¿Nita nitre tötike kwin Bibliabätä?
1. ¿Ni kukwe driekä tä nitre tötike Bibliabätä ye jökrä käkwe dre nuaindre?
1 Jehová ñaka kite “ni ngwena” ja kokwäre angwane, ni ñaka raba nemen niara mikaka täte (Juan 6:44, Kukwe Kuin Ngöbökwe). Akwa, nikwe nitre dimikadre nökrö Rün kä kwinbiti ye kokwäre ye abokän tä gare nie (Sant. 4:8). Akwa yekäre nikwe ja tötikadre kwin. Ni törbadre dimikai kukwe nieta ye mike nüke gare jai aune nirien ja üairebiti angwane, mikadre ñäke párrafo yebätä aune kukwe ngwantarita ye mikadre gare kwe ye ñan aibe ribeta.
2. ¿Nikwe dre nuaindre nitre tötikakäre kwin Bibliabätä?
2 Ni ja tötikaka tötikadre kwin Bibliabätä yekäre, ni kukwe driekä käkwe dimikadre kukwe ne nuainne: 1) Biblia tä kukwe driere ye mike nüke gare jai, 2) kain ngäbiti aune 3) ye erere nuainne (Juan 3:16; 17:3; Sant. 2:26). Kukwe ne nuain ñaka raba drekebe ngwarbe, akwa ni ja tötikaka käkwe kukwe keteitire keteitire ne nuaindre ye ribeta ne kwe rabadre ja mäke bäri Jehovabe aune rabadre ja denkä niara mikakäre täte.
3. ¿Ni tö nitre tötikai kwin Bibliabätä angwane nikwe kukwe meden ngwandretari, aune ñobätä?
3 ¿Ni ja tötikaka ye töita ño? Biblia tä kukwe driere ye tä nüke gare ni ja tötikaka yei aune tä kain ngäbiti ye rabadre gare nie yekäre, nikwe nübaidre blite aune nikwe ñaka kukwe ye niedre jökrä ie (Sant. 1:19). ¿Kukwe kädrieta yebätä Biblia tä dre driere ye nüke gare ni ja tötikaka yei? ¿Raba mike gare ja kukwei jeñebiti? ¿Töita ño kukwe yebätä? ¿Biblia tä kukwe niere ye tuin metre aune kwin ie? (1 Tes. 2:13.) ¿Rabadre ja töi ükete ye nüke gare ie? (Col. 3:10.) Ni ja tötikaka nibe ye töita ño ye rükadre gare metre nie yekäre, nikwe töbikadre kwin kukwe ngwantarikäre ie aune nuaindre töi bökänbiti, ye bitikäre nikwe kukwe nuadre kwin (Mat. 16:13-16).
4. Kukwe ruäre drieta Bibliakwe ye ñaka rabadre nüke gare jötrö ni ja tötikaka ie aune ñaka rabadre nuäre kräke nuainkäre ye ngwane, ¿nikwe dre nuaindre?
4 Nitre tä töbike ño aune tä dre dre nuainne ye abokän dianka ñaka raba nuäre brukwäte, yebätä ñaka raba ja töi kwite drekebe ngwarbe (2 Cor. 10:5). Ni ja tötikaka nibe ie kukweta nemen gare ye ñaka tä kain ngäbiti aune ñaka tä nuainne drekebe ngwarbe ye ngwane, ¿nikwe dre nuaindre? Nikwe ngübadre bätärekä aune kä mikadre niken ta ne kwe Kukwe Ngöbökwe aune üai deme ye käkwe nitre ja tötikaka ye brukwä kwitadre (1 Cor. 3:6, 7; Heb. 4:12). Kukwe ruäre drieta Bibliakwe ye ñaka rabadre nüke gare jötrö ie aune ñaka rabadre nuäre kräke nuainkäre angwane, bäri kwin ni raba tötike kukwe madabätä. Biblia tä dre driere yebätä nikwe tötikai bätärekä bätä ja tare yebiti angwane, ja känenkäre töi raba nemen ja töi kwitabätä.