Kukwe dianinkä gätä Nita Dirire aune Ja Ngwen Ño ye kräke
2-8 NOVIEMBRE
KUKWE ÜTIÄTE BIBLIABÄTÄ | ÉXODO 39, 40
“Kukwe niebare Moisés ie ye mikani täte jökrä kwe”
¿Ti gare kwin Jehovai?
13 “Moisés ye abokän töi nämäne bäri jäme nitre mada nünanka kä tibienbätä yebiti ta” akwa Coré abokän ñaka nämene ja ngwen ye erere (Núm. 12:3). ¿Moisés töi nämene jäme ye bämikani kukwe meden medenbiti kwe? Töi bobrebiti kukwe ribebare ie Jehovakwe ye erere nuainbare kwe (Éxo. 7:6; 40:16). Ngöbö nämene kukwe ribere ie ye ñan nämene nemen tuin debe ie o nämene ñäke rüere ye mika ñaka gare Bibliabätä. Tabernáculo sribedre kwe Jehová mikakäre täte ye Jehovakwe ribebare ie yebätä töbike. Dän ngwän bä ño aune sribedre ño ño aune kukwe mada mada nuaindre ño ye mikani gare metre Moisés ie (Éxo. 26:1-6). Mekerabe nukebe nengwane Jehovata nitre kädeke juta kwe ye jie ngwankäre. Ruäre ngwane kukwe ribeta krübäte nuaindre nie o nuain ñaka raba nie tä nemen rüin nie, akwa Jehová ni Rün, ni jie ngwanka metre tä nitre kädeke ji ngwanka aune tä tö ngwen ietre, aisete kukwe kia kia keta kabre ribeta kwe ye nuain raba nie ye gare ie. Kukwe keta kabre Jehovakwe ribebare Moisés ie tabernáculo sribekäre ye ngwane, ñaka namani rubun aune ñaka mika nämene ütiäte jai ye ñan nütubare kwe ñakare aune dre ribebare ie ye erere nuanbare kwe aune sribedre ño ye erere nitre sribikä nämene nuaine ye niara nämene mike gare kwin jai (Éxo. 39:32). ¡Moisekwe ja töi mikani bobre krübäte! Sribi ye Ngöbökwe aune Jehovakwe niara mikani sribi ye nuainkäre ye nämene gare metre ie.
w05 15/7 26 párr. 3
¿Nita jangwen metre jondron yebiti?
3 “Moisés käkwe ja ngwani metre” mikata gare Hebreos 3:5 yete, akwa ¿dre käkwe Moisés dimikani ja ngwen metre? Tabernáculo sribebare kwe ye ngwane, “Jehovakwe dre dre nuain mananbare Moisés ie ye nuainbare jökrä kwe. Ye erere nuainbare kwe” (Éxodo 40:16). Ni Jehová mikaka täte tä ja ngwen metre aune niara kukwei mike täte. Ye abokän ni nuateta o kukweta nakainkä nibätä angwane nikwe ja ngwandre metre jankünü, akwa ye ñan aibe tä mike gare ni abokän ja ngwanka metre o ñakare. Jesús käkwe niebare: “nire käta jändrän braibe ngibiare kuin era metre, ni yebti abko tödekata jändrän kabre ngibiabtä kuin era metre. Erere arato, ni ni ngökaka jändrän braibe btä abko käkwe ni ngökadre jändrän kabrebtä arato” (Lucas 16:10). Jondron jökräbätä nikwe ja ngwandre metre.
Perla ükani känändre
it-2 663
Foca kwata
Ñokänti namani nitre israelita yekwe. Foca ye abokän nünanka kä tibo krubäte yekänti, akwa ruäre abokän raba kwen kä madakänti. Kä nengwane, foca fraile ye raba kwen kä ruäre mar mediterraneo yekänti, aune kä mada mada ngire känti. Kirabe mar mediterraneo aune mar Rojo yete foca nämäne krati krubäte.
it-2 664 párr. 1
Foca kwata
Kirabe nitre Egipto nämäne kä mar Rojo yekänti jondron kökö aune rürübäine nitre nämäne kä Mediterraneo ye ie. Ye köboire foca kwata ye namani gare ietre. Aisete nitre israelita ye nikani kä Egipto bäre mento ngwane, foca kwata nämäne kwetre ye jänikani kwetre raba ruin nie, ne madakäre nikanintre kä Egipto ye bäre mento ngwane, jondron ütiäte ütiäte biani ere ietre nitre egiptobo yekwe (Éx 12:35, 36).
