Ngöbö jürä ngwandre ye kwin ni kräke nengwane aune kä ja känenkäre kräke

1, 2. ¿Kukwe ben nita ja tuin ye ñobätä bäsi ja erebe kukwe ben Lot ja tuani yebe?

KUKWE ükateta kä nebätä mikakäre täte yebätä ja ruin Lot ni ja ngwanka metrebätä tä Bibliabätä ye erere nie. Niara “nämäne nebe ulire krübäte nitre kukwe nuenkä käme ye kisete”, ñan ñobätä aune nitre nämäne kukwe käme nuainne ye kräke Jehová brukwä nämäne, nämäne gare ie (2 Ped. 2:7, 8). Jehová nämäne tare Lotkwe aune nämäne mike ütiäte krubäte jai ye medenbätä nitre nämäne nüne niara bäre nämäne kukwe käme nuainne ye kräke niara brukwä nämäne. Ye erere tä nemen bare ni näire. Nitre ruäre ñan Ngöbö mike ütiäte krubäte jai. Ja ngwandre ño yebätä niarata kukwe bien ye niaratre ñaka mike täte jire. Akwa kukwe jökrä yebiti ta, nikwe Jehová taredi aune jürä ngwain jabätä ngwane, nikwe ja ngwain kwin nita mike täte ye köböire (Prov. 14:2).

² Rabadre bare nie yekäre, Jehovata ni dimike aune ni töi mike tärä Proverbios yebiti. Kukwe kwin mäträkäre tä kwen tärä nebätä nie yebiti, ni kristiano jökrä kwe kukwe kwin raba nemen.

NGÖBÖ JÜRÄ NGWANTA YE TÄ NI KRIEMIKE

3. Proverbios 17:3 tä mike gare erere, ¿ñobätä ütiäte krubäte ja brukwä kriemikadre? (Üai mikadre ñärärä).

³ Kukwe keteiti ütiätebätä ja brukwä kriemikadre ye abokän Jehovata ni brukwä trä tuin. ¿Dre gäräta kukwe nebiti? Ni kä tibienbätä ie kukwe tuin ye ñan aibe tuin Jehovai, ñakare aune dreta ni brukwäte ye jökrä tuin ie (ñäkädre Proverbios 17:3 yebätä).b Jehovata mäträre nibätä ye nita ketete ja töite tä tuin ie ngwane, ni taredi kwe. Kukwe töbäta ja nirekrä tä nikwe ngwane, kä käme Satanakwe nete, tä kukwe ükete aune kukwe ngwarbe niere ye nikwe ñaka kai ngäbiti jire (Juan 4:14; 1 Juan 5:18, 19). Ni rökrai bäri Jehová ken ngwane, nikwe taredi aune mikadi bäri ütiäte jai. Kukwe raba mate tare niarabätä ye nikwe ñaka nuaindi jire chi, nikwe ja mikadre ngite niara rüere ye ñaka rükai jire chi ni töibätä. Aune ni nuaita ye ngwane, nikwe ngwaintari jai: “Jehovakwe ti tare krubäte aune kukwe keta kabre nuainbare kwe ti kräke ¿se ño tikwe ja mikadre ngite niara rüere?” (1 Juan 4:9, 10).

4. ¿Meri testiko nämäne Jehová jürä ngwen jabätä, yekwe kriemikani ño?

⁴ Martac ni Testiko käi Croacia tö namani kukwe käme nuainbätä. Niarata niere: “Ti ñan nämä töbike mrebe. Tikwe ja mikadre ngite aune käi ngwandre juto jabätä kä ruäre te ye aibe rababa ti töite. Ti nämä Jehová jürä ngwen jabätä ye ti kriemikaba”. ¿Namani bare ño? Marta nämäne Jehová jürä ngwen jabätä. Kukwe diandre kwe jai yebätä dre rabadre bare yebätä töbikabare kwe. Ye erere, ni nuadrete ngwane kukwe tare krubäte rabadre bare yebätä nikwe töbikadre. Ni kä mikadre ulire Jehovabätä aune ni tö niara mikai täte ye erere ni ñan rabadre nuainne jankunu (Gén. 6:5, 6).

