Kukwe ne ererebätä mä raba ja tötike

Dre mikadre bäri ütiäte jai

Ni töta nemen ja tötikai krubäte Bibliabätä ye erere ñan tä nemen bare käre nie. Akwa, ¿dre raba ni dimike ne kwe nikwe ñan kä gadrete ngwarbe? Käne ni raba kä denkä debe näre jai ja tötikakäre, nikwe ja tötikadre kukwe chibätä akwa ja tötikadre nguseta ye bäri kwin, ñäkädre jötrö aune ere täräbätä ye kräke.

Kukwe bäri ütiäte yebätä mäkwe ja töi mika (Efes. 5:15, 16). Kukwe ruäre ne erere mä raba nuainne:

• Mäkwe ñäkä Bibliabätä köbö kwatire kwatire (Sal. 1:2). Kömikakäre mä raba ja töi mike ñäke texto dianinkä gätä bämän ngrabare kräke yebätä.

• Drebätä ja kitai gätäte yebätä mäkwe ja tötika käne, gätä bämän grabare kräke aune ja tötikata Ni Mikaka Mokre kräke. Mäkwe ja mika juto comentario biankäre (Sal. 22:22).

• Käta nemente kabre mäi ngwane, mäkwe ja di ngwan ja tötika jene jene ye jökrä nuainkäre. Ñodre revistas para el público, video aune kukwe keta kabre mada mikata sitio jw.org yebätä mä raba ja tötike.

• Mäkwe ja töi mika ja tötike kukwe keteitibätä. Ñodre, drebe mäta ja tuin, kukwe keteiti mäkwe ngwanintari jai o kukwe keteiti Bibliabätä mä tö mikai gare bäri kwin jai yebätä ma raba kukwe känene. Sección “Actividades para estudiar la Biblia”, tä jw.org yekänti kukwe kwain bäri mai.