KUKWE JA TÖTIKARA 50
“Mä täi tibe kä bä nuäre yete”
“Erametre tita niere matare mäi: Mä täi tibe Kä Bä Nuäre yete” (LUC. 23:43, TNM).
KANTIKO 145 Ngöbökwe kä bä nuäre käbämikani
KUKWE NEBÄTÄ JA TÖTIKAIa
1. ¿Ni iti töi käme nämäne Jesús ken krütadre känenkri ye ie Jesukwe dre niebare? (Lucas 23:39- 43).
JESÚS aune nitre töi käme nibu ye jatanina krüte (Luc. 23:32, 33, TNM). Nitre nibu ye nämäne ñäke tare Jesús ie, aisete nitre ye ñaka ja tötikaka Jesukwe (Mat. 27:44; Mar. 15:32, TNM). Akwa iti käkwe ja töi kwitani. Niebare kwe: “Mä raba gobran mäkwe yete ngwane, mäkwe ti ngwan törö jai”. Aune Jesukwe niebare ie “Erametre tita niere matare mäi: mä täi tibe kä bä nuäre yete” (ñäkädre Lucas 23:39-43 yebätä).b Gobran Ngöbökwe jatanina nüke ja ken ye ni iti töi käme nämäne mike era jai ye kukwe keteiti ñan mike gare. Aune ni ye rabai gobran Ngöbökwe yete ye Jesukwe ñan niebare ie jire (Mat. 4:17). Kä bä nuäre rabai kä tibienbätä kä ja känenkäre yete yebätä Jesús nämäne blite. ¿Ñokänti gare nie?
¿Ni töi käme ben blitabare Jesukwe ye abokän nire aune dre nämäne gare ie yebätä ni raba dre niere? (Párrafo 2 aune 3 mikadre ñärärä)
2. ¿Ni töi käme ja töi kwitani ye judío ye ñobätä ni raba niere?
2 Ni töi käme käkwe ja töi kwitani ye judío raba ruin nie. Ñobätä ñan aune kukwe ne ngwanintari kwe ni iti töi käme ie: “¿Dre nunibätä erere nuni mäbätä, se ño amarebiti Ngöbö jürä ñan mäbätä?”. (Luc. 23:40, TNM). Nitre judío nämäne Ngöbö itibe mike täte, akwa nitre juta madate nämäne ngöbö kwati mike täte (Éx. 20:2, 3: 1 Cor. 8:5,6). Nitre töi käme ye ñan judío akräke kukwe ne ngwandretari kwe: “¿Se ñobätä amarebiti mä ñan ngöbö kwati jürä ngwen jabätä?”. Ne madakäre, “juta israelita nämäne nianinte oveja kwrere” ye aibe kräke Ngöbökwe Jesús juani die mike, yebätä nitre nünanka juta madate ye ie ñan kukwe driere mertrere (Mat. 15:24). Ngöbökwe nitre krütanina ye gaikröta Ngöbökwe mikani gare nitre Israelita ie. Kukwe ye nämäne gare ni töi käme käkwe ja töi kwitani ye ie raba ruin nie, Jehovakwe Jesús gaikröta Gobrankäre Gobran Ngöbökwe yete ye nämäne gare metre ie, nemen gare nie kukwe niebare kwe yebiti. Aune Ngöbö raba niara gainkröta nämäne gare ni ye ie raba ruin nie.
3. ¿Jesukwe blitabare kä bä nuäre yebätä ngwane, ni iti töi käme yekwe töbikabare drebätä raba ruin nie? (Génesis 2:15).
3 Ni iti töi käme ja töi kwitani ye abokän judío akräke, kä bä nuäre känti Jehovakwe Adán aune Eva mikani ye nämäne gare ie. Aisete kä bä nuäre bätä Jesukwe blitabare ye abokän kä tibienbätä nämäne ruin ni ye ie raba ruin nie (ñäkädre Génesis 2:15 yebätä).c
4. ¿Ni töi käme ie Jesukwe kukwe niebare ye käkwe ni töi mikadre drebätä?
4 Ni töi käme ie Jesukwe kukwe niebare ye rabadre ni töi mike nünain ño kä bä nuäre yete yebätä. Salomonkwe gobranbare ngwane nünanbare jäme ye nikwe ngwandre törö jai ye raba ni dimike kukwe ye nuainne. Jesús ye abokän bäri ütiäte kri Salomón kräke mikata gare Bibliabätä. Aisete Jesús aune nitre käkwe gobrain ben ye käkwe kä tibien kwitai bä nuäre tädre gare metre nie (Mat. 12:42). Dre nuaindre nünankäre kä bä nuäre yete ye “oveja mada mada” ja töi mikadre nuaindre (Juan 10:16).
