“Mä ngwai rükadita nire”

1. ¿Monso chi tä tödeke nitre gaikröta ye ie ye mikani gare ño kwe?

MONSO bati kädekata Matthewbätä bren tare krubäte tä ye medenbätä operabarera bä kabre. Kä nämäne 7 biti ngwane, kukwe bä nuäre namani bare. Niara aune mräkätre kwe nämäne JW Broadcasting^® ye tuin. Video musikabe jatani krute ye ngwane nitre tä mräkätre ganinkröta kain ngäbiti kä jutobiti ye mikani tuare.b Video musikabe ye krütani ngwane, nikani meye aune rün känti kani kisebiti kwe biti niebare kwe ie: “Manchi aune tata, ti krütai ye ngwane ¿ti rükaita nire ye jutuani mäi? Mun raba ti ngübare ye rabadi bare kwin krubäte”. Monso chi nekwe tödeka nämäne dite ye jutuabare nitre rüne ie ngwane, ja namani ruin ño ietre bämike ja töite. Nitre krutani gaikröta ye tuin metre Matthew ie.

2, 3. ¿Nitre gaikröta käbämikata yebätä nikwe töbikadretari ye ñobätä kwin?

² Nitre gaikröta ie tö ngwanta yebätä nikwe kä diandrekä jai töbikatarikäre (Juan 5:28, 29,TNM). ¿Ñobätä? Ñobätä ñan aune dre rabai bare jetebe nibätä ye ñan gare nie. Ni raba nemen bren krubäte o ni mräkä tare nikwe raba krüte nikän ni ñaka ngübare ye erere (Ecl. 9:11; Sant. 4:13, 14). Nitre gaikröta ie nita tö ngwen ye käkwe ni dimikai ja tuin kukwe ne kwrere ben (1 Tes. 4:13). Ni Rün kä kwinbiti ie ni gare kwin aune ni tare kwe ye tä mike gare metre Bibliabätä (Luc. 12:7). Ni tädre gare kwin Jehovai ne kwe ni nämäne ja ngwen ño aune dre nämäne ni töite ye mikadreta kwe ni töite ni gadrekrö kwe ye ngwane. Aune ni tare krubäte kwe ye medenbätä tä kä bien nie ne kwe nikwe nünandre kärekäre. Nita krüte ye ngwane ni gaikröta kwe tä käbämike.

³ Nitre krütanina gaikröta käbämikata ye ie ñobätä ni raba tö ngwen ye rabai gare nie kukwe ja tötikara nekänti. Arato texto kukwe ja tötikara nekänti nieta: “Mä ngwai rükadita nire” ye käkwe tödeka nikwe mikai bäri dite (Juan 11:23). Mrä mada, nitre krütani gaikröta ye rabadre tuin bäri metre nie yekäre ni raba dre nuainne ye rabai gare nie arato.

¿NITRE GAIKRÖTA KÄBÄMIKATA YE IE ÑOBÄTÄ NI RABA TÖ NGWEN?

4. ¿Tö ngwankäre kukwe käbämikata yei dre tädre gare metre nie? Bämike keteiti.

⁴ Kukwe käbämikata ye ie nikwe tö ngwandre yekäre ni iti ye töita nuainbätä aune die tärä nuainkäre ye tädre gare nie. Ani bämike, murie dite yebätä ju nikwe gidiandrete akwa ja ketamuko iti nikwe käkwe niedre nie: “Tikwe mä dimikai ju ye üketeta”. Gare nie niara tä blite metre aune töita ni dimikabätä. Niara ye ie ju sribe gare aune jondron tärä ie ju ye sribekäre, ye medenbätä niara raba nuainne gare metre nie, yebätä tä kukwe niere ye ie nita tö ngwen. Aune ¿ni raba dre niere nitre gaikröta käbämikata yebätä? ¿Erametre Ngöbö töita nuainbätä aune die tärä nuainkäre?

5, 6. ¿Jehová tö nitre krütanina gakröbätä ye ñokänti gare metre nie?