¿Sribi nuainta nikwe ye nireta mike ñärärä ye ütiäte?
Biblia tä mike gare, muta namani jübente jondron kwata sribebare jure yebiti aune kukwe ñan tuabare namani bare tabernáculo yekänti sribi krütani ye bitikäre (Éx. 40:34). Jehová ara nämäne kukwe nuainne. Bezalel aune Oholiab sribibare ye Jehovakwe kani ngäbiti namani gare ietre ngwane, kä namani bäri juto bätätre (Prov. 10:22).
9-15 NOVIEMBRE
KUKWE ÜTIÄTE BIBLIABÄTÄ | LEVÍTICO 1-3
“¿Drekäre jondron bian nämäne?”
it-2 523 párr. 1
Jondron bian nämäne
Jondron bian nämäne kukwara. Jondron nire bian nämäne kukwara ye jökrä bian nämäne Ngöböi aune nire nämäne niara mike täte ye ñaka nämäne denkä chi ja kräke (Jue 11:30, 31, 39, 40 mikadre ñärärä). Jondron bian nämäne kukwara ne kwe Jehovakwe ni ye kädre ngäbiti aune ngite juandre ta ni yebiti. Jondron bian nämäne kukwara ye erere arato Jesús ja biani täte.
it-2 525 párr. 8
Jondron bian nämäne
Jondron ngwä bian nämene. Jondron ngwä bian nämäne kukwara, jondron bian nämäne ja ketakäre jäme Ngöböbe, ngite ütiäre aune jondron ngwä kena kena ye bian nämäne gwaire, ruäre bian nämäne jene jene (Éx 29:40-42; Le 23:10-13, 15-18; Nú 15:8, 9, 22-24; 28:9, 10, 20, 26-28; cap. 29). Ngöbö nämäne kukwe kwin mike nemen bare niaratre kräke aune jondron nämäne kwetre yebätä niaratre nämene jondron bien debe biankäre. Jondron ye bian nämäne ngwane aceite aune olivano mika nämene te. Jondron ngwä bian nämäne ye abokän jene jene ñodre, harina o jondron ngwä rötani bätä sribebare galleta kwrere o kukwani ukwenbätä. Jondron ngwä bian nämäne ye mika nämäne jondron kukwara yebiti, mada abokän sacerdote nämäne kwete aune jondron bian nämäne ja ketakäre jäme Ngöböbe yete nire nämene Ngöbö mike täte ye nämene kwete arato (Le 6:14-23; 7:11-13; Nú 18:8-11). Jondron ngwä bian nämäne yete ñaka levadura o munköi mika nämäne, ñodre, higo ngwärie o jondron mada mada mane mika ñaka nämäne te ne kwe ñaka rabadre dime (Le 2:1-16).
“Kukwe era metre [tä ükaninte]” yebätä nikwe ja tötikadre
11 Ngöbökwe Kukwe biani Moisei ye nämene niere arato, nitre Ngöbö mikaka täte metre ye jondron nire biandre kwetadre ngwairebe sacerdote yebe, niaratre nämene ja mäke kwin Jehovabe bämikakäre. Niaratre bätä mräkätre nämene jondron nire ye ngätä kwete, aune käre nämene nuainne kä jondron kwetakäre templote yekänti (Lev. 3:1, nota; 7:31-33). Kukwe ye nuain nämene ja mäkäkäre kwin Ngöböbe. Ye abokän ni Ngöbö mikaka täte, mräkä kwe, nitre sacerdote aune Jehová nämene mröre ngwairebe aune töi jämebiti ye kwrere.
