KUKWE JA TÖTIKARA 30
Profecía kirabe abokän ütiäte krubäte mä kräke arato
“Ma btä ni merire rabadi ja rüere kwärikwäri” (GÉN. 3:15, JK).
KANTIKO 15 ¡Monso mubai Ngöbökwe ye käikitekä!
KUKWE NEBÄTÄ JA TÖTIKAIa
1. ¿Adán aune Eva ja mikani ngite ye bitikäre Jehovakwe dre nuainbare? (Génesis 3:15).
ADÁN aune Eva ja mikani ngite ye bätäräbe Jehovakwe tödekara kwin biani mräkätre jatai jatäri ye ie profecía ütiäte krubäte yebiti. Profecía ye raba kwen nie Génesis 3:15 yebätä (ñäkädrebätä).b
2. ¿Profecía tä Génesis 3:15 yete ye ñobätä ütiäte krubäte ni kräke?
2 Tärä kena Bibliabätä yete profecía ye raba kwen nie. Kukwe jökrä tä Bibliabätä ye tä blite kukwe bäsi ye ererebätä. Köbiti ngi mäkäta köböire ngi tä nemen mäkäni kwin jabätä, ye erere arato profecía tä Génesis 3:15 yebiti tärä jökrä Bibliabätä tä nemen keteitibe ye kwrere aune tä kukwe ja erebe mike gare. ¿Kukwe ye abokän meden? Ngöbökwe ni iti juandi Satana aune nitre nänkä niara jiebiti ye gatekäre kärekäre mikani gare.c ¡Nire tä Jehová tarere ye kräke kukwe ne kwin krubäte!
3. ¿Dre rabai gare nie kukwe ja tötikara nekänti?
3 Profecía tä mikani Génesis 3:15 yete yebätä kukwe ruäre ngwantarita ye nikwe mikai gare jai kukwe ja tötikara nekänti: ¿Nire nirebätä blitata profecía yebätä? ¿Kukwe ye nemen bare ño ? ¿Aune ye tä ni dimike ño kä nengwane?
¿NIRE NIREBÄTÄ BLITATA PROFECÍA YEBÄTÄ?
4. ¿Tibi ye abokän nire aune ye ñokänti gare nie?
4 Génesis 3: 14, 15 yete blitata “tibi” bätä “ngäbäli” kwe yebätä aune “meri” bätä “bükün” kwe yebätä. Kukwe bämikata yete ye abokän nirebätä blitata ye Biblia tä mike gare metre nie.d Kena ani blite “tibi” yebätä. Kukwe mikani gare ne ñaka raba nüke gare jondron nire ie. Aisete nire ie kukwe raba nüke gare ye kräke kukwe ne mikani gare kä Edén yete. Aune kukwe ye Biblia tä mike gare metre ta nie. Apocalipsis 12:9 yete “tibi kira” ye abokän Diablu Satana mikata gare. ¿Akwa tibi ngäbriänkä ye abokän nire bämikata?
TIBI
Satana, Diablu; Apocalipsis 12:9 yete kädekata “tbi kira” (Párrafo 4 mikadre ñärärä)
5. ¿Nire nire abokän tibi ngäbriänkätre?
5 Kukwe bämikatabiti blitata “ngäbriänkätrebätä” Bibliabätä ngwane, ni ye tä ja töi mike aune ja ngwen rün kwe Satana erere meden gärätä. Aisete tibi ngäbriänkätre ye abokän angeletre aune nitre brukwä käme tä ja mike Jehová aune juta kwe rüere Satana tä nuainnne erere meden gärätä. Nitre ye ngätäite angeletre ja töi mikani käme Noé näire aune nitre brukwä käme tä ja ngwen Satana erere ye tä (Gén. 6:1, 2; Juan 8:44; 1 Juan 5:19; Jud. 6).
TIBI NGÄBÄLI
Nitre üaire töi käme aune nitre kä tibienbätä töi käme tätre ja mike Jehová aune juta Jehovakwe rüere (Párrafo 5 mikadre ñärärä)
6. Génesis 3:15 yete ñan blitata Evabätä, ¿ye ñobätä ni raba niere?
6 Meribätä blitata ye abokän nire ye ani mike gare jai. ¿Ye abokän blitata Evabätä? Ñakare. Ani töbike kukwe nebätä. Meri bükün käkwe tibi dokwä trekaite mikata gare profeciabätä. Aune tibi ye abokän Satana gärätä nibira gare nie. Aisete Eva ngäbriänkä töi ngite kä tibienbätä ñaka raba Satana ye gainte. ¿Akwa Satana ye gaite ño?
