngwärekri yekänti ni kwati kukwe driedi arato. Meden meden ani mike gare jai.
2. ¿Kukwe meden ükaninte ni jie ngwankäre abokän kömikani noviembre 2011 ja känenkäre?
2 Kukwe ükaninte mrä kukwe driekäre jutate ni jökrä ngwärekri. Mikata gare Anuario 2013 páginas 16 aune 17 yebätä erere, noviembre 2011 yete ja känenkäre kukwe ükaninte ni jie ngwankäre kukwe driekäre ni jökrä ngwärekri juta Nueva York (Estados Unidos) yete. Jutate nitre kwati näin ta yekänti mesa aune jondron tärä bätä täräkwata mikara tuadre nuäre ngwandre ye mikani, tärä okwä kukwe mikara gare bä nuäre ketaninkäbätä aune yebiti tärä bätä täräkwata kukwe jene jenebiti ye mikani. Mantre jetebe nitre kwati krubäte nämene tuin, aune nitre nünanka ju krikri mente kwin känti ni tuanmetre ñaka niken bätä nitre ñaka käre gwi yekwe tuani arato. Ye köböire kukwe kwin namani bare. Sö kratibe te täräkwata Ni Mikaka Mokre bätä ¡Despertad! döräibare 3.797 aune tärä döräibare 7.986. Ne madakäre, nitre kwati nänkä ta käkwe ja tötika Bibliabätä ribebare. Metrere nuainbare ni mada tötika Bibliabätä kömikakäre, yebätä nitre tö namani kukwe mikai gare jai ye kä aune nüne medente tikani täräkwatabätä abokän juani konkrekasion niaratre käibiti yekänti ne kwe ni kukwe driekä iti rikadre tuinbiti.
3. ¿Kukwe ükaninte mrä kukwe driekäre ni jökrä ngwärekri ye nuaindi ño kä keta kabre känti?
3 Kukwe kwin tä nemen bare, yebätä kä jökräbiti nitre kwati tä nüne yekänti kukwe ükaninte mrä ye nuaindi. Juta meden meden te nuain raba ye sukursal kwatire kwatire käkwe ükaite. Metrere, jutate nitre kwati näin ta yekänti nuaindi, ñobätä ñan aune karo ngüba käi ye tärä o ju krikri mente kwin keta kabre yekänti obisina tärä o nitre tärä nüne. Konkrekasion meden meden käkwe kukwe driei yekwe nuaindre ño ye sukursal mikai gare. Nitre prekursor regular aune especial diainkä kukwe ye nuainkäre, akwa ruäre ngwane nitre prekursor ausiliar rabai nuainne arato.
4. ¿Kukwe ükaninte mrä kukwe driekäre yekänti nitre tä kukwe driere ño?
4 Kukwe drieta ño. Kukwe ükaninte mrä kukwe driekäre nekänti nitre prekursor tä kukwe driere ye tä nitre ngübare nüke mesa aune jondron tärä bätä täräkwata mikara tuadre nuäre ngwandre yekänti, biti nitre ye törbadre tärä o täräkwata meden ngwandi jai ye erere raba niken ngwena jai tätre niere ietre. Ne madakäre, nitre tä kukwe ngwentari ye tätre mike gare Biblia yebiti ietre. Tärä ruäre ye nitre tä den jai angwane, ngwian biandre ño ja töi jeñebiti ye ñaka tä niere ietre. Akwa sribi ye nuainkäre ngwian bianta ño tätre ngwentari angwane, tärä o täräkwata yebätä juandre medente mikata gare ye erere känti juandre tätre mike gare ietre. Kä tärä kukwe ngwantarikäre angwane, tätre ngwentari ietre: “¿Mä tuadrebiti ie mä törba?” o “¿Mä kä aune mä tä nüne medente ye mä törba biain ne kwe mä tötikadre Bibliabätä aune ütiä ñaka kärädre mäi?”.
5. ¿Kukwe ükaninte mrä kukwe driekäre ni jökrä ngwärekri yebätä nitre gure kukwe meden kwin niebare?