Perla ükani känändre
w04 15/5 22 párr. 1
Kukwe ütiäte dianinkä tärä Levítico yebätä
2:13. ¿Ñobätä mren mika nämäne jondron bian nämäne yebätä? Ñaka mika nämäne jondron kukwara yebätä ne kwe bänä rabadre bäri kwin. Kä jökräbiti tibien mren ye mikata jondronbätä ne kwe ñaka rikadre ngwarbe jötrö. Mren ye mika nämäne jondron bian nämäne yebätä ñobätä ñan aune yebiti bä mika nämäne jondron ye nämäne kwin aune ñaka ngutianinte ye ni raba niere.
Tärä Levítico ye ja töi kräke
10 Kukwe ketamäkäre ja töi kräke: Nita jondron kwin bien Jehovai ñobätä ñan aune tare nikwe yebätä. Jondron nire kö ye nämäne tuin bäri kwin Jehovai. Arato jondron nire mumain bätä moto ye nämäne ütiäte krubäte kräke ye mikani gare kwe (ñäkädre Levítico 3:6, 12, 14-16 yebätä). Ni israelita nämäne ja töi jeñebiti jondron nire ye mumain, moto aune kö ye bien kukwadre ye nämäne kä mike juto krubäte Jehovabätä. Ni israelita nämäne jondron ye kwrere bien Jehovai ngwane nämäne bämike niara tö nämäne jondron kwin ye bianbätä ie. Ye erere arato, Jesukwe Rün mikani täte ja nire tätebiti ngwane, jondron bäri kwin ye biani kwe ie nämäne tarere yebätä (Juan 14:31). Ngöbö töi mikadre täte ye nämäne kä mike juto krubäte Jesubätä aune nämäne kukwe ükaninte Ngöbökwe ye tarere krubäte (Sal. 40:8). Jesús nämäne juto biare sribikäre ye käkwe kä mikani juto krubäte Jehovabätä.
11 Jondron bian nämäne Ngöböi ja keta nämäne jäme ben bämikakäre ye nuain nämäne ja töi jeñebiti aune niara tare nämäne yebätä. Sribi nikwe Jehová kräke ye ketata jondron nire bian nämäne Ngöböi yebätä, ñobätä ñan aune ni töita ño niara kräke ye nita bämike ie sribi nuainta nikwe kräke yebiti. Ngöbö tare nikwe yebätä ja brukwä tätebiti aune ja di tätebiti nita sribire kräke. Nitre kwati tä niara tarere krubäte yebätä tä sribire kräke aune tä kukwe kwe tarere ye tä kä mike juto krubätebätä. Nita sribire kräke ye tuin ie aune ñan jerekäbe tä mike ütiäte jai, ñakare aune ñobätä nita nuainne ye gare ie ye tä ni töi mike jäme. Ñodre, ni niena umbre yebätä ni di ñan niena sribikäre krubäte kräke ye gare ie aune niara ñan tä ja töi mike ni ñan sribire krubäte kräke ye aibätä. Ni ñan sribire krubäte kräke ni raba nemen nütüre akwa niara tare krubäte nikwe yebätä nita ja di ngöibiti sribi nuainne kräke ye tuin ie. Nita sribire ja di ngöibiti kräke ye niarata kain ngäbiti kä jutobiti.
16-22 NOVIEMBRE
KUKWE ÜTIÄTE BIBLIABÄTÄ | LEVÍTICO 4, 5
“Dre bäri ütiäte nikwe ye biandre Jehová ie”
it-2 524 párr. 13
Jondron bian nämäne
Jondron nire bian nämäne ngite ütiäre. Ja mika nämäne ngite ngwane, jondron bian nämäne ngite ütiäre, ja mika ñaka ngite ngwane, ñan jondron bian nämäne ngite ye ütiäre. Metrere jondron ye bian nämäne ngite keteiti ütiäre, ye abokän Jehovakwe kukwe ükaninte aune juta kwe ye ruere ja mika nämäne ngite, akwa bäsi ñan ja erebe jondron mada bian nämäne ngite ütäre yebe, jondron ye nitre nämäne bien ne kwe rabadre ja mäketa kwin Jehovabe o rabadreta jäme juta Jehovakwe yete. Nitre ja mikani ngite käkwe ja töi kwitani ye mikadreta kwäre aune töi rabadreta jäme yekäre nämäntre jondron bien (Isa 53:10 mikadre ñärärä).