7. ¿Meribätä blitata Génesis 3:15 yete ye Apocalipsis 12:1, 2, 5, 10 tä mike nüke gare ño nie?
7 Meribätä blitata Génesis 3:15 yete ye abokän nire ye tärä mrä Bibliabätä tä mike gare nie (ñäkädre Apocalipsis 12:1, 2, 5, 10 yebätä). Ye ñan meri kä tibienbätä erere. Sö tä meri ye ngoto täni aune korona tä dokwäbiti abokänbätä muke kwä jätäbiti kubu tä mikani. Aune meri yekwe monso ütiäte tä nemen ye abokän Gobran Ngöbökwe. Gobran Ngöbökwe ye ja üaire, aisete meri ye ja üairebätä blitata arato. Ye abokän juta Ngöbökwe ja üaire tä ükaninte kä kwinbiti aune yete nitre Jehová mikaka täte ja üaire tä yebätä blitata (Gál. 4:26).
MERI
Juta Jehovakwe kä kwinbiti, nitre üaire tä ja ngwen metre Jehovai (Párrafo 7 mikadre ñärärä)
8. ¿Meri ngäbriänkä bäri ütiäte ye abokän nire aune ñongwane namani dianinkä? (Génesis 22:15-18).
8 Meri ngäbriänkä bäri ütiäte ye abokän nire ye raba nüke gare nie Biblia ye köböire. Meri ngäbriänkä ye jatai Abrahán yekri (ñäkädre Génesis 22:15-18 yebätä). Aune profecía ye namani bare ñobätä ñan aune ni ja ngwanka metre yekri Jesús ye jatani (Luc. 3:23, 34). Akwa Satana trekadrete aune gadrete kärekäre, yekäre ñaka jerekäbe ni kä tibienbätä erere ribe nämäne. Aisete kä nämäne 30 Jesubiti ngwane dianinkä üai demebiti, ye köböire namani Ngöbö monsoi erere därebare üai demebiti ye erere. Ye ngwane niara namani meri ngäbriänkä bäri ütiäte ye kwrere (Gál. 3:16). Jesús krütani aune ganinkröta ye bitikäre, niara “mikani bäri ütiäte kri” “kä käinta se amne kä temen ne Ngöbökwe mikani gare jökrä” ie aune ‘sribi diablukwe bätäkä ngwarbe juandre ngwarbe’ ye mikani kisete arato (Heb. 2:7; Mat. 28:18; 1 Juan 3:8).
MERI NGÄBRIÄNKÄ
Jesukristo aune nitre 144,000 dianinkä käkwe gobrandi Jesube (Párrafo 8 aune 9 mikadre ñärärä)
9, 10. a) ¿Nire nire mada tä nemen meri ngäbriänkäre aune ñongwane tä nemen ngäbriänkäre? b) ¿Nikwe dre mikadi gare jai ja känenkäre?
9 Meri ngäbriänkätre mada mada yebätä blitata arato. Nitre judío aune nitre nünanka juta mada madate dianinkä üai demebiti ye ie apóstol Pablo kukwe tikani ngwane, kukwe ye mikani gare kwe. Niebare kwe: “Mun abko Kristokwe, aisete mun Abraham bküntre amne Ngöbökwe ja di biandi Abrahamye amne bkünye niebare kwe ie, ye abko mun nena bkäne siba arato” (Gál. 3:28, 29). Jehová tä ni kristiano denkä üai demebiti ngwane tä nemen meri ngäbriänkätre ye erere. Ye medenbätä Jesús aune nitre 144,000 rabadi gobrane ben, ye abokän meri ngäbriänkätre (Apoc. 14:1). Niaratre jökrä tä ja di ngwen töbike aune ja ngwen Rün kwe Jehová erere.
10 Nire nirebätä blitata Génesis 3:15 yete ye nibira gare nie. Akwa Jehovakwe dre nuainbarera ja kukwei mikakäre nemen bare aune profecía ye raba ni dimike ño kä nengwane ye nikwe mikai gare jai.
¿PROFECÍA NE TÄ NEMEN BARE ÑO JATÄRI?
11. ¿Meri ngäbriänkä nuainbare ño tare ngoto üebätä?
11 Tibi ye käkwe meri ngäbriänkätre ye nuaindi tare ngoto üebätä mikani gare Génesis 3:15 yete. Satana käkwe nitre judío aune nitre romano töi mikani Jesús murie kete ngwane, kukwe ye namani bare (Luc. 23:13, 20-24, TNM). Ni iti nuainta tare ngoto üebätä ngwane ñaka raba dikekä kä ruäre te. Ye erere arato, Jesús nämäne ngwakare köbö köbömä te ngwane di ñaka namani kukwe nuainkäre (Mat. 16:21).
