Kwela Sribi Ngöbökwe kä 2015 Kräke ye käkwe ni dimikai dirire bäri kwin

¹ David käkwe tikabare: “Tita kukwe niere ja kadabiti aune tita töbiketari ja brukwäte ye rabadre kwin krubäte mä kräke, Jehová, Jä tikwe aune Ti Kökatarikä” (Sal. 19:14). Nita kukwe niere ye rabadre kwin Jehová kräke ie ni tö aune nita blite kukwe metre yebätä konkrekasionte bätä nita kukwe driere ye ngwane ye ütiäte krubäte ni kräke. Kukwe keta kabrebiti Jehovata ni tötike kukwe driekäre, ñodre, Kwela Sribi Ngöbökwe Kräke yebiti. Kwela nebiti ni tötikata bämän kratire kratire konkrekasion 111,000 biti bäri yete kä jökräbiti tibien aune nitre jökrä dimikanina kwe kukwe kwin ye driekäre kwin nitre töi kwitakäre, töbikakäre kwin blitakäre aune ñaka kä jürä ngwen jabätä (Hech. 19:8; Col. 4:6).

² Kukwe ükaninte kwela 2015 kräke yete ja tötikai tärä Kukwe nieta kena Kukwe Ngöbökwe yebätä, ¿Dre drieta erametre Bibliakwe? aune Tärä tikwe tä blite Bibliabätä yebätä. Kukwe mada mrä ükaninte ye abokän kukwe ütiäte dianinkä Bibliabätä aune kukwe número 1 ye kädriei minuto bäri braibe te. Kukwe ükaninte mrä aune kukwe ketare ketare tä ükaninte kwelate ye nuaindre ño yebätä ani ja tötike.

³ Kukwe ütiäte dianinkä Bibliabätä. Ñäkätä Bibliabätä bämän kratire kratire ye tädre ja mräkä kisete ye käkwe kukwe ye kädriedre minuto 2 aune kukwe meden kwin bätä raba ni dimike ye mikadre gare keteiti kwe. Kukwe keteiti ütiäte kädriedre kwe minuto ye näre te konkrekasion dimikakäre yekäre rabadre ja tötike kwin käne. Ye bitikäre, minuto 6 yete nitre ja ükaninkrö ye käkwe blitadre kukwe meden Bibliabätä namani tuin ütiäte ietre yebätä aune nuaindre minuto ötäre kwetre. Kukwe kwin ni dimikakäre niedre minuto ötare o bäri chi yekäre ja tötikadre kwin käne aune ñaka blitadre raire. Akwa, kukwe ne nuaindre ye kwin krubäte, aune ye köböire kä rabaite blitakäre ja mräkätre mada ie kukwe meden kwani ietre ye mikakäre gare.

⁴ Kukwe número 1. Ñäkätä Bibliabätä ye ükaninte ne kwe nuaindre minuto 3 o bäri chi, ye abokän nuaindi bäri jötrö. Ni ñäkäkä Bibliabätä ye rabadre ñäke bersikulo yebätä bä kabre käne aune rabadre ja di ngwen kukwe ye niere kwin aune merebe, ne kwe dre nieta ye rükadre gare kwin. Ni testiko Jehovakwe jökrä rabadre ja di ngwen ñäke kwin täräbätä, ñobätä ñan aune ye ütiäte krubäte Ngöbö mikakäre täte. Monsotre kia kwati konkrekasionte ie ñäkä gare kwin täräbätä ye käi juto krubäte nibätä. Aune nitre rüne tätre ja di ngwen monsotre kwe dimike ñäkäkäre kwin täräbätä yei nikwe kwin krubäte niedre.

⁵ Kukwe número 2. Ja ngwai iti käkwe kukwe ne bämikai minuto 5. Kukwe meden kädriedre ye ererebätä ja ngwai yekwe blitadre. Kukwe kädriedre ye tädre dianinkä tärä Kukwe nieta kena Kukwe Ngöbökwe yebätä angwane, kukwe drieta yekänti kukwe ye raba konkrekasion dimike ño aune blitata metre jabe ye erere bämikadre kwe. Kukwe kädriedre ye tädre dianinkä täräkwata madabätä angwane, rabadre ja tötike kukwe yebätä kädriekäre aune texto meden bäri kwin ye diandrekä kwe kädriekäre. Ne madakäre, bersikulo mada tä kukwe ye mike gare ño yebätä raba blite arato. Ni kwela jie ngwanka käkwe ni mikai iti dimike kukwe ye nuainne.