Nikwe Jehová käikitadrekä konkrekasionte
4 Ni jökrä ñaka töi ngitiekä ja erebe aune kukwe jene jene tä ni kisete ye gare Jehovai, ye medenbätä nita ja di ngwen blitakäre gätäte ye niarata mike tuin ütiäte jai. Nitre israelita nämäne dre dre bien kukwadre yebätä ani töbike. Nitre kwe oveja o cabra nämäne ye erere nämäne bien kukwadre. Nitre bobre ye tuametre nämäne “ütü kubu o ütü ngäbä kubu” ye bien. Aune, nire kwe ütü ñaka nämäne ye ngwane, “harina kwin” biandre kwe ye Jehová nämäne kain ngäbiti (Lev. 5:7, 11). Harina ye ütiä nämäne bäri brai, akwa “harina kwin” bian nämäne ye Ngöbö nämäne käre mike ütiäte jai.
Perla ükani känändre
Nitre Ngöbö mikaka täte kirabe ja ngwani metre ye erere nikwe ja ngwandre
14 Ni töi kwin ni mada kräke nikwe bämikadre ye raba ni dimike ja ngwen metre Jehová aune nitre madai arato. Ñodre, töbike kukwe nebätä ni Testiko käkwe kukwe blo nuaindre ye tädre gare metre mäi. Ye ngwane ni ye mä mräkä o ja ketamuko mäkwe, yebätä mä törbadre ja ngwain metre ie raba ruin nunye. Akwa mäkwe ja ngwandre metre Jehovai ye bäri ütiäte gare mäi. ¿Mäkwe dre nuaindre? Mäkwe ja ngwan Natán erere. Mäkwe Jehová kukwei mika täte aune mäkwe ja töi mika kwin ja mräkätre o ja ngwaitre kräke. Ja di kärädre biarebe kwe nitre umbre ji ngwanka konkrekasionte yei mäkwe nie ie. Niarakwe ñaka blitadre nitre umbre ji ngwanka yebe angwane, mäkwe nuaindre. Ye köböire mäkwe ja ngwain metre Jehovai. Aune mäkwe ja töi mikai kwin ja mräkä o ja ngwai kräke arato, ñobätä ñan aune töi jämebiti nitre umbre ji ngwanka ye käkwe töi ükaite bätä dimikai kwetre ja keteta kwin Jehovabe (ñäkädre Levítico 5:1 aune Gálatas 6:1 yebätä).
it-2 940 párr. 6
Deme
Jondron nire aune jondron nökani. Nibi, oveja aune cabra ngäbä kena kena ye nämäne deme Jehová kräke, yebätä kämika nämäne. Kämika nämäne Jehová kräke aune bian nämäne sacerdote ie arato, niaratre ye nämäne deme (Nú 18:17-19). Jondron gwä kena, diezmo, jondron kämika nämäne aune jondron mada mada bian nämäne sribikäre santuario yete, ye nämäne deme (Éx 28:38). Jondron jökrä deme ye nämäne ütiäte krubäte Jehová kräke, aune jondron ye ñaka mikadre kukwe ngwarbe kräke. Keteiti ye abokän kukwe ükaninte diezmo yebätä. Ñodre, ni iti käkwe diezmo, trigo ngwä diandrekä biankäre, akwa biti ni ye arabe o ni mada käkwe jondron ye diandre riakäre o kukwe mada nuainkärebiti ngwane, kukwe biani Ngöbökwe ye rüere nämäne ja mike ngite, ñobätä ñan aune jondron ye abokän nämänena nemen deme. Kukwe ye erere nuain nämäne ngwane, jondron ye kwrere biandre aune 20% biandre bäri, ne madakäre cabra kwin ye kämikadre biankäre ye ribe nämäne kukwe ükaninte yebätä. Yebiti jondron deme Jehová kräke ye mika nämäne ütiäte (Le 5:14-16).