⁵ ¿Jehová tö nitre krütanina ye gaikröta? Jän niara tö nuaindi. Nitre ruäre Biblia tikaka ye töi mikani kwe kukwe käbämikata kwe ye tike Bibliabätä (Is. 26:19; Os. 13:14; Apoc. 20:11-13). Jehovata kukwe käbämike ye ngwane, tä mike nemen bare (Jos. 23:14). Jehová töita nitre krütanina ye gakröbätä. ¿Ñobätä nita niere?

⁶ Kukwe niebare Jobkwe yebätä ani töbike. Niara krütadre ngwane, Jehová töi rabai gakröbätä ye nämäne gare metre ie (Job 14:14, 15, nota). Ye erere kä nengwane nitre Jehová mikaka täte krütani ye niara töita gakröbätä, tädre kwin aune kä tädre jutobätä ie niara tö. Aune nitre ie Jehová ñaka namani gare krütani, ¿yebätä töita ño? Ni Rün ni tarekä tö niaratre tuaita nire arato (Hech. 24:15). Nitre ye rabadre ja ketamuko kwe aune nünandre kwe kärekäre kä tibienbätä ie niara tö (Juan 3:16, TNM). Jehová töita nitre krütanina gakröbätä nibira gare metre nie.

7, 8. ¿Jehová die tärä nitre krütanina ye mikakäreta nire ye ñobätä gare metre nie?

⁷ ¿Jehová die tärä nitre krütanina ye mikakäreta nire? Jän, ye gare metre nie. Niara ye “di kri” (Apoc. 1:8). Niara raba rüe jökrä ye ganaine aune gata arato (1 Cor. 15:26). Kukwe ne tä ni mike dite aune tä ni töi mike jäme. Kukwe namani bare meri testiko Emma Arnoldbätä ye ani mike gare jai. Niara aune mräkätre kwe yebätä kukwe tare namani bare Rü Kri namani bare bobukäre ye ngwane. Campos de concentración nazis yekänti mräkätre tare kwe krütani kän, ngängän kwe töi mikakäre jäme kukwe ne niebare kwe ie: “Ni tädre krüte aune ni gakröta ñaka raba jire ngwane, ye tädre bämike gata ye bäri dite Ngöbö kräke ¿ñan ererea?”. Jondron mada ñaka jire bäri dite Jehová kräke. Niarakwe ja nire biani nie yebätä niara die tärä ja nire biankäreta nitre krütanina yei.

⁸ Jehovabiti kä ñaka nikwitekä jire yebätä raba nitre krütanina ye gaikröta ye gare metre nie arato. Muke jökrä ye niarata kädeke kä kwe yebiti mikata gare Bibliakwe (Is. 40:26). Nitre krütanina ye jökrä törö Jehovai (Job 14:13; Luc. 20:37, 38). Nitre gaikröta kwe ye ngwane kukwe kiakia bätä, ñodre bä ño, nämäne ja ngwen ño aune nünanbare ño ye täi törö jökrä ie.

9. ¿Nitre krütanina gaikröta käbämikata ye ñobätä era mä kräke?

⁹ Nibira gare nie erere, nitre gaikröta käbämikata Jehovakwe nie ye ie ni raba tö ngwen, ñobätä ñan aune niara töita nuainbätä aune die tärä nuainkäre. Ñodre, kukwe madabätä niara raba nitre krütanina gainkröta ye abokän kirabe nitre krütani mikaninta nire kwe. Aune kirabe nitre ruäre ie Jehovakwe ja di biani nitre krütanina ye gakrökäre aune Jesui arato mikata gare Bibliabätä. Ni iti ganinkröta Jesukwe bätä blitata ye ani mike gare jai. Raba kwen Juan kapitulo 11 yekänti nie.