⁶ Kukwe número 3. Kukwe ne kädriedre minuto 5, aune täi ja mräkä o ja ngwai kisete. Kukwe ne tädre ja ngwai kisete angwane, kukwe número 2 nuaindre nieta ye erere nuaindre kwe. Kukwe ye mikadre ja mräkä kisete aune tädre dianinkä täräkwata madabätä angwane, nuaindre kwe kukwe kädrieta ye erere, nitre tä ja ükökrö Ju Ja Ükaninkrö yete yebätä töbikadre kwe. Nire kisete kukwe ye tädre yekwe ja tötikadre kukwe ye kädriekäre aune texto meden bäri kwin ye diandrekä kwe kädriekäre.

⁷ Kukwe ükaninte mrä kukwe número 3 ye nuainkäre. Kukwe ne tädre dianinkä täräkwata Kukwe nieta kena Kukwe Ngöbökwe yebätä aune mikadre ja mräkä kisete angwane, tä ja tötike ño mräkätre kwe yebe o kukwe driekäre ye erere bämikadre kwe. Ruäre ngwane, ni kwela jie ngwanka yekwe ni diainkä kukwe bämikakäre ben aune nuaindre ño kwe ye niedi kwe ie arato. Niara mräkä o ja mräkä konkrekasionte mikai kukwe ye bämikakäre ben. Kukwe bämikai kwe ye ngwane, bersikulo mada tä kukwe ye mike gare ño yebätä raba blite arato. Ruäre ngwane, kukwe ne mikai ni umbre kisete, niara ni diainkä iti kukwe ye bämikakäre jabe aune kukwe bämikadre ño kwe ye täi gare ie arato. Diridre ño kwin ye ni umbre käkwe bämikai mräkä yebe o ja mräkä madabe yekwe nitre konkrekasionte dimikai krubäte.

⁸ Mäträdre. Kukwe keteitire keteitire kädriei ye bitikäre, ni kwela jie ngwanka käkwe kukwe niedi minuto 2 ni itire itire ie dimikakäre aune kukwe nieta tärä Benefíciese yebätä ye meden raba dimike ye niedi kwe ietre. Ni kwela jie ngwanka ye käkwe ni itire itire kädekaite ye ngwane, kukwe medenkänti nitre ye mikani sribire ye ñaka niedi kwe. Akwa, kukwe keteitire keteitire kädriei ye bitikäre, kukwe kwin niedi bökän kwe nitre kukwe kädriekä yei aune kukwe medenkänti mikani sribire ye niedi kwe. Ne madakäre, kukwe medenkänti mikani sribire ye nuainbare ño kwin kwe ye mikadre gare merebe kwe aune raba kukwe ye nuainne ño bäri kwin ye niedre kwe töi kwinbiti ie.

⁹ Kukwe medenkänti ni mikata sribire ye raba kwen nitre kukwe kädriekä yei tärä kwetre Benefíciese página 79 nemen 81 yekänti. Gätä krütadre ye bitikäre, ni kwela jie ngwanka ye käkwe kukwe tikai täräbätä nitre kukwe kädriekä yei aune kukwe medenkänti mikani sribire ye kräke ejercicio nuainbare kwetre o ñakare ye ngwandretari kaibe kwe ietre. Ye ngwane, o mada ngwane, raba kukwe kwin niere ietre aune kukwe meden raba dimike ye niedre kwe ietre. Ni kwela jie ngwanka tä kukwe niere nitre kukwe kädriekä yei ye käkwe dimikai nirien ja üairebiti ye erere mikadre tuin kwetre jai (1 Tim. 4:15).

¹⁰ Ni kukwe kädriekä ye rikadre minuto yebiti ta angwane, ni kwela jie ngwanka o ni niara dimikaka yekwe mikai gare ie, raba timbre ngö mikekä o lápiz yebiti raba jondron mete, ne kwe minuto krütani ye mikadre gare kwe töi kwinbiti ie. Ye rabadre bare ngwane, ni kukwe kädriekä yekwe kukwe ye mikadre krüte aune jatadreta timo (tärä Benefíciese, página 282, párrafo 4 ye mikadre ñärärä).

¹¹ Kukwe ribeta kukwe kädriekäre Kwela Sribi Ngöbökwe Kräke yete ye nire nire tä nuainne ye nübai raba ja kä bien kwela ye kräke (tärä Benefíciese, página 282, párrafo 6 ye mikadre ñärärä). Ja tötikata kwela yete ye käkwe juta Ngöbökwe tötikanina kukwe kwin Gobran Ngöbökwe yebätä ye driere metre, kwin aune ja tare yebiti. Jehovata ni tötike yebiti nikwe niara käikitadrekä ye käita nemen juto niarabätä (Sal. 148:12, 13; Is. 50:4).