23-29 NOVIEMBRE
KUKWE ÜTIÄTE BIBLIABÄTÄ | LEVÍTICO 6, 7
“Debe bianta ye bämikadre”
Tärä Levítico ye ja töi kräke
9 Kukwe ketebukäre ja töi kräke: Ni tö debe biain Jehovai yebätä nita sribire kräke. Nitre israelita nämäne jondron bien kukwadre Ngöböi ja keta nämäne jäme ben ye bämikakäre yebätä ani ja tötike. Ngöbö nämäne kukwe kwin nuainne nitre israelita kräke yebätä nämänentre debe bien ye bämikakäre nämänentre jondron nire bien Ngöböi ye mikata gare tärä Levítico yebätä (Lev. 7:11-13, 16-18). Nämänentre jondron bien kukwadre Jehovai ribe nämäne ietre ye ñan aibätä ñakare aune tö nämäne biain yebätä nämänentre nuainne. Nämänentre Jehová tarere yebätä nämänentre jondron bien kukwadre ja töi jeñebiti Ngöböi. Ni jondron nire bianka kukwadre ye mräkätre aune sacerdote nämäne ngri ye kwete. Akwa ngri ruäre dianka nämäne Jehová aibe kräke. ¿Gere dianka nämäne mento?
w00 15/8 15 párr. 15
Jondron ruäre bian nämäne ye namani tuin kwin Ngöböi
15 Kukwe mada nuain nämäne ye abokän jondron bien nämäne ja töi jeñebiti kukwadre Ngöböi ja ketakäre jäme ben, ye erere mikata gare Levítico kapitulo 3 yete. Arato kukwe ye kwita raba jondron bian nämäne ja ketakäre jäme Ngöböbe. Kukwe hebreorebiti jäme nieta ye ñan tä mike gare jerekäbe, ñaka rüta jabätä o ja mike kukwe mada mada te. Ñakare aune “Bibliabätä mikata gare, nita ja kete kwin Ngöböbe aune nita nüne kä jutobiti”, nieta tärä Studies in the Mosaic Institutions (Estudio de las instituciones mosaicas) yebäta. Aisete jondron bian nämäne kukwadre Ngöböi ne kwe ja ketadre jäme kwe nibe, ye ñan aibe, ñakare aune nire ka ngäbiti nämäne Ngöbökwe ye nämäne debe bien. Jondron bian nämene kukwara ye därie aune köi bian nämäne Jehovai ye bitikäre nitre sacerdote aune nitre jondron bianka ye nämäne kwete (Levítico 3:17; 7:16-21; 19:5-8). Nitre jondron bianka, sacerdote aune Jehová nämäne mröre gwaire, yebiti bämikani niaratre nämäne ja kete kwin jabe.
w00 15/8 19 párr. 8
Jondron ruäre bian nämäne Jehová käikitakakäre
8 ¿Nitre nämäne jondron bien yebätä ni raba dre niere? Kukwe biani ye nämäne mike gare nitre nämäne nökrö Jehová ken ye tädre merebe aune kwin. Nire käkwe ja mikadre ngite o ñan tädre merebe ye käkwe jondron biandre käne ngite juankäre ta jabiti, ne kwe rabadreta merebe aune kwin Jehová okwäkänti, ye köböire jondron biandre kwe ye Jehovakwe kadre ngäbiti (Levítico 5:1-6, 15, 17). Ye medenbätä ni tädre käre merebe Jehová okwäkänti, ¿ye ütiäte ni kräke? Nita ja mike ngite ngwane nikwe ja töi kwitadre jötrö ngwarbe ne kwe nita Ngöbö mike täte ye kadre ngäbiti kwe. Ngöbökwe kukwe ükaninte ni die mikakäre yete nikwe ja di känändre, ñodre “nitre umbre ji ngwanka konkrekasionte” aune Jesukwe ja nire biani ni ngite ütiäre ye ie nikwe tö ngwandre käre (Santiago 5:14; 1 Juan 2:1, 2).