5 Kukwe ükaninte kukwe driekäre ye tä kä mike juto nibätä. Nitre gure käkwe tikabare: “Jondron tärä aune täräkwata mikara tuadre nuäre ngwandre yekänti nunta nünaninkä aune nitre kwati krubäte tä näin ta nunta tuin, ye tä mike gare nunye ja di ngwanta kukwe driekäre nitre kä jökräbiti tibien ie. Jehová töita nitre ye itire itirebätä, yebätä nunta töbiketari ye tä nun töi mike bäri kukwe drieta ye mike käne nuaindre jai. Jondron tärä aune täräkwata mikara tuadre yekänti ta nitre täniken angwane, niaratre tö kukwe mikai gare jai o ñakare ye mikakäre gare jai Jehová tä brukwä mike ñärärä ye nunta bämike ja töite. Angeletre tä nun dimike ye nüke gare bäri nunye”.
6. a) ¿Konkrekasion keta kabre yete kukwe meden ükateta kukwe driekäre ni jökrä ngwärekri, aune ñobätä ñaka ja erebe kukwe ükaninte mrä kukwe driekäre jutate yebe? b) ¿Kukwe driedre ni jökrä ngwärekri yekäre konkrekasion keta kabre ye rabadre dre nuainne ja die mikakäre kwärikwäri?
6 Konkrekasion tä kukwe ükete kukwe driekäre ni jökrä ngwärekri. Kukwe ükaninte mrä kukwe driekäre mirira gare, akwa konkrekasion keta kabre yekänti nitre umbre niena kukwe ükete kukwe driekäre ni jökrä ngwärekri. Konkrekasion tä kukwe driere yekänti nitre kukwe driekä tä mesa o jondron tärä aune täräkwata mikara tuadre nuäre ngwandre ye mike nitre kwati tä näin ta yekänti. Kukwe ükateta ne ñaka ja erebe kukwe ükaninte mrä kukwe driekäre jutate yebe, ñobätä ñan aune kukwe drieta jutate yekänti konkrekasion keta kabre tä kukwe driere jabe aune sukursal tä kä meden denkä jutate kukwe driekäre ye arabe känti tätre kukwe driere (recuadro “Ja die mikadre kwärikwäri” mikadre ñärärä).
7. Kukwe ükateta kukwe driekäre nitre jökrä ngwärekri ye rabadre tuin kwin nuaindre nitre umbre konkrekasionte ie angwane, ¿kukwe ükadrete ño kwetre?
7 Konkrekasion tä kukwe driere yekänti nitre tärä näin kwati ta aune kukwe drieta ni jökrä ngwärekri ye nuain raba o ñakare ye nitre umbre rabadre kädriere jabe. Mesa o jondron tärä aune täräkwata mikara tuadre nuäre ngwandre ye mika raba karo ngüba käi, plazas, parque, ni kwati ji ngrabare, jondron rürübäin käi, kä ja tötikakäre kwela krite, aeropuertos aune kä medenkänti bieta nuainta kä kwatire kwatire te yekänti mika raba. Bäri kwin jondron tärä aune täräkwata mikara tuadre abokän nuäre ngwandre ye mikadre köbö medente, kä medenkänti aune ora nuäi te ye erere känti mikadreta. Kukwe namanina bare ye tä mike gare, bäri kwin mesa mikadre jondron rürübäin käi yekänti aune tienda krikri känti nitre ñaka tä nemen jondron kökö yekänti ñaka mikadre. Ji känti nitre näin krubäte ta yekänti ñaka mesa mikadre, ñakare aune jondron tärä aune täräkwata mikara tuadre nuäre ngwandre bäri chi mikadre ye bäri kwin. Archivos sribebare metrere täräkwabätä tärä okwä tikani ye sribekäre kukwe driekäre ne erere. Täräkwabätä tärä okwä tikani yebätä täräkwata Ni Mikaka Mokre bätä ¡Despertad! aune tärä Dre drieta ye mikata gare, aune nitre umbre raba archivos ye denkä Internet käi yete. Kukwe ükaninte mrä kukwe driekäre jutate yekänti kukwe drieta ño, ye erere nire nire käkwe kukwe driedre yekwe nuaindre, ni umbre kukwe drieta jie ngwanka kukwe ükadrete ye ererebätä nuaindre kwetre. Nire törbadre kukwe mikai gare jai ye ñaka nüne niaratre tä kukwe driere yekänti angwane, drekebe ngwarbe täräkwata Sírvase visitar (S-43) yebätä kukwe tikadre kwetre aune biandre kwetre ni kukwe konkrekasionte tikaka yei.