12. ¿Tibi ye dokwä trekaite ño aune ñongwane?
12 Kukwe mikata gare Génesis 3:15 yete ye rabadre bare yekäre, Jesús ñan rabadre ngwakare kärekäre ñobätä ñan aune meri ngäbriänkä ye käkwe tibi dokwä trekaite mikani gare profecía yebätä. Ye medenbätä, Jesús nuainbare tare ngoto üebätä yebätä niara rabadre nementa räre. ¡Aune namaninta räre! Niara krütani ye köböi nikani köbömä ta ye bitikäre, niara ganinkröta ni üaire ñan raba krüte jire chi ye erere. Köbö kitani Jehovakwe ye köböi rükai ngwane, Satana ye trekaite aune gaite kärekäre (Heb. 2:14). Nitre rabadi gobrane Jesube ye käkwe niara dimikai tibi ngäbriänkätre ye denkä täte kärekäre kä tibienbätä (Apoc. 17:14; 20:4, 10).e
¿PROFECÍA YE TÄ NI DIMIKE ÑO KÄ NENGWANE?
13. ¿Profecía ne tä nemen bare ye tä ni dimike ño?
13 Mä ye abokän ja dianinkä mento Jehová kräke ngwane profecía ne köböire kukwe kwin niena nemen bare mä kräke. Jesús nükani kä tibienbätä ni nire erere ngwane, Rün kwe töi ño ye bämikani metre kwe (Juan 14:9). Niara ja ngwanbare ño yebiti ni dimikani kwe Jehová mike gare jai aune tarere. Niara tä dirire ño aune tä konkrekasion kristiana jie ngwen ño kä nengwane yebiti tä ni dimike arato. Ne madakäre, nikwe nünandre ño ne kwe nikwe kä mikadre juto Jehovabätä ye tä driere nie arato. Aune niara murie ketani abokän bämikata nuainbare tare ngoto üebätä ye kwrere, ye köböire kukwe kwin raba nemen bare ni jökrä kräke. Jesús ganinkröta ngwane, ja därie biani kwe jondron metre bianta kukwara ye kwrere, köböire “ngite bätete jökrä nibtä” (1 Juan 1:7).
14. Profecía niebare Jehovakwe kä Edén yete ye ñaka rabadre bare bengwairebe, ¿ye ñokänti gare nie?
14 Profecía ye ñaka rabadre bare jötrö ngwarbe ye nemen gare metre nie kukwe niebare Jehovakwe kä Edén yekänti yebiti. Meri ye ngäbriänkä rabadre aune Diablu rabadre nitre nänkä niara jiebiti ye ükekrö bätä niaratre nibu ne rabadre ja rüere aune brukwä nemen jakrä ye kräke, kä rikadre kwati ta ye ribe nämäne. ¿Kukwe ye tä nemen gare nie ye tä ni dimike ño? Tä ni mike mokre: kä gobrainta Satanakwe ye käkwe ja mikadi nitre ja ngwanka metre Jehovai ye rüere. Kä nikani kwati ta ye bitikäre, Jesukwe kukwe ye erere niebare nitre ja tötikaka kwe ie (Mar. 13:12, 13; Juan 17:14). Kä nikanina 100 ta yete profecía ne tä nemen bare ye tuin metre nie ¿Ñobätä nita kukwe ye niere?
15. a) ¿Ñobätä nitre kä tibienbätä brukwäta bäri ni kräke kä nengwane? b) ¿Ñobätä ni ñaka rabadre Satana jürä ngwen jabätä?
15 Kä 1914 yete Jesús namani Rei käbämikani erere aune ye bitikäre Satana nämene kä kwinbiti juanintari kwe. Yete ja käne Satana raba ja töi mike nemen bare kä tibien ne aibebätä aune niara gaite ye tä ngübare (Apoc. 12:9, 12). Akwa niara ñaka tä kwekebe kise miriani jabätä kukwe ye ngübare, ñakare aune tä rubun krubäte ja mike juta Ngöbökwe rüere (Apoc. 12:13, 17). Ye medenbätä, Satana aune nitre nänkä niara jiebiti ye tä ja mike bäri ni rüere kä nengwane. Akwa nikwe ñaka jürä ngwandre jabätä. Ñakare aune dre nämäne gare metre apóstol Pablo ie ye erere tädre gare nie, niarakwe tikabare: “Ngöböta ni tarere kore amne tä kukwe nuene kuin kore ni kräke, ye ngwane ni amne jändrän mda mda ñakare jire rabadre ni ganaine” (Rom. 8:31). Ni rabadre tö ngwen kwatibe Jehovai ñobätä ñan aune nibira gare nie erere profecía tä Génesis 3:15 ye Jehová niena mike nemen bare tuin metre nie yebätä.