¿KÄ BÄ NUÄRE YETE NÜNAIN ÑO?
5. ¿Nünain kä bä nuäre te ye mäta bämike ño ja okwäte?
5 ¿Kä bä nuäre yete nünain ño ye mäta bämike ja okwäte? Kä bä nuäre nämäne Edén yete, ye erere mäta bämike ja okwäte raba ruin nunye (Gén. 2:7-9). O nitre Jehová mikaka täte “rabai täkäni vid bätä higuera kwe ye täni” mikata gare Bibliabätä ye nüke törö mäi raba ruin nunye (Miq. 4:3,4). Mrö rabai erere ye bersikulo Bibliabätä tä mike gare ye nüke mä töite raba ruin nunye (Sal. 72:16; Is. 65:21, 22). Aisete kä bä nuäre aune mesabiti mrö ere bänänte tä ye mäta bämike ja okwäte. ¿Kriblü aune kri mu ye mäta räse? ¿Mä mräkätre aune ja ketamuko mäkwe tä kötö aune kä ngwen juto jabätä gwairebe ye kukwe ruin mäi? Niaratre ruäre ye ganinkröta raba ruin nunye. Kukwe ye ñaka ngwarbe kukwe ye kwrere rabai bare kä tibienbätä. Akwa sribi kwin täi nuaindre kä tibienbätä arato.
Nitre gaikröta tötikadre ye sribi ütiäte rabai nikwe (Párrafo 6 mikadre ñärärä)
6. ¿Kä bä nuäre yete nikwe dre nuaindi? (Üai mikadre ñärärä).
6 Jehovakwe ni sribebare sribi käi ngwankäre juto jabätä (Ecl. 2:24). Jesukwe gobrain mil krati ngwane, sribi rabai nuaindre ere. Nitre rabaite kwäre aune nitre kwati gaikröta yekwe dän aune ju ribedi jai nünankäre. Dre dre ribeta jai ye rabadre nikwe yekäre ja di ngwandre krubäte. Akwa sribi ye käi rabai juto nibätä. Adán aune Eva käkwe kä bä nuäre Edén ngibiabare, ye erere arato nikwe sribidi kä tibien kwitakäre bä nuäre. Nitre kwati gaikröta ie Jehová aune töita dre nuainbätä ye ñan namani krubäte ye nikwe tötikai, yekwe kämikai juto nibätä ye bämike ja okwäte. Ne madakäre, nitre kwati krubäte krütani Jesús rükadre kä tibienbätä känenkri ie kukwe ñan gare, ye ie kukwe rabai mikadre gare nie.
7. ¿Dre tädre gare metre nie aune ñobätä?
7 Kä bä nuäre yete nünandi jäme aune dre dre ribedi jai ye täi nikwe aune kukwe täi ükaninte kwin. ¿Ñobätä? Ñobätä ñan aune Salomonkwe gobranbare ño yebiti, Jehovata ni dimike Jesús rabai gobrane ngwane, gobrandi ño kwe ye mike nüke gare jai.
SALOMÓN GOBRANBARE YEBITI NÜNANDI ÑO KÄ BÄ NUÄRE YETE YE BÄMIKANI
8. ¿Kukwe nieta Salmo 37:10, 11, 29 ye namani bare ño kirabe? (Sección “Nitre tä kukwe ngwentari” tä täräkwata nebätä ye mikadre ñärärä).
8 Gobran töbätä aune ja ngwanka metre yekwe gobrain ye ngwane nünain ño ye Jehovakwe tika mananbare üai deme köböire David ie (ñäkädre Salmo 37:10, 11, 29 yebätä).d Kä bä nuäre yebätä nita blite nitre ben ngwane Salmo 37:10, 11 yebätä nita ñäke bä kabre ietre. Nikwe nuaindre ye kwin, ñobätä ñan aune kukwe yebätä Jesukwe blitabare ngüdrebiti. Kukwe ye rabai bare ja känenkäre bämikani kwe (Mat. 5:5). Akwa kukwe tikaba kwe ye namani bare Salomón näire arato. Kä ye näire, nitrekwe nünanbare jäme aune nämänentre dre ribere jai ye nämäne kwetre. Ñobätä ñan aune “leche aune munköi” nämäne ere käbiti tibien Ngöbökwe niebare ietre: “Kukwe ükaninte tikwe ye ererebätä mun täi näin jankunu aune tikwe kä jäme biain juta ie aune munkwe jadukai tibien aune ni ñaka jire iti käkwe kä jurä ngwain munbätä” (Lev. 20:24; 26:3, 6). Salomón gobranbare ngwane kukwe käbämikani ye namani bare (1 Crón. 22:9; 29:26-28). Aune nitre käme ye Jehovakwe gaite käbämikani ietre (Sal. 37:10). Kukwe nieta Salmo 37:10, 11 ye namani bare mekera aune rabai bare ja känenkäre.