8. Konkrekasion mäkwe yete kukwe ükate ñaka kukwe driekäre ni jökrä ngwärekri angwane, ¿mä raba kukwe driere ño ni jökrä ngwärekri?
8 Mätä kukwe driere ye ngwane mä raba kukwe driere ño ni jökrä ngwärekri. Konkrekasion mäkwe tä kukwe driere yekänti nitre ñaka näin kwati ta yebätä mesa o jondron tärä aune täräkwata mikara tuadre nuäre ngwandre ye ñaka mika raba angwane, ¿mäkwe dre nuaindre? Ye erere angwane, kukwe drieta ni jökrä ngwärekri ye mä raba nuainne mätä kukwe driere ye ngwane. ¿Kukwe drieta yekänti jondron rürübäin käi keta kabre, jondron rürübäin käi kia o tienda känti nitre nüke kwati ye tärä? ¿Nitre tärä nemen kwati ngätäi jakänti parquete, plaza yekänti o kä madakänti? ¿Ruäre ngwane bieta nuainta abokän känti nitre kwati tärä nüke? Ye erere ngwane, mä raba kukwe driere ni jökrä ngwärekri.
9. ¿Ñobätä nikwe ja di ngwandre kukwe driere nitre tä kä medenkänti ye jökrä ie?
9 Jehová tö “ni jökrä diaintari amne, kukwe era metre [...] rabadre gare ni jökräye, ie [...] tö” (1 Tim. 2:4, Kukwe Kuin Ngöbökwe). Yebätä, kä krüte jämi nüke ye känenkri nita ja di ngwen Gobran Ngöbökwe mike gare nitre kwati ie (Mat. 24:14). Ruäre ngwane nitre ñaka tä kwen gwi nie, akwa ni raba blite bentre kä madakänti. Erametre, ye köböire kukwe kwin ye raba nemen gare ietre. Ye medenbätä, nitre tä kä meden meden känti yei nikwe kukwe driedre aune nikwe ja töi mikadre kwatibe kukwe driere täte (2 Tim. 4:5).
[Recuadro página 5]
Ja di mikadre kwärikwäri
Näntä jite ta, karo mikate käi, jondron rürübäin käi o karo ngüba käi ye arabe känti nitre kukwe driekä konkrekasion jene jene te tätre kukwe driere ni jökrä ngwärekri mikanina gare. Nitre kukwe driekä konkrekasion jene jene te ye tä täräkwata Ni Mikaka Mokre bätä ¡Despertad! ye mikete nitre tä nemen ni mada ngübare ye arabe känti, aune tätre kukwe driere nitre jondron rürübäinkä ye arabe ie. Nitre kukwe driekä tätre nuainne jene jene, akwa ruäre ngwane nitre ie kukwe drieta yebätä ñaka tä nemen mate kwin. Yebätä, nikwe kukwe driedre ni jökrä ngwärekri ye ngwane, bäri kwin ni tädre nuainne konkrekasion nikwe tä kukwe driere yekänti.
Konkrekasion mada tä kukwe driere yekänti nitre kwati tä nemen yei nitre kukwe driekä törbadre kukwe driei angwane, käne rabadre blite ni umbre kukwe drieta jie ngwanka konkrekasion kwe yete ben. Aune niarakwe blitai ni umbre kukwe drieta jie ngwanka konkrekasion madate yebe. Nitre tä konkrekasion keta kabre te abokän blite kukwe jene jenebiti ye tätre kukwe driere kä arabe känti angwane, nitre umbre kukwe drieta jie ngwanka konkrekasionte rabadre kukwe ükete kwin jabe ne kwe kukwe ruäre ñan rabadre mate tare nitre madabätä. Ja die mikadre kwärikwäri ye köböire jondron “nuain kwin jökrä [...] jatäri” (1 Cor. 14:40, Ngöbö Täräe, tärä okwä ükaninte).
[Jondron üai bämikani página 6]
[Jondron üai bämikani página 6]