16-18. Profecía tä Génesis 3:15 ye nüke gare Curtis, Ursula aune Jessica ie, ¿ye käkwe niaratre dimikanina ño?
16 Jehovakwe kukwe käbämikani Génesis 3:15 yete, ye tä ni dimike ja tuakäre kukwe ñokwä taretare yebe. Curtis, tä sribi misionero nuainne Guam, tä niere: “Ruäre ngwane tita ja ngwen metre Jehovai ye nuateta kukwe tare tä nemen bare tibätä aune kukweta ti mike ulire yebätä. Akwa tita töbiketari profecía tä Génesis 3:15 yete yebätä, ye tä ti dimike tö ngwen bäri ti Rün kä kwinbiti ie”. Köbö te Jehovakwe kukwe taretare ye diainkä jökrä ye Curtis tä ngübare ngäbiti kisere.
17 Kukwe nieta Génesis 3:15 yete, ye köböire Biblia ye abokän kukwe Ngöbökwe ye nükani gare meri testiko kädekata Ursula nünanka Baviera (Alemania) yete ie mikata gare. Profecía mada mada tä Bibliabätä ye tä blite kukwe nieta Génesis 3:15 yete ye ererebätä nükani gare Ursula ie ye tä niara töi mike niä arato. Niara tä niere: “Jehovakwe ñaka kä tuanimetre niken raire ta tödekara biankäre nie ye käkwe ti töi mikani niä”.
18 Jessica, nünanka Micronesia, tä niere: “Kukwe metre rababa gare tie ye ngwane ja rababa ruin ño tie ye täbe törö tie. ¡Kukwe nieta Génesis 3:15 ye nämä nemen bare! Profecía ye nüke gare tie ye köböire ni ñaka tä nüne kwin dikaro ye nüke gare metre tie. Aune nita sribire Jehová kräke ye köböire nita nüne kwin kä nengwane aune ni raba nüne kwin ja känenkäre ye tä nemen bäri era ti kräke”.
19. Kukwe mikata gare mräkäre profecía yebätä ye rabadi bare metre, ¿ye ñokänti gare metre nie?
19 Kukwe nieta Génesis 3:15 ye niena nemen bare ye nibira gare nie. Meri ngäbriänkä aune tibi ngäbriänkä ye abokän nire nire nibi gare nie. Meri ngäbriänkä bäri ütiäte abokän Jesús nuainbare tare ngoto üebätä yebätä namaninta räre aune nengwane tä Reire ñaka raba krüte aune mikani ütiäte krubäte. Ne madakäre, meri ngäbriänkä mada mada ye ükakrö köböra täte jökrä. Kukwe kena mikata gare profecía yebätä ye namanina bare. Aisete: ¡mräkäre tibi dokwä trekaite rabai bare ye tä gare metre nie! Satana gaite ye köböire nitre ja ngwanka metre Jehovai ye rabadi nüne jäme. Akwa nikwe ñaka ja di ngwandre nekä kä nengwane, ñakare aune ni rabadre tö ngwen kwatibe Jehovai. Meri ngäbriänkä ye köböire, kukwe keta kabre kwinkwin Jehovakwe nuaindi nitre kä tibienbätä ye jökrä kräke (Gén. 22:18).
KANTIKO 23 Gobran Jehovakwe ye niena gobrane
a Profecía tä Génesis 3:15 yebätä nikwe ja tötikai kwin ngwane kukwe meden nieta Bibliabätä ye rükai gare bäri kwin nie. Nikwe ja tötikai kwin profecía nebätä ngwane, ni rabai tö ngwen bäri Jehovai aune kukwe käbämikata kwe ye mikai nemen bare kwe ye ie ni täi tö ngwen kwatibe.
b Génesis 3:15, (JK): “Mdakäre abko, ma btä ni merire rabadi ja rüere kwärikwäri. Ne kwrere arato, ma ngäbäli näin ngetre mda mda, ye rabadi ja rüere meri bkünbe. Ne aisete ma gätädi meri bkünbe angwane, ma metadi dokwäte kwetre. Ma abko käkwe kwetadi ngoto üebtä, niebare Dänkin Ngöbökwe tibiye”.
c Kukwe kädekata “Kukwe mikata gare Bibliakwe” tä Tärä ni jie ngwankäre ja tötike Kukwe Ngöbökwe yebätä ye mikadre ñärärä.
d Recuadro “Nirebätä blitata Génesis 3:14, 15 yebätä” ye mikadre ñärärä.
e Recuadro “Kukwe ütiäte tä Génesis 3:15 yebätä ye namanina bare ño” mikadre ñärärä.