9. ¿Salomón nämäne gobrane yebätä reina nünanka saba käkwe dre niebare?
9 Nitre israelita nämäne nüne jäme aune nämäne dre ribere jai ye nämäne kwetre Salomón nämäne gobraine ye näire ye namani gare reina nünanka Saba ie. Kukwe ye tuakäre ja okwä jeñebiti dikakabare mente kwe rabakäre Jerusalén (1 Rey. 10:1). Salomón nämäne gobrane ño ye namani gare ie ye bitikäre, niebare kwe Salomón ie: “Kukwe ñan niebarera täte mäbätä tie. ¡Nitre mäkwe yebätä kä juto krubäte, mä töbätä krubäte aune nitre sribikä mäkwe tä mantre jetebe mä ken mä kukwe nuin nitre yebätä kä juto krubäte!” (1 Rey. 10:6-8). Akwa Jesukwe nitre kä tibienbätä gobrain ngwane nünain ño ye bämikani, nünanbare ño Salomón näire yebiti.
10. ¿Ñobätä Jesús ye abokän bäri ütiäte Salomón kräke?
10 Jesús ye abokän bäri kri Salomón kräke kukwe jökräbätä, Salomón ye töi ngite aune ja mikani ngite krubäte kwe köböite ja känenkäre juta Israel ja tare nikabare. Akwa Jesús, ye abokän gobran töi metre aune kukwe ñaka nainte jire ie (Luc. 1:32; Heb. 4:14, 15). Ne madakäre, Satanakwe Kristo nuaninte akwa Kristokwe ganainbare. Kristo ye ñaka ja mike ngite aune ñaka kukwe nuainne nitre nünanka Gobran Ngöbökwe yete mikakäre ja tare nike ye bämikanina kwe. ¿Jesús ye rabadre Rei nikwe ie ni tö ñan ererea?
11. ¿Nire nire käkwe Jesús dimikai?
11 Nitre 144.000 ye käkwe Jesús dimikai aune gwairebe nitre kä tibienbätä ngübadi kwe aune Jehová töita ño kä tibien kräke ye mikai nemen bare kwe (Apoc. 14:1-3). Gobrantre ne käkwe ja tuadi kukwe keta kabre tare ben nitre merire aune brare kä tibienbätä ye erere. Ye medenbätä ni töi ño ye mikai nüke gare kwe jai. Akwa niaratre yekwe dre nuaindi metrere.
¿NITRE DIANINKÄ NÄNKÄRE KÄ KWINBITI YEKWE SRIBI MEDEN NUAINDI?
12. ¿Jehovakwe sribi meden biandi nitre 144,000 ye ie?
12 Jesús aune nitre 144,000 ye ie sribi rabai nuaindre bäri Salomón kräke. Rei israelita ne nämäne nitre millón braibe ye gobraine kä keteitibe känti. Akwa nitre rabai gobrane Gobran Ngöbökwe yete ngwane, rabai nitre millón kwati yebiti gobrane kä jökräbiti tibien. ¡Sribi ütiäte Jehovakwe biain nitre 144,000 ie!
13. ¿Nitrekwe gobrandi Kristobe yekwe sribi meden ütiäte nuaindi?
13 Jesús erere, nitre 144,000 ye rabai reire aune sacerdotere (Apoc. 5:10). Kukwe biani Moisés ie näire metrere nitre sacerdote nämäne juta Israel ye ngibiare ja ngrabarebiti aune ja üairebiti. “Jondron bäri kwin jatadre”, ye bämikani kukwe biani Moisés ie yebiti, aisete nitrekwe gobrandi Kristobe yekwe sribi ütiäte nuaindi: juta Ngöbökwe ngibiadi ja ngrabarebiti aune ja üairebiti (Heb.10:1). Bäkänä, nitre rei aune sacerdote ye käkwe kukwe mikai gare ño nitre nünanka gobran Ngöbökwe yete ie ñan gare nie. Kukwe ükaite ño Jehovakwe ñan gare nie, akwa nitrekwe nünain kä tibienbätä yekwe kukwe täi ja jie ngwankäre ye tädre gare metre nie (Apoc. 21:3, 4).