5. ¿Kukwe namani bare Leobätä ye tä dre driere mäi?

⁵ Nireta Jehová jürä ngwen jabätä ye ñaka ja mikata ngite üke aune ja ketamuko raba mike kukwe kri te, yebätä käre tä töbike käne. Kukwe ne namani gare Leo nünanka República Democrática del Congo ie. Niara ja ngökani ñöte ngwane, kä nikani kobäkä näre ta, jatani ja kete ni ñaka ja ngwen kwin yebe. Ñaka kukwe käme nuaindi kwe ngwane, ñaka ja mikai ngite kwe Jehová rüere namani nütüre. Jötrö ngwarbe niarakwe ja töi kwitamanbare ja ketamuko kwe yei aune jatani dö ñain krubäte aune nemen kämekäme nitre ben. Niara meye aune rün testiko käkwe kukwe jökrä driebare ie aune nämäne nüne kä jutobiti yebätä namani töbiketa. Ja töi kwitani kwe aune nitre umbre ji ngwanka ye köböire nienanta kukwebätä. Aune kä jutobiti tä sribire ni umbrere konkrekasionte aune prekursor especial erere.

6. ¿Meri nibubiti kukwe bämikata nete ye abokän dre?

⁶ Ja käne mada ni bike ja kite Proverbios kapitulo 9 yebätä, kukwe ne ütiäte ni jökrä kräke. Meri nibubiti kukwe bämikata. Iti ye abokän töbätä, iti abokän ñaka töbike kwin. d Ni täi ja kite kukwe nebätä ngwane, kä tibien gobrainta Satanakwe nete nitre töita raba kämekäme jabe aune pornografía ye aibe jiebiti, ye nikwe ngwandre törö jai (Efes. 4:19). Ye medenbätä, Jehová jürä ngwandre jabätä ye ütiäte krubäte aune ni gitiadre kukwe käme ye ngänikaire (Prov. 16:6). Meri nibubätä blitata, ne tä blite nitre ie kukwe ñan gare krubäte aune ñaka “ta ñaka töbike kwin ja käne” ye ie. Tätre nübaire mrö bänänte kwete ja gwirete ye kwrere (Prov. 9:1, 5, 6, 13, 16, 17). Niaratre nibu tä ni nübaire ye köböire kukwe ñan ja erebe rabai bare. ¿Ñobätä ñan rabai bare ja erebe? Ani mike gare jai.

“MERI ÑAN TÖBIKE KWIN” YE ÑAKA KUKWE NUADRE

7. Proverbios 9:13-18 tä mike gare erere, ¿“meri ñan töbike kwin” tä ni nübaire aune nita niken ngwane dreta nemen bare? (Üai mikadre ñärärä).

⁷ “Meri ñan töbike kwin” tä ni nübaire yebätä ani blite käne (ñäkädre Proverbios 9:13-18 yebätä).e Kä ñan genbätä tä ngrente: “¡Nitre jökrä ie kukwe ñan gare, ye jata nete!” Ye kwrere tä nitre nübaire mrö bänänte kwete. “Biti tärä nemen rikakäre ngwarbe jerekäbe gatakäre ye kwrere”. Nete ye ñan kena Proverbios tä mäträre nibätä. Ñakare aune, kapitulo käne yekänti tä ni mike mokre “meri ja ngwanka käme krubäte” aune “ja mike gure kämekäme” yebätä. Tä niere: “Nitre gwi yete tärä niken ngwarbe gata kisete” (Prov. 2:11-19). Proverbios 5:3-10 ye tä ni mike mokre “meri mada tä ja ngwen käme krubäte” yebätä. “Niara tä näin kwintubu gata kokwäre” ye kwrere bämikata.