Perla ükani känändre
it-1 970
Ñukwä
Mikani tarbenáculo aune templote. Kä jondron kukwara yebiti ñukwä tädre okwä bukaninkä aune trä tädre käre ribe nämäne Kukwe biani yebätä (Le 6:12, 13). Ngöbökwe ñukwä mikani kä jändron kukwakäre yebiti ye nitre judío tä mike gare akwa ye erere Biblia ñaka mike gare. Kukwe biani nuaindre kena Moisés ie yete mika nämäne gare, Aarón monsoitre ye rabadre “ñukwä mike kä jondron kukwara yebiti aune ngi ükete ñukwä kräke” jondron mika jämi kä kukwakäre yete ye känenkri (Le 1:7, 8). Aarón monsoitre kädekani sacerdotere ye bitikäre, Jehová käkwe ñukwä yebiti jondron nämäne mikani kä jondron kukwakäre yebiti ye kukwani, muta nämäne tabernáculobiti yete ñukwä ye nämäne raba ruin nie. Ye medenbätä Ngöbökwe ñaka ñukwä mikani ngi ye okwä bukakakäre, ñakare aune jondron nämäne mikani kukwara ye aibe kukwani kwe.
si 27 párr. 15
Tärä ketamokäre Bibliabätä: Levítico
15 3) Nitre ñaka tö nämäne ja mikai ngite akwa nämäne nainte ie ngwane, jondron biandre ngite ütiäre ye ribe nämäne ietre. Nitre sacerdote, juta israel, ni ji däkwäte o ni mada mada nämäne ja mike ngite, ye ererebätä jondron nire bian nämäne ngite juankäre ta bititre. Jondron bian nämäne kukwakäre aune ja ketakäre jäme Ngöböbe ye bian nämäne ja töi jeñebiti, akwa ye erere ñaka nuain nämäne jondron bian nänäne ngiti ütiäre yebätä, ñobätä ñan aune nitre jökrä rabadre jondron bien ribe nämäne (4:1-35; 6:24-30).
30 NOVIEMBRE NEMEN 6 DICIEMBRE
KUKWE ÜTIÄTE BIBLIABÄTÄ | LEVÍTICO 8, 9
“Jehová tä kukwe kwin nuainne ni kräke ye bämikani kwe”
it-1 1239
Jondro ükaninte
Aarón aune monsotre kwe, Nadab, Abihú, Eleazar aune Itamar ye rabadre ja kise aune ja ngoto batete, jondron cobrere sribebare ño ngwäre tabernáculo yekänti ye Moisés ribebare ietre, ye bitikäre dän sacerdote bäri kri kräke ye kitani kwe Aarónbätä (Nú 3:2, 3). Dän bä nuäre kitani Aarónbätä ye kukwe ütiäte aune niara ja töi mikadre kwin ye bämika nämäne yebiti. Ye bitikäre tabernáculo, jondron jökrä nämäne yete, bätä kä jondron kukwara aune jondron cobrere ye jökrä Moisekwe dianinkä rabakäre deme. Jondron ye mikani deme aune dianinkä sribi nuainkäre Jehová aibe kräke. Mrä mada, Moisekwe aceite kekani Aarón dökwabiti diankakäre sacerdotere (Le 8:6-12; Éx 30:22-33; Sl 133:2).
it-1 1240 párr. 8
Jondro ükaninte
Köbo kwä yete, nitre sacerdote, sribi meden nuaindi yekäre nämäna ja ükaninte biare (akwa ñaka Moisés diebiti) ye ngwane, sribi ngite juankäre ta nitre israelbiti ye nuainbare kena kwetre. Nitre israel nämäne kukwe ye ribere jai, niaratre nämäne ngite ye ñan aibebätä ñakare aune nibi ngäbä orore mikani ngöböre kwetre yebätä Jehová namani rubun yebatä niaratre mikadre merebe ye nämäne ribere jai (Le 9:1-7; Éx 32:1-10). Sribi kena nuainbare sacerdotekwe ye bitikäre Jehovakwe niaratre kani ngäbiti ye bämikani. Ye abokän muta nämäne tabernáculo bitita, yekänti ta ñukwa tra ngitianinkä, käkwe jondron nämäne kukwakäre ye kukwani jökrä (Le 9:23, 24).
