KUKWE JA TÖTIKARA 11
Mä raba dre nuainne ne kwe Biblia mä dimikadre bäri
Töbike kukwe nebätä: mäkwe sribi kri diandre nuaindre jai, akwa ñaka rabadre nuäre mä kräke nuainkäre. Rabadre bäri nuäre mä kräke yekäre mäkwe nuaindre kiakia jatäri. Mä tö rabadre ñäkäi Bibliabätä ngwane, ye erere raba nemen bare mäbätä. “¿Se tikwe kömikadre ño?” mä rabadre ngwentari jai. Dre raba mä dimike ñäke bäri Bibliabätä aune ja tötike kwinbätä ye rabai gare mäi kukwe ja tötikara nekänti.
1. Mantre jetebe ñäkädre Bibliabätä, ¿ye ñobätä kwin ni kräke?
Nita ñäke köbö kwatire kwatire te Bibliabätä o “kukwe biani Jehovakwe” yebätä ngwane, kä täi juto nibätä (mäkwe ñäkä Salmo 1:1-3 yebätä). Kömikakäre, mäkwe ñäkä minuto ruäre tebätä köbö kwatire kwatire. Ngöbö Kukwei rabai gare bäri mäi ngwane, bäri mä rabai ñäke kä jutobitibätä.
2. Mä täi ñäke Bibliabätä ngwane, ¿dre käkwe mä dimikai kukwe kwin mike gare jai?
Biblia rabadre ni dimike bäri yekäre, ñaka ñäkädre jerekäbebätä, ñakare aune drebätä ñäkäta yebätä töbikadretari (Josué 1:8). Mäta ñäke Bibliabätä ngwane, mä raba ne ngwentari jai: “¿Ne tä dre mike gare Jehovabätä tie? ¿Kukwe ne ti raba mike ño täte? ¿Ti raba nitre mada dimike ñobiti?”.
3. ¿Ñongwane mä raba kä denkä jai ñäkäkäre Bibliabätä?
¿Kä ñaka nemente mäi ñäkäkäre Bibliabätä? Ye erere nemen bare nitre kwatibätä. Mä ñaka kä juan ngwarbe ta (Efesios 5:16). Ñodre, mä raba ora ükete jai ñäkäkäre Bibliabätä. Nitre ruäre tä ñäke dekäbätä. Ruäre abokän tä mröre ngwane, tä ñäkebätä. Aune nitre mada abokän jämi niken kübien ye känenkri tä ñäkebätä. ¿Ora meden bäri kwin mä kräke ñäkäkäre Bibliabätä?
JA TÖTIKE BÄRI NGUSETA
Ñäkädre Bibliabätä rabadre tuin bäri kwin mäi yekäre dre nuaindre ye ani mike gare jai. Ja tötika känenkri mä raba dre nuainne ja tötikakäre bäri kwin tärä nebätä ye rabai gare nie arato.
Mrö tä kite nemen bänänte nie, ye erere ñäkädre Bibliabätä raba kite tuin kwin nie
4. Ñäkädre Bibliabätä jatadre tuin bäri kwin mäi yekäre mäkwe dre nuaindre
Ñäkädre Bibliabätä ye ñaka nuäre. Akwa töbike kukwe nebätä: mrö kwetata kena tä kite nemen bänänte nie, ye erere ñäkädre Bibliabätä ye raba kite tuin kwin nie. Ñäkädre 1 Pedro 2:2 yebätä aune kukwe ne kädriedre jabe:
Mäkwe ñäkädre mantre jetebe Bibliabätä, ¿yekwe mä töi mikai ñäke kärebätä raba ruin mäi?
Ñäkädre Bibliabätä ye jatani tuin kwin monsotre bati ie. Niaratre mikakäre gare jai VIDEO mikadre ñärärä, biti kukwe ne kädriedre jabe:
¿Monsotre ye ja tuani drebe?
¿Dre käkwe dimikani ñäke jankunu Bibliabätä?
¿Dre nuainbare kwetre ne kwe ñäkädre Bibliabätä rabadre tuin bäri kwin ietre?