8. ¿Nire nire tä “meri ñan töbike kwin” kukwe nuin ye ie dreta diandre jai?

⁸ Ni jökrä tä “meri töi ñakare” ye kukwe nuin, akwa kukwe keteiti diandre jai: ni nübaita kwe ye nikwe kai ngäbiti o ñakare. ¿Ñongwane kukwe ne raba nemen bare? Ni töta nemen kukwe käme nuainbätä ye ngwane, o pornográfica mata rükadre ye ngwane. Kukwe ne erere rabai bare nibätä ngwane, ¿nikwe dre diandi nuaindre jai?

9, 10. ¿Ñobätä ja ngübadrebiti raba kämekäme jabe yebätä?

⁹ Raba kämekäme jabe yebätä kukwe keta kabre tare raba nemen bare aisete ja ngübadrebiti. “Ñö goita ye mane” nieta, “meri ñan töbike kwin” yekwe mikata gare tärä Proverbios yebätä. ¿“Ñö goita ye mane” ye dre gärätä? Nitre ja mäkäninte metre tä nemen jabe ye abokän ñö bälen kwrere mikata gare Bibliabätä (Prov. 5:15-18). Nitre ja mäkäninte metre tä nemen jabe ye kwin. Akwa “ñö goita” ye ñaka ja erebe. Ñobätä ñan aune, ye bämikata nitre tä nemen kämekäme jabe gore abokän tä kukwe Ngöbökwe kite tibien. Bäsi käre, nire tä kukwe käme ne nuainne ye tä nuainne gore ni gokä kwrere. “Ñö goita” ne mane kräketre, ñobätä ñan raba üke nütüta kwetre. Akwa ni ye tä ja ngökö akwle, ñobätä ñan aune kukwe jökrä ye tuin Jehovai aune niara ngöka ñan raba. Ni ñan tärä nemen ja kete Jehovabe ye kukwe bäri tare; aisete kukwe ye mane nie ñan raba (1 Cor. 6:9, 10). Ne ñan ngörä.

¹⁰ Nire tä ja mike gure batibati ye tä nemen ja gaire, ja ñan raba nemen ruin ütiäte. Ñan tö monso tuai jakwe akwa raba nemen kwe o ñan tä nemen nüne kwin mräkätre ben. “Meri ñan töbike kwin”tä ni nübaire ye ñaka ka ngäbitita ye kukwe bäri kwin nuainta. Nitre tä ja mike gure batibati ye ñan tä krüte ja üairebiti aibe, ñakare aune brenta neketekäbätä ye tä murie kete (Prov. 7:23, 26). Kapitulo 9 aune bersikulo 18 mikata krüte kukwe nebiti: “Nitre nübaita kwe ye tä niken mobe Dobote nguse”. Nitre nübaita kwe yebätä kukwe tare tä nemen bare, ¿se ño amare tätre kukwe ye kai ngäbiti ie? (Prov. 9:13-18).

11. ¿Pornografía tuadre ye ñobätä käme dikaro?

¹¹ Pornografía ye tä kä jökrä känti. Tuadre jerekäbe ye ñaka käme nitre ruäre tä nemen nütüre, akwa ñaka metre. Pornografía tuata ngwane, tua töta nemen jankunu, kukwe tare tä nemen bare nibätä aune ni töi ñaka tä nemen kwin. Dre tuata ye ñan raba nemen nuäre käi kwitakakäre jötrö jabiti. Ne madakäre, kukwe käme medeita nemen nie ngwane, pornografía tuata ye ñan tä denkä, ñakare aune ni töta nemen nuainbätä bäri (Col. 3:5; Sant. 1:14, 15). Nitre tä pornografía tuin ye bäsi käre tätre ja mike ngite raba kämekäme jabe yebiti.