Tärä Levítico ye ja töi kräke
13 Kukwe ketabokäkäre ja töi kräke: Jehovata kukwe kwin mike nemen bare nitre niara mikaka täte ye kräke. Kä 1512 Kristo känenkri yete tabernáculo sribebare ngutuä Sinaí ngürebätä ye ngwane dre namani bare yebätä ani ja tötike chi (Éx. 40:17). Aarón aune monsotre kwe kädekani sacerdote ye ngwane, Moisés käkwe gätä ye jie ngwani. Nitre sacerdote käkwe jondron nire kukwani kena Jehovai ngwane nitre israelita käkwe ja ükaninkrö kukwe ye mrusaikäre (Lev. 9:1-5). ¿Nitre sacerdote kädekani ye namani debe Jehová kräke ye bämikani ño kwe? Aarón aune Moisés käkwe kukwe kwin ribebare Ngöböi nitre israelita kräke ngwane, ñukwä Jehovakwe kä kwinbätä jatani näkäin kä nikani jondron mikani kukware altarbiti ye kukwe ngise jökrä (ñäkädre Levítico 9:23, 24 yebätä).
Perla ükani känändre
Ñobätä nikwe ja ngwandre deme
6 Nitre sacerdote nämene ja ngübare kwin merebe ja ngrabarebiti ye ütiäte ni kräke kä nengwane. Kä gätä nuainkäre ye tä kwin merebe aune nita ja ükete kwin nänkäre yete, ye tä käre nitre ja tötikaka Bibliabätä nibe ye töi mike ñan krütare. Ne madakäre, nitre sacerdote nämene ja ngübare kwin merebe ye tä ngwen törö nie, nire rikadre “ngutuä Jehovakwe yekänti” niara mikakäre täte metre ye rabadre nuainne ja brukwä kwinbiti (ñäkädre Salmo 24:3, 4 yebätä; Is. 2:2, 3). Nikwe Jehová mikadre täte, ja brukwä, ja töi aune ja ngrabare kwin merebebiti yei niara tö. Ye nuainkäre nikwe töbikadretari käre jabätä. Nikwe ye nuaindi angwane rabai gare nie kukwe ruärebätä ni rabadre ja töi ükete drekebe ngwarbe (2 Cor. 13:5). Ñodre, ni Jehová mikaka täte käkwe ja ngökanina ñöte tädre nierare ni üai butiere tuin ye rabadre ngwentari jai: “¿Ti tö ja ngwain deme ye tita bämike?”, ye bitikäre rabadre ja di kärere kukwe käme nuainta kwe ye tuametrekäre (Sant. 5:14).
it-2 416 párr. 1
Moisés
Ngöbökwe kukwe biani nitre israelita ie yebiti kukwe ükaninte kwe juta Israel ben, metrere nitre umbre ji ngwanka nitre Israel käne yebe. Aune Ngöbökwe Moisés kädekani ne kwe rabadre blite nitre Israel diäre. Ye abokän, Moisés nämäne blite juta Israel kräke Ngöböbe kukwe ükaninte yebiti. Ye köböire Moisés nökrani bäri Jehová ken. Jesús aune Moisés ye aibe käkwe kukwe ye erere nuainbare. Kukwe ükaninte ye nämäne tikani täräbätä aune Jehová aune juta Israel käkwe kukwe ükaninte jabe ye bämika nämäne. Ye medenbätä Moisés käkwe jondron nire biani ye däriei metaninkä tärä yebiti. Moisés käkwe ñäkäbäre tärä yebätä nitre Israel ie ngwane niaratre käkwe niebare: “Jehovakwe kukwe niebare ye nunta juto biare nuainkäre jökrä aune mikakäre täte” (Éx 24:3-8; Heb 9:19). Moisés nämäne blitaka Jehová aune juta Israel kräke, yebätä tabernáculo sribedre ño niebare Ngöbökwe aune jondron mada mada nämäne mikani yete ye niarakwe tuaninbiti. Ne madakäre aceite metaninkä kwe tabernáculo yebiti aune kekani kwe sacerdote bäri kri Aarón ye däkwäbiti. Ye bitikäre sribi nuainbare kena nitre sacerdotekwe ye Moisés käkwe tuaninbiti (Éx 25–29; Le 8, 9).