Mäkwe tödeka nitre madakwe mika dite Jehová aune Jesubiti tärä Mä raba nüne kä jutobiti kärekäre yebiti

Nitre ja tötikaka Bibliabätä rabadre tödeka jakwe mike dite kukwe kwin nuainkäre Ngöbö okwäbiti (Heb 11:6). Täräkwata Mä raba nüne kä jutobiti yebiti ni raba kukwe mike nemen niaratre brukwäte. Texto ütiäte ütiäte, kukwe mikata gare kwin, kukwe kwin ngwantarita töbikatarikäre, üai bä nuäre aune video tä mikani täräkwata yebätä. Nikwe nitre ja tötikaka dimikai ja töi mike ni kristiano erere aune nikwe dimikai ja kete kwin Jehová ben ngwane, kukwe ja üairebiti jondron ribi ñaka nukwe ye ererebiti tödeka jakwe mikai kwetre (1Co 3:12-15).

Ngöbö ñaka tuin nitre ie yebätä ñaka raba ja kete ben ruin ietre. Ye medenbätä, ni rabadre niaratre dimike Jehová mike gare jai aune tö ngwen ie.

VIDEO MÄKWE TÖDEKA NITRE MADAKWE MIKA DITE JEHOVABITI TÄRÄ “MÄ RABA NÜNE KÄ JUTOBITI KÄREKÄRE” YEBITI YE MÄKWE TUA, BITI KUKWE NGWANTARITA NE MÄKWE MIKA GARE:

• ¿Meri testiko ja kitani kwin nitre tötikakäre ye ñokänti gare nie?

• Ni ja tötikaka tä töbike ño kukwe nieta Isaías 41:10, 13 yebätä ye mikadre gare kwe yekäre, ¿meri testiko ye käkwe kukwe meden mada kwin ngwinintari ie?

• ¿Video ye matani ño ni ja tötikaka yebätä aune texto Bibliabätä ye käkwe dre mikani gare ie?

Ni kökanintari ye dre gärätä ñaka nüke gare nitre kwati ie aune ye abokän kukwe ütiäte biani Ngöbökwe ni kräke ye erere ñaka tuin ietre (Gál 2:20). Ye medenbätä, nikwe niaratre dimikadre ne kwe rabadre tödeke ni kökanintari Jesukwe ye ie.

VIDEO MÄKWE TÖDEKA NITRE MADAKWE MIKA DITE JESUBITI TÄRÄ “MÄ RABA NÜNE KÄ JUTOBITI KÄREKÄRE” YEBITI YE MÄKWE TUA, BITI KUKWE NGWANTARITA NE MÄKWE MIKA GARE:

• ¿Ja mräkä käkwe ja kitani kwin ni tötikakäre ye ñokänti gare nie?

• Kukwe tä mikani gare sección “Kukwe mike gare bäri jai”, ¿yebiti ni ja tötikaka ye dimikani ño kwe?

• ¿Oradre ye ñobätä ütiäte krubäte ni ja tötikaka ye kräke?