12. Kukwe keteiti mata rükadre raba ni töi mike rababätä kämekäme jabe ngwane, ¿dre nuaindre?

¹² Celular o tableta yete pornografía mata rükadre ngwane, ¿ni kristiano raba dre nuainne? Rabadre denkä jötrö ngwarbe. Kukwe keteiti raba ni dimike kukwe ye nuainne ye abokän: ni ñan raba ja kete jankunu Jehovabe ye ngwandre törö jai. Akwa, üai ruäre abokän ñaka käme krubäte ye kwrere mikata tuin jai, akwa raba ni töi mike kukwe käme nuainbätä. Aisete ni ñaka tö tuai jire chi. Ñan ñobätä aune ni ñaka tö ja mikai ngite ja brukwäte (Mat. 5:28, 29). Ni umbre iti ji ngwanka konkrekasionte käi Tailandia kädekata David, tä niere: “Tita üai keteiti tuin ñaka käme akwa ‘¿tikwe tuadre jankunu ye kwin Jehová kräke ya?’ Tita nemen ngwentari jai, ye tä ti dimike kukwe kwin den jai”.

13. ¿Dre ni dimikai kukwe kwin den jai?

¹³ Ni tö kukwe kwin nuainbätä yebätä nita Jehová jürä ngwen jabätä ngwane, rabai bäri nuäre ni kräke kukwe kwin diankäre jai. Kukwe ne metre, ñan ñobätä aune Proverbios 9:10 tä niere “Jehová jurä ngwanta yebiti ni töbätä nita kite bämike”. Kukwe ye mikata gare mrebe Proverbios kapitulo 9 kenanbe yete, känti “kukwe töbätä erametre” bämikata meri itibiti.

“KUKWE TÖBÄTÄ” TÄ NI NÜBAIRE YE KADRE NGÄBITI

14. ¿Ni nübaita meden abokänbätä blitata Proverbios 9:1-6 yebätä?

¹⁴ (Ñäkädre Proverbios 9:1-6 yebätä).f Jehová ni Sribekä aune kukwe töbätä bäkänkä tä ni nübaire (Prov. 2:6; Rom. 16:27). Proverbios tä blite ju kri känti üra tä krä kükü. Kukwe ye tä ni mike töbike Jehová mantiame krubäte aune nire tä niara kukwe töbätä mike täte ye niarata kai ngäbiti yebätä.

15. ¿Ngöböta ni nübaire dre nuainne?

¹⁵ Jehová mantiame krubäte aune tä kukwe kwin keta kabre bien nie. Mikata gare metre tärä Proverbios kapitulo 9 yete, yekänti blitata meri töbätä yebätä. Ngri aune vino sribebarera kwe aune mesa tä ükaninte biare kwe (Prov. 9:2). Proverbios bersikulo 4 aune 5 yete kukwe mada nieta, nire ñan töbike kwin käne ye ie “kukwe töbätä” tä niere: “Mun jakwe nete, pan kwete”. ¿Ñobätä ni rabadre meri töbätä ne kukwe kai ngäbiti? Ñobätä ñan aune Jehová tö monsotre kwe kriemikai aune mikai töbätä. Kukwe tare köböire kukwe rabadre gare nie biti käre ja rabadre ruin ngite nie kukwe yebätä ye ie niara ñan tö. Ye medenbätä, “nire tä ja ngwen metre ye ie tä kukwe töbätä bien” (Prov. 2:7). Nikwe Jehová jürä ngwain jabätä ngwane, ni tö rabai matai kwinbätä aune kukwe töbätä kukwe ye ererebiti näin. Ye köböire kä täi juto nibätä (Sant. 1:25).