Mä raba ne nuainne kömikakäre:
Biblia kwitani kwin aune nuäre rükakäre gare yebätä mäkwe ñäkä. Biblia Traducción del Nuevo Mundo tärä mä kukweibiti ngwane, mä raba ñäkebätä.
Kukwe tuin bäri kwin mäi yebätä mäkwe ñäkä käne. Tabla kädekata “Mä raba ne nuainne ñäkäkäre Bibliabätä” ye raba mä dimike.
Kapitulobätä mäkwe ñäkäi ye mäkwe täräi mikaka. Mäkwe täräi mikaka tabla kädekata “Tita ñäke Bibliabätä köbö kwatire kwatire” tä tärä nebätä yekänti.
Aplicación JW Library® yebiti mä raba ñäkebätä arato. Aplicación ye mä raba mike telefononte jai o drekwe madate ñäkäkäre Bibliabätä aune kukwe nuakäre.
Tärä ni jie ngwankäre ja tötike Kukwe Ngöbökwe yebätä ye mäkwe mika ñärärä. Yete tabla aune mapa tärä mä dimikakäre ñäke bäri kwin Bibliabätä.
5. Mä tötikata ye känenkri mäkwe ja tötika kwin
Ñäkädre Salmo 119:34 yebätä aune kukwe ne kädriedre jabe:
Mä jämi ñäke Bibliabätä o ja kite tärä nebätä ngwane, ¿ñobätä mäkwe oradre käne?
¿Mä raba dre nuainne ja tötikakäre bäri kwin tärä nebätä? Mä täi ja tötikebätä ngwane, mäkwe ne nuain:
Kukwe ja tötikara jökräbätä párrafo kena yebätä mäkwe ñäkä.
Mäkwe texto känä aune ñäkäbätä, biti texto ye raba mä dimike ño kukwe mike gare bäri kwin jai yebätä mäkwe töbika.
Kukwe meden raba mä dimike kukwe ngwantarita mike gare ye mäkwe täräi mikaka. Yekwe mä dimikai ja tötike bäri kwin dirikä mäkwe yebe.
¿Ne gare mäi?
Nun testiko Jehovakwe tärä ñäke Biblia keta kabrebätä, akwa nun tö ñäkäi Traducción del Nuevo Mundo yebätä, ñobätä ñan aune kwitani metre, nüke gare kwin aune Ngöbö kä tä tikanibätä (artículo jw.org ne mäkwe mika ñärärä: “¿Nitre testiko Jehovakwe yekwe Biblia sribebare jeñe ja kräke?”).
NITRE RUÄRE TÄ KUKWE NE NIERE: “Ñaka nuäre aune tita nainte. Kä ñaka jire ja tötikakäre tie”.
¿Mä abokän raba dre niere?
¿DRE NIBI GARE MÄI?
Biblia rabadre mä dimike bäri yekäre, ora ükadrete jai ñäkäkärebätä, kukwebätä mäta ñäke ye rükadre gare mäi yekäre, mäkwe ja di kärä Ngöböi aune mä tötikata ye känenkri mäkwe ja tötika kwin.
Ngwankäreta törö
¿Dre raba mä dimike kukwe mike gare bäri jai Bibliabätä?
¿Ñongwane mä raba kä denkä jai ñäkäkäre Bibliabätä aune ja tötikakärebätä?
¿Ñobätä mäkwe ja tötikadre kwin ja tötika ye kräke?
KUKWE MIKE GARE BÄRI JAI
Kukwe ruäre raba mä dimike ja tötike kwin Bibliabätä ye mike gare jai.
“Ñäkädre Bibliabätä ye käi raba nemen juto mäbätä” (Ni Mikaka Mokre, núm. 1 2017)
Ñäkädre ño Bibliabätä ye mike gare ketamä jai.
Ñäkädre Bibliabätä käi raba nemen juto mäbätä ye mike gare jai.
Nitre tä ñäke kirabe Bibliabätä tä kukwe mike gare ye mike ñärärä.
Ja tötikadre ño Bibliabätä kukwe ütiäte mikakäre gare jai (2:06)