JA KETAMUKO KWIN JESUKWE TÄ KRÜTE

10. Jesús tä kukwe driere juta Betania bäre mento ye ngwane, ¿dreta nemen bare aune niarata dre nuainne? (Juan 11:1-3).

¹⁰ (Ñäkädre Juan 11:1-3 yebätä). Ja ketamuko Jesukwe ruäre tä nüne Betania ye abokän: Lázaro aune ngwaitre kwe, María aune Marta (Luc. 10:38-42). Kä 32 jatanina krute ye ngwane, Lázaro tä nemen bren dikaro. Ngwaitre kwe tä nemen töibikaire krubäte. Jesús tä Jordán kwäräkri, ye kräke tä kukwe juen, nändre köböbu jire rabakäre Jesús känti (Juan 10:40). Akwa, kukwe mika jämi gare Jesús ie ngwane Lázaro tä krüte. Jesús ie Lázaro krütani ye namanina gare akwa ñan tä niken jötrö Betania, tä nemen köböbu mada yete. Ye medenbätä tä nüke ye ngwane, kä tärä niken köböbokä ta Lázaro tä krüte ye ngwane. Jesukwe kukwe ye nuainbare, ñan ñobätä aune tö namani kukwe kwin tuai nemen bare ja ketamuko kwe ye kräketre aune Ngöbö käikitadrekä kwetre yekäre (Juan 11:4, 6, 11, 17).

11. ¿Kukwe namani bare ne tä dre driere nie ja ketamuko yebätä?

¹¹ ¿Kukwe namani bare ne tä dre driere nie nita ja kete ni madabe yebätä? María aune Marta käkwe kukwe juani Jesús ie ngwane, Jesús rikadre Betania ye ñan niebare kwe ie. Ñakare aune ja ketamuko kwe ye nämäne bren krubäte nie mananbare kwe (Juan 11:3). Lázaro krütani ngwane, Jesús raba miketa nire nämäne mente yebiti ta. Akwa nikaninta Betania ja ketamuko kwe María aune Marta ye mukore. ¿Ja ketamuko iti tärä mäkwe abokän tä mä dimike mä ñan tä ribere ie ye ngwane? Ye erere ngwane, kukwe tare tä nakainkä mäbätä ngwane, täi juto mä dimikakäre ye gare mäi (Prov. 17:17). Nikwe ja ngwain Jesús ye erere ngwane, ni rabai ja ketamuko kwin ye kwrere. Kukwe namani bare yebätä ani töbiketa, ye bitikäre dre nakaninkä ye ani mike gare jai.

12. ¿Jesukwe dre käbämikani Marta ie aune ñobätä Marta raba tö ngwen kukwe yei? (Juan 11:23-26).

¹² (Ñäkädre Juan 11:23, 24, 26; 11:25, [NGT] yebätä).c Jesús tärä kiteta nüketa Betania tä nemen gare Marta ie ngwane, bengwairebe tä niken ngäbiti. Aune tä niere ie: “Ti Dänkien, ma tädre nete akräke ti ngwai ñan krütadre tikän” (Juan 11:21). Erametre Jesús ye raba Lázaro ye miketa räre akwa ñan tä nuainne, ñobätä ñan aune niara töita kukwe ñan tuabare nuainbätä. Jesús tä kukwe ne käbämike Marta ie: “Ma ngwai rükadita nire”. Ne madakäre, kukwe niebare kwe Marta ie ne käkwe tödeka kwe mikani dite ye abokän niebare kwe: “Ti abko ni krütanina mikakata nire”. Ngöbö ja die biani Jesús ie niara mikakäreta nire. Ye känenkri, Jesukwe monso chi merire ganinkröta aune monso brare krütani ye mikaninta nire kwe köbö te krutani ye arabe ngwane (Luc. 7:11-15; 8:49-55). Akwa, ¿ni iti krütanina kä köböbokära aune namanina ngütiete ye raba gainkröta ya?

“¡LÁZARO, JAKWETA KÜNKEN!”

13. Juan 11:32-35 tä mike gare erere María aune nitre mada tä muen tä tuin Jesús ie ngwane, ¿jata nemen ruin ño ie? (Üai mikadre ñärärä).

