“¿Ngöbö Kukwei tä ni jie ngwen mantre jetebe?”

Nikwe ñäkäi mantre jetebe Bibliabätä angwane, ni rabai tödeke kwatibe aune käre (Col. 2:6, 7). Akwa Ngöbö Kukwei yekwe ni töi ükadrete ie ni tö angwane, dre nieta kwe nie yebätä nikwe töbikadretari aune nuaindre (Heb. 4:12; Sant. 1:22-25). Kukwe ye erere rabadre bare yekäre, kukwe ketamä kwin krubäte mikata gare Josué 1:8 yekänti abokän raba ni dimike nuainne: 1) ñäkädre “dibire rare” Bibliabätä; 2) ñäkädre “tiebe tiebebätä”, ye abokän nita ñäke Bibliabätä ye ngwane kä diandrekä jai töbikatarikäre o kukwe namani bare ye bämikakäre ja töite; 3) ja di ngwandre “kukwe jökrä tä tikanibätä” ye nuainkäre. Nikwe kukwe ketamä ne nuaindi angwane, kukwe kwin rabai bare ni kräke aune nikwe ja ngwain töbätä mantre jetebe.