¿OVEJA MADA KÄKWE DRE NUAINDRE NÜNANKRÄ KÄ BÄ NUÄRE YETE?
14. ¿“Oveja mada mada” aune oveja braibe ye tä sribire ño?
14 Nitrekwe gobrandi Kristobe ye Kristokwe kädekani “oveja braibe” (Luc. 12:32). Jesukwe blitabare grupo madabätä arato ye abokän “oveja mada mada”. Grupo ketebu ne rabai ki keteitibe te kwrere (Juan 10:16). Niaretre niena sribire keteitibe aune kä tibien kwitai bä nuäre ngwane, sribidi keteitibe jankunu kwetre. Kä ye ngwane, “oveja braibe” ye täi kä kwinbiti aune “oveja mada mada” yekwe tö ngwain nünankäre kärekäre kä tibienbätä. Akwa nünankäre kärekäre kä tibienbätä “oveja mada mada” rabadre kukwe ruäre nuainne.
Ni tö nünain kä bä nuäre yete ye nikwe bämikadre gwä ngwane (Párrafo 15 mikadre ñärärä)e
15. a) ¿Oveja mada ye tä Kristo etebatre dimike ño? b) Ja mräkä tä bämikani üaibätä tä kukwe bämike erere, ¿mä raba nuainne ño?
15 Jesukwe kukwe nuainbare ni töi käme kräke yebätä ni töi käme nämäne debe bien bämikakäre kä ñan namani ie. Akwa ni “oveja mada mada” ie kukwe tärä keta kabre debe bämikakäre. Ñodre, nita ja töi mike ño Kristo etebantre kräke yebiti Jesús tare nikwe nita bämike. Kukwe ye köboire nire abokän oveja rabai gare niebare Jesukwe (Mat. 25:31-40). Kukwe keteitibiti ni raba Kristo etebantre dimike ye abokän nikwe kukwe driedre kä jutobiti aune nitre mikadre ja tötikaka (Mat. 28:18-20). Ye medenbätä, Kristo etebatre tä jondron keta kabre bien nie kukwe driekäre yebiti ni tö sribidi, ñodre tärä Mä raba nüne kä jutobiti yebiti. Mä jämi ni iti tötike Bibliabätä ngwane, ¿ñobätä mä ñan töi mike ja tötika Bibliabätä driere nitre jökrä ie?
16. ¿Nikwe nünandre Gobran Ngöbökwe yete yekäre nikwe dre nuaindre?
16 Ni rabadre kä bä nuäre yete batibe Jehová tö ni ño tuai nüne yete ye erere, nikwe ja töi mikadre nuainne ye nikwe ñan ngibiadre, ñakare aune nikwe ja di ngwandre gwä ngwane kukwe nieta nikwe aune kukwe nuainta nikwe yebiti, ja ngwen metre aune ja töi mike nüne jondron braibebiti. Nikwe ja ngwandre metre Jehovai, ni muko aune ja mräkätre ie. Kä blo te nita nüne gwä ngwane, akwa yebiti ta nikwe ja di ngwain kukwe ükaninte Jehovakwe mikakäre täte ngwane, rabai bäri nuäre ni kräke nuainkäre kä bä nuäre yete. Ne madakäre nikwe ja töi mikadre ja kite kukwe ruäre nuainkäre kwin aune ja töi mikadre kwin keta kabre nita ja ükete nünankäre kä bä nuäre yete bämikakäre. Tä niebare recuadro “¿Kä tibien rabadre mäkwe’ yekäre mäta juto biare?” tä täräkwata nebätä erere.
17. ¿Ñobätä nikwe ñan töbikadre krubäte nikwe ja mikani ngite mekera yebätä?
17 Nikwe ja ñan ja töi mikadre dikaro ja mikani ngite mekera yebätä. Erametre, ni ñan tö “ja mikai ngite nierare” ni kökanintari yebätä (Heb. 10:26-31). Akwa nikwe ja mikani ngite krubäte yebätä nikwe ja töi kwitani bökän, Jehová aune nitre umbre ji ngwanka ye nikwe känänbare ja dimikakäre aune ni nämäne ja ngwen ño ye erere ni ñan niena nuainne ngwane, töi bökänbiti Jehovakwe ngite juani ta nibiti tädre gare metre nie (Is. 55:7; Hech. 3:19). Jesukwe kukwe meden niebare nitre fariseo ie ye nikwe ngwandre törö jai: “Ti ñan jatani ni käin käräkäre akwa ti jatani ni käme käräkäre” (Mat. 9:13, NGT). Aisete ni kökanintari köböite ngite juan raba ta nibiti.