16. Alain tä Jehová jürä ngwen jabätä ye köböire, ¿dre diani nuaindre kwe jai aune dre namani bare?

¹⁶ Jehová jürä ngwanta jabätä ye tä ni dimike kukwe kwin den jai ye ani mike gare keteiti jai. Alain ni umbre ji ngwanka konkrekasionte, niara ye profesor. Tä niere: “Peliculate pornografía mikata tuare yebiti monsotre tötika raba nieta profesor ruärekwe”. Akwa töbikata kore yebiti ja ngökata gare Alain ie. Niara tä niere: “Tita Jehová jürä ngwen jabätä, yebätä tikwe ñaka película tuaba jire. Ñobätä tikwe ñaka kukwe ye nuainba ye tikwe mikaba gare profesor mada ie”. Ja ngwani kwe, yebiti “kukwe töbätä erametre” ye mikani täte kwe, känti nieta: “Ji biti kukwe nüke gare yebiti näin ja käne” (Prov. 9:6). Niara töi nämäne kwatibe kukwe nuainbätä yebätä sribi muko kwe ruäre ye töi namani niä yebätä jatanintre ja tötike Bibliabätä aune kwen gätäbätä.

17, 18. ¿“Kukwe töbätä” tä ni nübaire ka ngäbitita ye köböire dre kwin tä nemen nikwe aune dre raba nemen nikwe ja känenkäre? (Üai mikadre ñärärä).

¹⁷ Meri nibubätä blitata yebiti Jehovata mike gare nie nikwe dre nuaindre ne kwe kä tädre juto nibätä. Nireta “meri ñan töbike kwin” kukwei kai ngäbiti ye töita rababätä kämekäme jabe ye aibe jiebiti. Aune ye köböite dre raba nemen bare bätätre ja känenkäre yebätä ñaka töbike jire.Ye köböite niaratre jökrä “tä niken mobe Dobote nguse” (Prov. 9:13, 17, 18).

¹⁸ “Kukwe töbätä erametre” tä ni nübaire ye nire tä kai ngäbiti yekwe, ¡kukwe kwin keta kabre tä nemen aune käta nemen juto bätätre! Ne madakäre, mrö ja üaire bänänte aune keta kabre ye tätre kwete (Is. 65:13). Profeta Isaías yebiti Jehovakwe niebare: “Ti kukwe nuin kwin aune jondron kwin ye kwete aune erametre jondron bänänte ye kä mikai juto munbätä” (Is. 55:1, 2). Aisete, dre tuin kwin Jehovai ye nita tarere aune dre tuin käme ie ye kräke nita ja brukwä mike arato (Sal. 97:10). Meri sribikäbätä blitata Proverbios kapitulo 9 ye erere ni tä ngrente, ni “jutuadre ni jökrä ie yekänti”. Ni mada nübaita kukwe töbätä erametre kokwäre ye tä kä mike juto nibätä. Niara erere, nita niere: “¡Mun jökrä ie kukwe ñan gare krubäte, jakwe nete!”. Ni aune nire nire nübaita tä kai ngäbiti ye kräke kukwe kwin tä nemen bare kä nengwane. Akwa ne ñan aibe. Nikwe näin jankunu “ji biti kukwe nüke gare” yebiti ngwane nünandi kärekäre (Prov. 9:3, 4, 6).

19. ¿Nikwe dre nuaindre nieta Eclesiastés 12:13, 14? (Recuadro “Kukwe kwin tä nemen nikwe Ngöbö mikabätä täte” mikadre ñärärä).

¹⁹ (Ñäkädre Eclesiastés 12:13, 14 yebätä).g Nita nüne kä krüte näire yebätä kukwe käme aibe tuin nie käbiti tibien. Ni tö Jehová mikai täte jankunu. Ye köböire ni brukwä täi kriemikani, nikwe ja ngwain deme Jehová okwäkänti aune ni täi Jehová ken. Niara tare nikwe aune nita mike ütiäte yebätä, nikwe ni jökrä nübaidi jankunu “kukwe töbätä erametre” ye känene aune mike tuin ütiäte jai.