¹³ (Ñäkädre Juan 11:32-35 yebätä). Ani bämike ja töite. Marta kukwe nini Jesús ie ye erere Lázaro ngwai mada, María käkwe nini: “Ti Dänkien, ma tädre nete akräke ti ngwai ñan krütadre tikän”. Niara aune mräkätre kwe tä ulire krubäte . Niaratre tä muen krubäte ye Jesús tä kukwe nuin ngwane, tä nemen ulire arato. Ja ketamukotre kwe tä nemen tuin bobre ie, tä ulire yebätä ye tä niara brukwä ötöte. Ni mräkä tare nikwe tä krüte nikän ye ño gare Jesús ie yebätä ñan tö ja ketamuko kwe ye tuai ja tare nike ye medenbätä töta kukwe ye ükatebätä.

14. ¿María nämäne muen ye ngwane Jesús ie namani tuin bobre ye tä dre mike gare nie Jehovabätä?

¹⁴ María nämäne muen ngwane, Jesús muabare yebiti Jehovata ni mike tuin bobre tä nemen gare nie. ¿Ñobätä ni raba niere? Ñobätä ñan aune, kukwe ja tötikara känebätä rababa gare nie erere, Jehová tä ja ngwen ño aune töita ño ye Jesukwe bämikani metre (Juan 12:45). Ja ketamuko Jesukwe nämäne ja tare nike krubäte ye jutuabare Jesús ie ngwane, muabare kwe siba, kukwe yebätä nita ñäke ngwane, tä nemen gare metre nie nita ja muaire ja tare nikabätä ngwane, Jehovai ie tä nemen tare krubäte (Sal. 56:8). Kukwe ne tä nemen gare nie ngwane, ni töta nemen rökrai bäri Ngöbö ni tarekä ye ken ¿ñan ererea?

15. Juan 11:41-44 tä mike gare erere ¿Lázaro ngwaka nämäne kämäkäte yekänti dre namani bare? (Üai mikadre ñärärä).

¹⁵ (Ñäkädre Juan 11:41-44 yebätä). Lázaro ngwaka tä mikani kämäkäte yekänti Jesuta nüke ngwane, tä jä ye diankamana mento. Akwa Marta tä niere ie mrü ngwaka ye rä niena kure. Akwa Jesús tä niere ie: “¿Makwe tödekadre tibti angwane, Ngöbö di kri bä nuäre ye makwe tuadi, tikwe ñan nini mae ya?” (Juan 11:39, 40). Biti Jesuta nikren kä kwinbiti tä orare nitre jökrä okwäbiti. Kukwe nuain bike kwe yebiti Jehová käikitaikä kwe. Aune tä ngrente: “¡Lázaro, jakweta künken!”. Aune Lázaro tä kite kä mrebiti. Kukwe ne ñan raba nemen bare namani ruin nitre ruäre ie akwa Jesuta nuainne (nota de estudio Juan 11:17 mikadre ñärärä).

16. ¿Juan kapituko 11 ye tä ni dimike ño tö ngwen bäri ni gaikröta käbämikata yei?

¹⁶ Nita ñäke Juan kapitulo 11 yebätä ngwane, nita tö ngwen nitre gaikröta ja känenkäre ie ye tä nemen bäri dite. Jesukwe kukwe käbämikani Marta ie ye ngwenta törö jai, niebare kwe ie: “Ma ngwai rükadita nire” (Juan 11:23). Jehová erere Jesús tö aune raba kukwe käbämikata kwe ye mike nemen bare. Nita ja tare nike, ja muaita gata yebätä ye niara tö diainkä ja brukwä tätebiti ye bämikani kwe muabare kwe ye ngwane. Jesús käkwe Lázaro ganinkröta yebiti bämikani kwe niara die tärä nitre krütanina ye mikakäreta nire. “¿Makwe tödekadre tibti angwane, Ngöbö di kri bä nuäre ye makwe tuadi, tikwe ñan nini mae ya?”, niebare Jesukwe Marta ie yebätä töbike (Juan 11:40). Ni krütanina gaikröta käbämikata ye kräke kukwe tärä keta kabre nie tö ngwankäre. Akwa ¿kukwe ye rabadre bäri metre ni kräke yekäre ni raba dre nuainne?