MÄ RABA NÜNE KÄREKÄRE KÄ BÄ NUÄRE YETE
18. ¿Ni käme murie ketani Jesús ken yebe mä törba blitai drebätä?
18 Ni töi käme ben blitabare Jesukwe yebe mäta blite kä bä nuäre yete ye bämike ja okwäte. Ni kökanintari yebätä munta debe bien krubäte ye munta niere jai kwärikwäri raba ruin nunye. Jesús murie keta jatanina ngwane, dre namani bare aune kukwe ribebare kwe Jesús ie ye käre Jesukwe ñäkäbare ngwane, ja namani ruin ño ie ye mikadre gare kwe mäi mäkwe ribedre ie raba ruin nunye. Ne madakäre, nünanbare ño kä krüte näire ye niarakwe ngwaintari mäi raba ruin nunye. ¡Ni ye kwrere ie kukwe Bibliabätä mikadre gare ye sribi bäri ütiäte! (Efes. 4:22-24).
Ja mräkä iti tö nämäne jondron keteiti nuainbätä krubäte ye tä nuainne kä mil krati yete aune ta kai ngwen juto jabata yete (párrafo 19 mikadre ñärärä)
19. ¿Ñobätä ni ñan rabai nainte kä bä nuäre yete? (Üai kena täräkwatabätä mikadre ñärärä).
19 Kä bä nuäre yete ni ñan rabai nainte jire. Nitre ni tö mikai gare jai, ye täi kä bä nuäre yete aune sribi kwin ye täi arato. Aune bäri ütiäte nikwe kukwe mikai gare jankunu jai ni rün kä kwinbiti yebätä aune regalo biani kwe nie ye nikwe käi ngwain juto jabätä. Kukwe mrä Jehovabätä aune jondron sribebare kwe yebätä ye rabai gare jankunu nie. Ni jatai Ngöbö nikwe ye tarere bäri. Jehová aune Jesús tä ja nire kärekäre käbämike nie kä bä nuäre yete, ¡yebätä nita debe bien krubäte!
KANTIKO 22 ¡Gobran Ngöbökwe jatadre!
a ¿Nünain ño kä bä nuäre yete yebätä mä töta nemen tobikai? Nuaindre ye kwin krubäte. Jehovata kukwe käbämike yebätä töbikata bäri ngwane, bäri ni töita nemen blitabätä kä bä nuäre yebätä ni madabe. Kukwe ja tötikara ne tödeka nikwe mikai dite kukwe käbämikani Jesukwe ye ie.
b Lucas 23:39-43, (TNM): “Yebätä ni iti töi käme nämene jäkäni ken kwin ye namani ñäke nierare ie. Namani niere ie: ‘Ma abokän Kristo, ¿ñaña? ¡Ja mike kwäre aune nun mike kwäre arato!’. Kukwe ye juruabare iti ie ngwane, ñäkäbare kwe ie: ‘Dre nunibätä erere nuni mäbätä, se ño amarebiti Ngöbö jürä ñan mäbätä? Kukwe metre erere nuainta nibätä, ñobätä ñan aune nikwe dre nuainbare yebätä kukwe nuainta nibätä; akwa ni ne ñan kukwe käme nuainne jire’. Yebätä niebare kwe: ‘Jesús, mä raba gobran mäkwe yete ngwane, mäkwe ti ngwan törö jai’. Aune niarakwe ñäkäbare käre: ‘Ti niere metre mäi matare: mä täi tibe Kä Bä Nuäre yete’”.
c Génesis 2:15, (JK): “Dänkin Ngöbökwe ni dätebare mikani nüne Eden kwe, ye abko käkwe sribidre, käkwe kä ngibiadrebti abkokäre mikani Eden kwe”.
d Salmo 37:10, 11, 29: “Kä nebera braibe aune nitre käme ye ñaka rabaira; niaratre nämäne yekänti mäkwe nikrai aune ñaka tädi yete. Akwa nitre töi jäme yekwe kä tibien rabai aune kä jäme krubäte ye kä ngwain juto kwetre jabätä. Nitre kukwe metre nuainkä yekwe kä tibien rabai aune nünain kärekäre te kwetre”.
e KUKWE MIKATA GARE ÜAIBÄTÄ: Ja mräkä iti käkwe ni gaikröta ye tötikai ie tä tö ngwen ye nibira blite ni madabe.