Ja tötikadre kwin
1. ¿Ñobätä nikwe ni ja tötikaka töi mikadre kukwe metre ye tarere?
1 Nikwe ni mada tötikadre angwane, ¿dre nuaindre nikwe ne kwe kukwe ye matadre kwin brukwäte aune töi rabadre Jehová mike täte? Nita ja di ngwen yebätä ni törbadre kukwe kwin tuai nemen bare angwane, nikwe ni ja tötikaka ye töi mikadre kukwe metre Bibliabätä tarere aune ye käkwe dimikai nirien kukwe ja üairebiti (Deu. 6:5; Pro. 4:23; 1 Cor. 9:26). Akwa ¿ni raba nuainne ño?
2. Ja tötikadre ni mada tötikakäre ye ngwane, ¿ñobätä ütiäte nikwe oradre?
2 Ja tötikadre ye känenkri oradre. Jehová tä nura mike nirien, ye medenbätä, ja tötikadre ni mada tötikakäre angwane nuaindre orasion yebiti. Ni ja tötikaka kätä dre ribere ye kädekadrete orasion yete (1 Cor. 3:6; Sant. 1:5). Nikwe ne nuaindre angwane ye raba ni dimike kukwe metre Jehovakwe ye mike nemen ni ja tötikaka ye brukwäte (Col. 1:9, 10).
3. Nikwe töbikai ni ja tötikaka yebätä angwane, ¿ye raba ni dimike ño ja tötike kwin?
3 Töbikadre ni ja tötikaka yebätä. Nitre kätä dre ribere jai, yebätä töbikadre kwin nikwe, Jesús nuainbare ye erere. Ñodre, kukwe arabe ngwantaribare bobu Jesús ie: “¿tikwe dre nuendre abko ütiäre ti rabadre nüne kärekäre?”. Kukwe ngwantaribare bobu niarai ye ngwane nitre nämene töbike ño, ye ererebätä kukwe ye mikani gare kwe (Luc. 10:25-28; 18:18-20 KKN). Kukwe ne kätä mike gare, ja tötikadre nikwe ye ngwane töbikadre ni ja tötikaka yebätä. ¿Texto medenbätä ñäkä raba? ¿Ja tötikadre nuäi ben kukwe dianinkä yebätä? ¿Kukwe meden drieta ie abokän ñaka nuäre kadre ngäbiti kräke? O ¿Kukwe meden ñaka raba nüke gare ie? Kukwe ngwantarita, yebätä nikwe töbikadre käne aune ye käkwe ni dimikai kukwe mike gare ni ja tötikaka ie, kukwe ngwandretari kwe ye ngwane.
4. ¿Nikwe dre nuaindre ja tötikakäre kwin?
4 Ja tötikadre. Nikwe ja tötikanina bati bobu kukwe dianinkä yebätä akwa ni ja tötikaka yekrä ja tötikai kena kukwe yebätä. Ni törbadre kukwe ye mikai nemen ni ja tötikaka ye brukwäte angwane nikwe ja tötikadre kwin tötikakäre. Nita ribere ni ja tötikaka ie ye erere nuaindre, ja tötikadre käne texto bätä kukwe dianinkä yebätä aune kukwe meden bäri ütiäte ni ja tötikaka yekrä ye täräi mikadrekä arato (Rom. 2:21, 22).
5. ¿Jehová erere ni raba ja töimike ño?
5 Ni itire itire tä ja tötike ye Jehová tö tuai nirien kukwe ja üairebiti (2 Ped. 3:9). Nikwe kä diandrekä jai ja tötikakäre kwin nitre tötikakäre angwane, Jehová erere ni tö tuai nirien ja üairebiti.