NITRE GAIKRÖTA KÄBÄMIKATA YE RABADRE TUIN BÄRI ERA NIE

17. ¿Nitre krütani ganinkröta bätä nita ñäke Bibliabätä ngwane, nikwe dre nuaindre?

¹⁷ Kirabe nitre krütani ganinkröta yebätä ñäkädre aune töbikadretari. Nitre ni kwä ganinkröta nünankäre kä tibienbätä mikata gare Bibliabätä.d ¿Ni raba kä denkä jai töbikatarikäre bäri nguseta kukwe nebätä? Nita ne erere nuainne ngwane, kukwe ye namani bare metre ye ngwandre törö jai: nitre brare, nitre merire aune monsore bätä blitata. Dre drieta kwe ja töi kräke nie aune kukwe bämikani keteitire keteitire yebiti Jehovakwe ni tare aune tö nitre krütani gaikröta yebätä mäkwe töbika. Ni ganinkröta bäri ütiätebätä yebätä töbikadretari, ye abokän Jesús. Ganinkröta ye nitre kwati käkwe tuani tä nemen gare nie ye tä tödeka nikwe mike bäri dite (1 Cor. 15:3-6, 20-22).

18. ¿Kantiko tä blite nitre krütani ganinkrötabätä yebiti ni raba dre nuainne? (Nota mikadre ñärärä).

¹⁸ “Kantiko” tä blite ni krütani gaikröta yebätä nikwe kukwe nuadre (Efes. 5:19).eTö ngwanta nikwe yebätä kantiko ne tä tödeka nikwe mike bäri dite aune kukwe ie nita tö ngwen ye tä nemen bäri metre ni kräke. Ye medenbätä, ütiäte krubäte nikwe kantaidre, tärä okwä mikaninkä ye tä dre driere nie yebätä blitadre nita ja tötika ja mräkäbe nuainne ye ngwane. Nikwe kantiko ye ngwandre törö jai aune kukwe mikata gare ye ketadrete kwekebe ja brukwäte. Ye köböire ja nire nikwe raba nemen kukwe tare te o ni mräkätre tare nikwe krütadre nikän ye ngwane, üai deme Jehovakwe käkwe ni dimikai kantiko ye ngwenta törö jai kukwe tare ye näire. Ye köböire ni töi rabai jäme aune tödeka nikwe rabai bäri dite ja tuakäre kukwe yebe.

19. ¿Nitre krütani gaikrötabätä nita töbike ngwane, ni raba bämike ño ja töite? (Recuadro “¿Mäkwe dre ngwandretari?” mikadre ñärärä).

¹⁹ Kukwe bämikadre ja töite. Nita ja bämike kä bä nuäre yete Jehová köböire. Meri testiko iti tä niere: “Tita bä kabre kä denkä jai tita kä bä nuäre yete ye bämikakäre ja töite ye ngwane, tita kriblü bä nuäre kä bä nuäre yete ye räse tä nemen ruin tie”. Nitre kirabe kädekateta Bibliabätä käkwe ja ngwani metre ye mäkwe mikadre gare jai ye bämike ja töite. ¿Niaratre ye meden mä tö mikai gare bäri jai? ¿Mäkwe dre ngwandretari ie? Ni mräkä tare nikwe krütani nikän ye nikwe tuaita ye bämike ja töite. Dre niedi mäkwe ie, mäkwe kise kitai ngärä aune mäkwe tuaita ye käkwe kä mikai juto mäbätä yebätä töbike.

20. ¿Nikwe dre nuaindre jankunu?

²⁰ Nitre gaikröta Jehovata käbämike nie yebätä nita debe bien krubäte ie. Niara kukwe ye mikai nemen bare, ñobätä ñan aune niara tö nuainbätä aune raba nuainne ye gare metre nie. Tä ni itire itire ie kukwe ne kwrere niere raba ruin nie: “Mä mräkätre tare mäkwe ye rükaita nire”. Nitre krütanina gaikröta ie tö ngwanta nikwe ye mikadre dite jankunu. Nikwe ne erere nuaindi ngwane, Jehová, kukwe bä nuäre käbämikaka nie, ye ken ni rökrai bäri.