Nikwe ja di ngwandre jankunu kukwe driekäre bäri kwin
1. Nikwe ja di ngwandre jankunu kukwe driekäre bäri kwin, ¿ye bämikani ño siklo kena yete?
1 Ni kristiano yebätä nikwe ja di ngwandre kukwe driekäre bäri kwin. Ye medenbätä, Jesukwe nitre ja tötikaka ben ye tötikani aune dimikani kwe ne kwe rabadre kukwe driere bäri kwin (Luc. 9:1-5; 10:1-11). Ye erere Áquila bätä Priscila käkwe Apolos dimikani, “ji Ngöbökwe mikani gare bäri metre [...] kwetre ie” (Hech. 18:24-26, Kukwe Kuin Ngöbökwe [WBT]). Timoteo nämenena kukwe driere kä kwati krubäte te ye Pablo käkwe nübaibare arato dirikäre bäri kwin, ne kwe nämene nirien jankunu “ye jutuadre metre nitre jökrä ie” (1 Tim. 4:13-15, WBT). Kä kwäbera nita sribire ni klabore kwrere ni Däkien kräke ye kärera, nikwe ja di ngwandre jankunu kukwe driekäre bäri kwin.
2. ¿Ni raba dre nuainne ja tötikakäre nitre kukwe driekä mada yebätä?
2 Nikwe ja tötikadre nitre madabätä. Nikwe diridre bäri kwin yekäre nitre mada tä nuainne ño ye nikwe mikadretari ñärärä (Prov. 27:17). Ye medenbätä ni rikadre kukwe driere ye ngwane, ja mräkä nänkä nibe käkwe kukwe driedre ye ngwane nikwe mikadretari ñärärä kwin. Ne madakäre, nitre ie kukwe drie gare kwin yei nikwe ja di kärädre aune nikwe dre nuaindre niedre kwe nie ye nikwe kukwe nuadre kwin (Prov. 1:5). ¿Nitre tuadrebiti, ja tötika Bibliabätä kömikadre o kukwe driedre bä jene ye ñaka tä nemen nuäre ni kräke? Ye erere ngwane, ni umbre nitre braibe kukwe driekä jie ngwanka o ni kukwe driekä ie kukwe drie gare yebe nikwe blitadre ne kwe ni dimikadre kwe. Üai deme ye raba ni dimike dirikäre bäri kwin ye nikwe ngwandre törö jai arato. Yebätä nikwe kärädre käre orasion yete (Luc. 11:13).
3. ¿Ni ñaka ja di kärere akwa kukwe niedre nie ni dimikakäre ye ngwane, nikwe ja töi mikadre ño?
3 Ni ñaka ja di kärere akwa kukwe niedre nie ni dimikakäre ye ngwane, ni ñaka rabadre rubun (Ecl. 7:9). Nikwe ja töi mikadre bobre aune debe biandre, Apolos ye erere, aune kukwe niedre nie ni dimikakäre ye nikwe kadre ngäbiti jökrä. Nita ye erere nuainne angwane nita ja ngwen töbätä (Prov. 12:15).
4. ¿Kukwe meden ütiätebätä nikwe ja di ngwandre jankunu kukwe driekäre bäri kwin?
4 Nita nirien jankunu ye tä Ngöbö käikitekä. Nitre ja tötikaka ye dimikakäre dirikäre bäri kwin, Jesukwe kukwe bämikani ietre. Niara ye vid ye kwrere aune nitre ja tötikaka ben dianinkä nänkäre kä kwinbätä ye abokän kri küde tä ngwä nemenkä ye kwrere niebare kwe, ye abokän Rün kwe tä mutu tikekä ne kwe “ngwä rabadre bäri kabre” (Juan 15:2, WBT). Ni viña bökänkä tö viña ye tuai ngwä nemen bäri krubäte, ye erere nita kukwe driere “ja kadabti” ye Jehová tö ni tuai nuainne bäri kwin aune ere krubäte (Heb. 13:15, WBT). ¿Ni rabadre kukwe driere bäri kwin ye köböire dre rabai bare? Jesús arabe tä mike gare nie: “Munkwe sribi kuinkuin nuendi, köböire ni kwati käkwe tödekadre Ngöböbti [...] amne ti Rün rabadi käikitaninkä kri” (Juan 15:8, WBT).